ទីភ្នាក់ងារគ្រប់គ្រងនិងបង្ការជំងឺ (CDC) របស់សហរដ្ឋអាមេរិកបាននិយាយនៅថ្ងៃពុធថាវីរុសកូរ៉ូណាបំប្លែងថ្មីដែលតា (Delta) មានជាង៩៣ភាគរយនៃករណីឆ្លងថ្មីនៃជំងឺកូវីដ១៩ទាំងអស់នៅក្នុងប្រទេស។
តួលេខដែលត្រូវធ្វើបច្ចុប្បន្នភាពដោយទីភ្នាក់ងារគ្រប់គ្រងនិងបង្ការជំងឺ (CDC) នៅសប្តាហ៍ចុងក្រោយនៃខែកក្កដានេះបង្ហាញថា វីរុសប្រភេទដែលតារួមទាំងសណ្តានរបស់វាសុទ្ធតែត្រូវបានចាត់ថ្នាក់ជាប្រភេទវីរុសគួរឱ្យព្រួយបារម្ភដែលមានជាង៩៣ភាគរយនៃករណីឆ្លងថ្មីទាំងអស់នៅអាមេរិកក្នុងពេលពីរសប្តាហ៍ចុងក្រោយនៃខែកក្កដា។
វីរុសដែលតានេះមានភាគរយកាន់តែខ្ពស់នៅក្នុងតំបន់ខ្លះ។នៅប៉ែកខាងលិចភាគកណ្តាលដូចជារដ្ឋIowa, Kansas, Missouri និង Nebraskaមានករណីឆ្លងវីរុសដែលតាជាង៩៨ភាគរយ។នៅក្នុងតំបន់ដែលរួមមានរដ្ឋ Dakota ខាងជើងនិងខាងត្បូង រដ្ឋ Colorado, Montana, Utah និងWyomingករណីឆ្លងវីរុសដែលតាមានជាង៩៥ភាគរយ។
តួលេខនេះបង្ហាញពីកំណើនយ៉ាងឆាប់រហ័សនៃអត្រាវីរុសនេះចាប់តាំងពីចុងខែឧសភានៅពេលការឆ្លងវីរុសនេះមានប្រហែល៣ភាគរយ។
ទីភ្នាក់ងារ CDC អាមេរិកក៏បានបញ្ជាក់ដែរថាការឆ្លងថ្មីជាមធ្យមប្រចាំថ្ងៃក្នុងសប្តាហ៍កន្លងមកនេះបានឡើងពី៤០.៥៩៧ករណីកាលពីសប្តាហ៍មុនដល់៦៦.៦០៦ករណីក្នុងមួយថ្ងៃក្នុងសប្តាហ៍នេះគឺឡើងជាង៦៤ភាគរយ។
តួលេខនេះទាបជាងកម្រិតឆ្លងខ្ពស់បំផុតក្នុងខែមករាពេលដែលសហរដ្ឋអាមេរិកមានការឆ្លងវីរុសកូរ៉ូណាថ្មីជិត៣០០.០០០ករណីក្នុងមួយថ្ងៃ។កំណើនឆ្លងថ្មីចុងក្រោយគឺខ្ពស់ជាងតួលេខគួរឱ្យកត់សម្គាល់កាលពីខែឧសភានៅពេលការឆ្លងជាមធ្យមប្រចាំថ្ងៃបានធ្លាក់ចុះដល់ជាង៨.០០០ករណី៕