ការបង្ក្រាបរបស់កម្ពុជា ទៅលើប្រព័ន្ធផ្សព្វផ្សាយព័ត៌មានដែលមានលក្ខណៈទិតៀន បានប្រែក្លាយជារឿងគួរឲ្យខ្ពើមរអើម ដោយមានការផ្សព្វផ្សាយរូបថតមួយចំនួន ដែលមានចេតនាបង្ហាញឲ្យឃើញអតីតអ្នកយកព័ត៌មានអាស៊ីសេរីម្នាក់ កំពុងថតវីដេអូនិងចូលរួមប្រព្រឹត្តអំពើអាសអាភាសដោយខ្លួនឯងផ្ទាល់។
រូបថតទាំងនេះ ត្រូវបានផ្សព្វផ្សាយកាលពីចុងសប្ដាហ៍មុន នៅលើគេហទំព័រព័ត៌មានចំនួនពីរដែលគាំទ្ររដ្ឋាភិបាល ដោយនិពន្ធនាយកនៃគេហទំព័រទាំងនេះ និយាយថា រូបថតទាំងនេះ ត្រូវបានប៉ូលិសផ្ដល់ឲ្យ។
លោកនាយករដ្ឋមន្ត្រី ហ៊ុន សែន ដែលរដ្ឋាភិបាលរបស់លោក បានរំលាយគណបក្សប្រឆាំងដ៏ធំក្នុងប្រទេសកម្ពុជាហើយនោះ បានព្រមានកាលពីថ្ងៃព្រហស្បតិ៍ថា សារព័ត៌មានណា ដែលគំរាមកំហែងរដ្ឋាភិបាល នឹងក្លាយជាចំណុចគោលដៅរបស់រដ្ឋាភិបាល។ ប៉ុន្តែ លោក ហ៊ុន សែន មិនបានថ្លែងពីការបញ្ចេញរូបថតអតីតអ្នកយកព័ត៌មានអាស៊ីសេរីដែលគួរឲ្យមានមន្ទិលនេះទេ។
លោកបានមានប្រសាសន៍ថា «រាជដ្ឋាភិបាលកម្ពុជានឹងមិនអនុញ្ញាតឲ្យមានការប្រើប្រាស់សេរីភាពតាមបែបអានាធិបតេយ្យដោយមិនគោរពច្បាប់ ដើម្បីធ្វើបដិវត្តន៍ពណ៌ ផ្ដួលរំលំរាជរដ្ឋាភិបាលស្របច្បាប់ជាដាច់ខាត»។
រូបឯកសារ៖ លោកនាយករដ្ឋមន្រ្តី ហ៊ុន សែន (ឡេង ឡែន/VOA)
ការថ្លែងបែបនេះ បានក្លាយជាការចោទប្រកាន់មួយ ដែលបច្ចុប្បន្ននេះ ត្រូវបានគេយកមកប្រើជាប់ជាប្រចាំ ប្រឆាំងនឹងអ្នករិះគន់រដ្ឋាភិបាល។
អង្គភាពព័ត៌មាន Fresh News ដែលបានផ្សព្វផ្សាយរូបថតអាសអាភាសទាំងនេះមុនគេ បាននិយាយថា មន្ត្រីប៉ូលិស ដែលមិនបង្ហាញអត្តសញ្ញាណម្នាក់ យកបានរូបថតទាំងនេះ កាលពីសប្ដាហ៍មុន ក្នុងអំឡុងពេលលបឆ្មក់ចូលក្នុងស្ទូឌីយោថតវីដេអូខារ៉ាអូខេ គ្មានច្បាប់មួយកន្លែងដែលដំឡើងដោយអតីតអ្នកយកព័ត៌មានអាស៊ីសេរី គឺលោក អ៊ួន ឈិន។
លោក អ៊ួន ឈិន និងអតីតសហការីរបស់លោកម្នាក់ទៀតគឺលោក យាង សុធារិន ហៅ យាង សុជាមេត្តា កំពុងស្ថិតក្នុងមន្ទីរឃុំឃាំងបណ្ដោះអាសន្ន ដោយរងការចោទប្រកាន់ថា លោកទាំងពីរ នៅបន្តធ្វើការឲ្យវិទ្យុអាស៊ីសេរី បន្ទាប់ពីវិទ្យុដែលឧបត្ថម្ភថវិកាដោយសហរដ្ឋអាមេរិកនេះ បានបិទការិយាល័យរបស់ខ្លួនក្នុងប្រទេសកម្ពុជា កាលពីដើមខែកញ្ញា ដោយសារវិទ្យុនេះ លើកឡើងពីការបង្ក្រាប«ឥតបង្អង់ដៃរបស់រដ្ឋាភិបាលទៅលើសំឡេងឯករាជ្យ»។
អតីតអ្នកយកព័ត៌មានអាស៊ីសេរី ទាំងពីរនាក់ ត្រូវបានចោទប្រកាន់ពីបទចារកម្ម ក្រោមច្បាប់ដែលមិនបានកំណត់និយមន័យឲ្យបានច្បាស់លាស់ ដែលបានដាក់ទោសព្រហ្មទណ្ឌ ទៅលើការផ្ដល់ព័ត៌មានដល់រដ្ឋបរទេស ដែលគេគិតថា មានលក្ខណៈគ្រោះថ្នាក់ដល់សន្តិសុខជាតិ។
