សពរបស់អតីតមេដឹកនាំគុយបា លោក Fidel Castro ត្រូវបានគេបញ្ចុះនៅប៉ែកខាងកើតប្រទេសគុយបាកាលពីព្រឹកថ្ងៃអាទិត្យ បន្ទាប់ពីការកាន់ទុក្ខនៅទូទាំងប្រទេសបានប្រព្រឹត្តអស់រយៈពេល៩ថ្ងៃរួចមក។
ពិធីបញ្ចុះសពនៅកន្លែងបញ្ចុះសព Santa Ifigenia ក្នុងទីក្រុងSantiago នៃប្រទេសគុយបា ត្រូវបានគេធ្វើឡើងជាលក្ខណៈឯកជននៅនាទីចុងក្រោយបំផុត ដោយហាមឃាត់មិនឲ្យអ្នកកាសែតនៅទូទាំងពិភពលោកចូលរួមយកព័ត៌មានក្នុងពិធីបញ្ចុះសពនោះឡើយ។
លោក Castro ដែលជាមេដឹកនាំម្នាក់ដែលមានទាំងអ្នកគាំទ្រនិងស្អប់ ត្រូវបានពលរដ្ឋគុយបាមួយចំនួនកោតសរសើរថាជាវីរៈបុរសរបស់អ្នកក្រីក្រ ប៉ុន្តែអ្នកផ្សេងទៀតរិះគន់លោកថាជាមេដឹកនាំផ្តាច់ការ ដែលធ្វើឲ្យសេដ្ឋកិច្ចក្នុងប្រទេសចុះខ្សោយនិងបំពានសិទ្ធិមនុស្ស។ លោក Castro បានទទួលមរណភាពកាលពីថ្ងៃទី២៥ ខែវិច្ឆិកាក្នុងវ័យ៩០ឆ្នាំ បន្ទាប់ពីមានបញ្ហាសុខភាពអស់រយៈពេលជាច្រើនឆ្នាំ។
ផេះដែលសល់ពីការបូជាសពរបស់លោក Fidel Castro បានមកដល់កាលពីរសៀលថ្ងៃសៅរ៍នៅក្នុងទីក្រុង Santiago។ កាលពីឆ្នាំ១៩៥៣លោកបានចាប់ផ្តើមធ្វើបដិវត្តន៍គុយបានៅទីនោះ។ ពិធីហែរសពត្រូវបានធ្វើឡើងដោយចេញដំណើរបញ្ច្រាសពីផ្លូវដែលលោក Castro និងក្រុមឧទ្ទាមរបស់លោកដណ្តើមបានរដ្ឋធានីពីជួរភ្នំ Sierra Maestra មុនពេលដែលលោកឡើងកាន់អំណាចកាលពីខែមករា ឆ្នាំ១៩៥៩៕