ប្រទេសចិនបានប្រកាសនៅថ្ងៃពុធនេះ ពីការផ្លាស់ប្តូរដ៏ធំនៃគោលនយោបាយប្រឆាំងជំងឺកូវីដ១៩របស់ខ្លួន ចាប់តាំងពីជំងឺនេះចាប់ផ្តើមរាតត្បាតកាលពី៣ឆ្នាំមុន ដោយបន្ធូរបន្ថយបទបញ្ញតិ្តមួយចំនួនក្នុងការទប់ទល់នឹងការផ្ទុះរាលដាលនៃជំងឺនេះ ដែលកន្លងទៅបានធ្វើឱ្យប៉ះពាល់ដល់វិស័យសេដ្ឋកិច្ចនៃប្រទេសដែលមានសេដ្ឋកិច្ចធំបំផុតទី២របស់ពិភពលោកមួយនេះ និងបណ្តាលឱ្យមានបាតុកម្មប្រឆាំងតវ៉ាជាច្រើនពីសំណាក់ពលរដ្ឋចិន។ នេះបើយោងទៅលើសេចក្តីរាយការណ៍របស់ទីភ្នាក់ងារសារព័ត៌មាន Reuters។
ការបន្ធូរបន្ថយវិធានការមួយចំនួន ដែលក្នុងនោះអនុញ្ញាតឱ្យមនុស្សដែលឆ្លងជំងឺកូវីដ មានរោគសញ្ញាបន្តិចបន្តួចឬក៏គ្មាននោះ អាចធ្វើចត្តាឡីស័កនៅផ្ទះរបស់ខ្លួន និងឈប់ធ្វើតេស្តដល់ពលរដ្ឋដែលធ្វើដំណើរក្នុងប្រទេស ដែលនេះជាសញ្ញាដ៏ធំបំផុតមួយមិនធ្លាប់មានដែលរដ្ឋាភិបាលក្រុងប៉េកាំងកំពុងរៀបចំឱ្យពលរដ្ឋរបស់ខ្លួនសរុបទាំងអស់ប្រមាណ១,៤ពាន់លាននាក់ អាចរស់នៅជាមួយជំងឺកូវីដ១៩។
បើទោះបីជាព្រំដែននៅតែបិទក្តី ពលរដ្ឋចិនជាច្រើនបានអបអរសាទរការផ្លាស់ប្តូរនេះ ដែលអាចជួយដល់ប្រទេសចិនឱ្យងើបឡើងវិញជាបណ្តើរៗនៅក្នុងពិភពលោក បន្ទាប់ពីរយៈពេល៣ឆ្នាំនៃការផ្ទុះវីរុសនៃជំងឺកូវីដ១៩ នៅទីក្រុង Wuhan ដែលស្ថិតនៅភាគកណ្តាលប្រទេសចិន។
ការប្រកាសរបស់រដ្ឋាភិបាលចិនក្នុងការកែប្រែគោលនយោបាយរបស់ខ្លួនជុំវិញជំងឺកូវីដ១៩នេះ បានក្លាយជាប្រធានបទដ៏សំខាន់ សម្រាប់អ្នកចូលមើលនៅលើបណ្តាញសង្គម Weibo របស់ចិន ដោយពលរដ្ឋចិនជាច្រើនបានអបអរសាទរចំពោះការអនុញ្ញាតបើកឱ្យមានការធ្វើដំណើរឡើងវិញ ប៉ុន្តែក៏មានអ្នកខ្លះ នៅតែបារម្ភពីការឆ្លងដែលអាចរីកកាន់តែខ្លាំងផងដែរ។
ទន្ទឹមនឹងនេះដែរ ក្រុមអ្នកវិភាគក៏បានស្វាគមន៍ការផ្លាស់ប្តូរនេះ ដែលអាចជួយពង្រឹងសេដ្ឋកិច្ចនិងរូបិយបណ្ណចិនដែលកំពុងចុះខ្សោយ និងជួយជំរុញការរីកចម្រើនជាសាកលផងដែរ។
ពលរដ្ឋចិនបានធ្វើការប្រឆាំងតវ៉ាក្នុងទីក្រុងជាច្រើនក្នុងប្រទេសចិនក្នុងពេលកន្លងទៅ ជុំវិញគោលនយោបាយដ៏តឹងរឹងទាក់ទងនឹងជំងឺកូវីដ១៩ កាលពីខែមុន ដែលជាអ្វីដែលបង្ហាញពីការមិនសប្បាយចិត្តរបស់សាធារណជនចិន ចាប់តាំងពីលោក Xi Jinping ឡើងកាន់អំណាចក្នុងឆ្នាំ២០១២មក៕