ប្រសិនបើគេរកឃើញថា មានកំហុសមែននោះ អ្នកទាំងពីរ អាចជាប់ពន្ធនាគាររហូតដល់១៥ឆ្នាំ។
អ្នកនាំពាក្យអាស៊ីសេរីគឺលោក Rohit Mahajan បានថ្លែងតាមសារអេឡិចត្រូនិកឬអ៊ីមែលថា វិទ្យុអាស៊ីសេរី មិនមានទំនាក់ទំនងអ្វីតទៅទៀតទេ ជាមួយនឹងអ្នកយកព័ត៌មានទាំងពីរនាក់នេះ ចាប់តាំងពីការបិទការិយាល័យរបស់ខ្លួនក្នុងទីក្រុងភ្នំពេញកាលពីថ្ងៃទី១២ ខែកញ្ញាមកម្ល៉េះ។
VOA មិនទាន់អាចទាក់ទងលោក អ៊ួន ឈិន ដើម្បីស្នើសុំការអធិប្បាយណាមួយបានទេ អំពីរូបថតទាំងនេះ ដោយសារលោក កំពុងស្ថិតក្នុងមន្ទីរឃុំឃាំងនៅឡើយ។
រូបថតអាសអាភាសទាំងនេះ បានលេចឡើង មិនយូរប៉ុន្មាន ក្រោយពីការចាប់ខ្លួនអតីតអ្នកយកព័ត៌មានអាស៊ីសេរីទាំងពីរនាក់នេះ។ គេហទំព័រSwift News ដែលគាំទ្ររដ្ឋាភិបាល បានផ្សព្វផ្សាយរូបថតទាំងនេះទាំងស្រុងដោយឥតកែប្រែអ្វីទាំងអស់ ទោះបីជា ក្រោយមក សារព័ត៌មាននេះ បានដករូបថតទាំងនេះ ចេញពីគេហទំព័ររបស់ខ្លួនវិញក៏ដោយ។ ប៉ុន្តែ រូបថតទាំងនេះ នៅតែមានលើទំព័រFacebook របស់សារព័ត៌មាននេះនៅឡើយ។
អង្គភាពព័ត៌មាន Fresh News នៅតែដាក់បង្ហាញរូបថតអាសអាភាសទាំងនេះ លើគេហទំព័ររបស់ខ្លួន។
ស្ថាបនិកនិងជានាយកប្រតិបត្តិអង្គភាពព័ត៌មាននេះ គឺលោក លឹម ជាវុត្ថា បានថ្លែងការពារការសម្រេចចិត្តរបស់លោក ក្នុងការផ្សព្វផ្សាយរូបថតទាំងនេះ ដោយនិយាយថា ការសម្រេចចិត្តរបស់លោកក្នុងការធ្វើឲ្យព្រាល មើលមិនឃើញអង្គជាតិរបស់តួសម្ដែងវីដេអូអាសអាភាសនេះ បង្ហាញថា លោកបានធ្វើតាមក្រមសីលធម៌វិជ្ជាជីវៈហើយ។
លោកបានមានប្រសាសន៍ថា៖ «ខ្ញុំក្នុងនាមយើងជាអង្គភាពព័ត៌មាន ហើយខ្ញុំបានទទួលព័ត៌មានពីមន្រ្តីរដ្ឋាភិបាល ខាងផ្នែកសមត្ថកិច្ចជំនាញទៀត អញ្ចឹងខ្ញុំអត់មានអីត្រូវថា ជារឿងផ្សាយខុសណា គឺជា រឿងរបស់សមត្ថកិច្ចដែលគាត់ផ្តល់ជូន»។
អ្នកសារព័ត៌មានក្នុងស្រុក យ៉ាងតិចណាស់ ៨០នាក់ បានផ្ដិតមេដៃលើញត្តិមួយ ដោយបានអំពាវនាវឲ្យមានការដោះលែងលោក យាង សុធារិន ហៅ យាង សុជាមេត្តា ដែលធ្លាប់ធ្វើជានិពន្ធនាយក និងជាអ្នកសម្របសម្រួលការិយាល័យអាស៊ីសេរីក្នុងទីក្រុងភ្នំពេញ និងលោក អ៊ួន ឈិន ដែលជាអ្នកយកព័ត៌មានវីដេអូជើងចាស់មួយរូបដែលទទួលបានការគោរពជាច្រើនផងដែរ។
ទាំងក្លឹបអ្នកកាសែតកម្ពុជា ទាំងសហភាពសហព័ន្ធអ្នកសារព័ត៌មានកម្ពុជា សុទ្ធតែដកខ្លួន មិនធ្វើសេចក្ដីថ្លែងការណ៍ជាសាធារណៈ ដើម្បីការពារអ្នកយកព័ត៌មានអាស៊ីសេរីទាំងពីរនាក់នេះ។
