អ្នកវាយប្រហារតាមអ៊ីនធឺណិតត្រូវបានគេរកឃើញថាបានធ្វើការវាយប្រហារលើស្ថាប័នរដ្ឋាភិបាលកម្ពុជាសំខាន់ៗ ដែលនេះជាអ្វីដែលគេជឿជាក់យ៉ាងខ្លាំងថាជាការវាយប្រហាររបស់រដ្ឋាភិបាលចិនដែលមានការសម្របសម្រួលមួយ នៅមុនការបោះឆ្នោតថ្នាក់ជាតិរបស់ប្រទេសកម្ពុជាចូលមកដល់នៅចុងខែកក្កដានេះ។ នេះបើយោងតាមការបញ្ជាក់របស់ក្រុមហ៊ុនសន្តិសុខអ៊ីនធឺណិតមួយរបស់សហរដ្ឋអាមេរិក។
គណៈកម្មាធិការជាតិរៀបចំការបោះឆ្នោត ព្រឹទ្ធសភា ក្រសួងការបរទេស ក្រសួងមហាផ្ទៃ និងក្រសួងសេដ្ឋកិច្ច និងហិរញ្ញវត្ថុ បានរងការប៉ះពាល់ដោយសារការវាយប្រហារតាមអ៊ីនធឺណិតនេះ។ ជាងនេះទៅទៀត មន្ត្រីការទូតបរទេស ស្ថាប័នប្រព័ន្ធផ្សព្វផ្សាយ និងមន្ត្រីគណបក្សប្រឆាំងក៏រងការប៉ះពាល់ផងដែរ។ នេះបើយោងតាមការសន្និដ្ឋានរបស់ក្រុមហ៊ុនសន្តិសុខអ៊ីនធឺណិត FireEye។
ក្រុមហ៊ុននេះបានបញ្ជាក់នៅក្នុងរបាយការណ៍របស់ខ្លួនដែលបានចេញផ្សាយកាលពីថ្ងៃអង្គារម្សិលមិញថា៖ «យើងរំពឹងថា សកម្មភាពនេះនឹងអនុញ្ញាតឲ្យរដ្ឋាភិបាលចិនមានលទ្ធភាពអាចមើលឃើញកាន់តែទូលំទូលាយទៅលើការបោះឆ្នោត និងប្រតិបត្តិការរបស់រដ្ឋាភិបាលកម្ពុជា»។
ក្រុមហ៊ុន FireEye នេះបានរកឃើញថា កម្មវិធីកុំព្យូទ័រមេរោគ TEMP.Periscope ដែលក្រុមហ៊ុននេះបានរកឃើញតាំងពីឆ្នាំ ២០១៣ មក ត្រូវបានគេប្រើដើម្បីប្រឆាំងនឹងមុខព្រួញនយោបាយកម្ពុជានានា តាំងពីយ៉ាងហោចណាស់ខែមេសា ឆ្នាំ ២០១៧ មក។ សមាជិកជាច្រើនរបស់គណបក្សសង្គ្រោះជាតិ ដែលត្រូវបានតុលាការរំលាយកាលពីឆ្នាំមុន ក៏បានរងគ្រោះផងដែរនៅក្នុងការវាយប្រហារតាមអ៊ីនធឺណិតនេះ៕