ប្រទេសចិនបានរៀបចំកិច្ចប្រជុំត្រីភាគីជាមួយនឹងប្រទេសកូរ៉េខាងត្បូង និងជប៉ុននៅថ្ងៃអង្គារនេះ ក្នុងគោលបំណងបង្ហាញកម្លាំងរួមគ្នាជាធ្លុងមួយដើម្បីប្រឆាំងនឹងការបង្កហេតុជាថ្មីរបស់ប្រទេសកូរ៉េខាងជើង។
នាយករដ្ឋមន្ត្រីចិនលោក Li Keqiang បានស្វាគមន៍ប្រធានាធិបតីកូរ៉េខាងត្បូងលោក Moon Jae In និងនាយករដ្ឋមន្ត្រីជប៉ុនលោក Shinzo Abe មកកាន់ទីក្រុង Chengdu នៅភាគនិរតីប្រទេសចិន គឺក្នុងរយៈពេលពីរថ្ងៃមុនពេលមេដឹកនាំកូរ៉េខាងជើងលោក Kim Jong Un គ្រោងធ្វើការសាកល្បងអ្វីដែលហៅថា «កាដូថ្ងៃគ្រិស្តម៉ាស»។
លោក Kim Jong Un កំពុងទាមទារឲ្យសហរដ្ឋអាមេរិកធ្វើសម្បទានថ្មីនៅត្រឹមចុងឆ្នាំនេះ ដើម្បីជាថ្នូរនឹងការចាប់ផ្ដើមឡើងវិញនូវការចរចាដែលជាប់គាំងក្នុងគោលបំណងឲ្យកូរ៉េខាងជើងលះបង់កម្មវិធីនុយក្លេអ៊ែររបស់ខ្លួន។
នៅក្នុងសុន្ទរកថាបើកកិច្ចប្រជុំនេះ លោក Moon Jae In បាននិយាយថា ភាពតានតឹងដែលកើនឡើង «មិនបានផ្ដល់ប្រយោជន៍អ្វីទាំងអស់ដល់ប្រទេសកូរ៉េខាងត្បូង ចិន ជប៉ុន ឬក៏កូរ៉េខាងជើងនោះទេ»។
កិច្ចប្រជុំត្រីភាគីនេះក៏បានធ្វើឡើង ស្របពេលដែលមានជម្លោះរាលដាលឡើងរវាងរដ្ឋាភិបាលក្រុងសេអ៊ូល និងរដ្ឋាភិបាលក្រុងតូក្យូ ទាក់ទិននឹងការសម្រេចរបស់តុលាការនាពេលថ្មីៗនេះនៅក្នុងប្រទេសកូរ៉េខាងត្បូងដែលបញ្ជាឲ្យក្រុមហ៊ុនជប៉ុនសងសំណងដល់ជនជាតិកូរ៉េដែលត្រូវបានបង្ខំឲ្យធ្វើការនៅក្នុងរោងចក្រជប៉ុននៅក្នុងសម័យសង្គ្រាមលោកលើកទី ២។
ជនជាតិកូរ៉េខាងត្បូងនៅតែឈឺចាប់ជាមួយនឹងការត្រួតត្រាឃោរឃៅរបស់យោធាជប៉ុនលើឧបទ្វីបកូរ៉េពីឆ្នាំ ១៩១០ ដល់ឆ្នាំ ១៩៤៥។ នៅឆ្នាំ ១៩៤៥ ជប៉ុនបានចុះចាញ់កងកម្លាំងសម្ព័ន្ធមិត្តដើម្បីបញ្ចប់សង្គ្រាម។ ជនជាតិកូរ៉េខាងត្បូងរាប់សែននាក់បានរងគ្រោះដោយសារអំពើឃោរឃៅយង់ឃ្នងនៅក្នុងអំឡុងពេលត្រួតត្រារបស់ជប៉ុន ដែលក្នុងនោះមានទាំងក្រុមស្ត្រីដែលគេហៅថាជា «ស្ត្រីកំដរអារម្មណ៍» ផងដែរ ដែលត្រូវបានបង្ខំឲ្យធ្វើជាទាសករផ្លូវភេទនៅក្នុងផ្ទះបនយោធាជប៉ុន៕