ទីភ្នាក់ងារព័ត៌មាន Reuters បានដកស្រង់សម្តីមន្ត្រីក្រសួងការបរទេសថៃ ដែលបាននិយាយកាលពីសុក្រថា ប្រទេសចិនបានត្រៀមខ្លួនក្នុងការចែករំលែកទិន្នន័យអំពីលំហូរទឹកចូលទន្លេមេគង្គ ដែលទិន្នន័យនេះជាសំណើជាយូរមកហើយរបស់បណ្តាប្រទេសអាស៊ីអាគ្នេយ៍ ដែលនៅតាមបណ្តោយទន្លេមេគង្គក្រោម។
លោក Nikorndej Balankura មន្ត្រីជាន់ខ្ពស់ក្រសួងការបរទេសថៃ ថ្លែងប្រាប់អ្នកសារព័ត៌មានហើយត្រូវបានទីភ្នាក់ងារព័ត៌មាន Reuters ដកស្រង់សម្តីដើមថា៖ «ប្រទេសចិនបានត្រៀមខ្លួននឹងចែករំលែកព័ត៌មានជាមួយយើង នៅក្នុងបែបផែនមួយ ដែលច្បាស់លាស់ មានប្រយោជន៍ និងមានតម្លាភាព ពេញមួយឆ្នាំ»។
ការគ្រប់គ្រងទឹកទន្លេមេគង្គជារឿងរសើបខាងនយោបាយ ហើយជីវភាពកសិករ និងអ្នកនេសាទជាច្រើននៅក្នុងបណ្តាប្រទេសទាំងនេះ ពឹងផ្អែកទៅលើទន្លេមេគង្គ។ របាយការណ៍ដែលត្រូវបានបោះពុម្ពដោយក្រុមហ៊ុនស្រាវជ្រាវអាមេរិកមួយ ក្នុងឆ្នាំនេះ បានចោទប្រកាន់ប្រទេសចិនថា បានខ្ទប់ទឹកជាច្រើនរបស់ទន្លេមេគង្គ កាលពីឆ្នាំ ២០១៩ ដែលការអះអាងនេះ ត្រូវបានរដ្ឋាភិបាលទីក្រុងប៉េកាំងបដិសេធ។
ប្រទេសចិនដែលនៅដើមទឹកទន្លេមេគង្គ ដែលខ្លួនហៅថាទន្លេ Lancang នោះ មិនមានកិច្ចព្រមព្រៀងជាផ្លូវការជាមួយបណ្តាប្រទេសតាមបណ្តោយទន្លេមេគង្គ គឺឡាវ ថៃ មីយ៉ាន់ម៉ា កម្ពុជា និងវៀតណាម អំពីការប្រើប្រាស់ទឹកទន្លេទេ ហើយពេលនេះ ចិនបានត្រឹមចែកចាយទិន្នន័យតិចតួចអំពីលំហូរទឹកទន្លេនៅក្នុងអំឡុងរដូវវស្សាប៉ុណ្ណោះ។
ឆ្លើយតបនឹងសំណួររបស់ទីភ្នាក់ងារ Reuters ក្រសួងការបរទេសចិនថា ខ្លួនមិនធ្វើអត្ថាធិប្បាយអ្វីនៅមុនកិច្ចប្រជុំមេដឹកនាំរបស់ប្រទេសតាមបណ្តោយទន្លេមេគង្គ រួមទាំងប្រទេសចិនដែលមានឈ្មោះថាកិច្ចប្រជុំ Lancang-Mekong ដែលនឹងប្រព្រឹត្តធ្វើនៅថ្ងៃច័ន្ទសប្តាហ៍ក្រោយ៕