ក្នុងនាមជាប្រធានសហភាពសហព័ន្ធអ្នកសារព័ត៌មានកម្ពុជា និងជាអនុរដ្ឋលេខាធិការក្រសួងមហាផ្ទៃ ព្រមទាំងជាប្រធានផ្នែកព័ត៌មានប្រចាំបណ្ដាញទូរទស្សន៍ CTN ផងនោះ លោក ហ៊ុយ វណ្ណៈ មានគោលជំហរពិសេសមួយចំពោះព្រឹត្តិការណ៍ទាំងនេះ។
លោក វណ្ណៈ ដែលមានប្រសាសន៍ថា លោកក៏ផ្ដល់ប្រឹក្សាក្រៅផ្លូវការដល់អង្គភាពSwift News និងFresh News អំពីយុទ្ធសាស្ត្ររៀបចំខ្លឹមសារព័ត៌មានផងដែរនោះ បានបញ្ជាក់ថា លោកបានព្យាយាមនៅអព្យាក្រឹត្យ ដោយការផ្ដល់ការគាំទ្រផ្លូវច្បាប់ជាជាងផ្ដល់ការយល់ឃើញផ្ទាល់ខ្លួន។
ប៉ុន្តែ នៅពេលត្រូវចោទសួរម្ដងហើយម្ដងទៀត លោក វណ្ណៈ បានរំលឹកឡើងវិញពីការចាប់អារម្មណ៍ខ្លះៗរបស់លោកចំពោះអតីតសិស្សរបស់លោកគឺលោក អ៊ួន ឈិន។
លោក ហ៊ុយ វណ្ណៈ មានប្រសាសន៍ថា «លោក អ៊ួន ឈិន មិនសូវនិយាយច្រើនទេ។ គាត់ទន់ភ្លន់ណាស់ ប៉ុន្តែ ដូចខ្ញុំនិយាយអញ្ចឹង ពីមុននិងឥឡូវ ខុសគ្នា ដូចអ្នកយល់ច្រឡំ អំពី ប៉ុល ពត អញ្ចឹង»។ លោក វណ្ណៈ បានគូសបញ្ជាក់ថា អតីតមេដឹកនាំខ្មែរក្រហម ជារឿយៗ បង្ហាញមុខជាមនុស្សស្លូតបូត និងញញឹមញញែម ទោះបីជារបបរបស់គេ បានអនុវត្តគោលនយោបាយ ដែលត្រូវបានគេស្ដីបន្ទោសចំពោះការស្លាប់ប្រជាជនជិត២លាននាក់ក្នុងអំឡុងចុងទសវត្សរ៍១៩៧០ក៏ដោយ។
លោក ហ៊ុយ វណ្ណៈ មានប្រសាសន៍ថា៖ «ខ្ញុំពិបាកក្នុងការនិយាយហើយវិនិច្ឆ័យបុគ្គលិកលក្ខណៈរបស់គាត់ណាស់»។
ពាក់ព័ន្ធនឹងក្រមសីលធម៌ក្នុងការផ្សព្វផ្សាយរូបថតស្រាតវិញ លោក ហ៊ុយ វណ្ណៈ មានប្រសាសន៍ថា លោកមិនបានវិនិច្ឆ័យជាលក្ខណៈផ្ទាល់ខ្លួនទេ ប៉ុន្តែ នៅពីក្រោយឆាក លោកបានប្រាប់អ្នកពាក់ព័ន្ធទាំងអស់ពីអ្វីដែលត្រូវ និងអ្វីដែលខុស។
លោក ហ៊ុយ វណ្ណៈ មានប្រសាសន៍ថា៖ «ខ្ញុំបានពន្យល់ពួកគេថា ព័ត៌មានដែលបែកធ្លាយ គឺជាតាក់តិចមួយ ប៉ុន្តែក្នុងនាមជាអ្នកកាសែត អ្នកត្រូវតែពិចារណាប្រកបដោយសីលធម៌ខ្ពស់ថាតើរឿងណាដែលអ្នកគួរតែផ្សព្វផ្សាយ ហើយក្រោយមក ពួកគេក៏សម្រេចទម្លាក់ចោលការសម្រេចចិត្តរបស់ពួកគេ»។
លោក ហ៊ុយ វណ្ណៈ មិនអាចផ្ដល់ការណែនាំច្បាស់លាស់ក្នុងនាមជាប្រធានសហភាពសហព័ន្ធអ្នកសារព័ត៌មានកម្ពុជា ទៅកាន់អ្នកសារព័ត៌មានអំពីរបៀបដែលពួកគេអាចគេចផុតពីការប្រព្រឹត្ត«ចារកម្ម» ក្រោមច្បាប់ដែលមានលក្ខណៈស្រពេចស្រពិលនេះបានទេ ប៉ុន្តែ លោកបានថ្លែងថា ពលរដ្ឋចាំបាច់ត្រូវតែដឹងពី«តម្លៃនិងក្របខ័ណ្ឌនៃសិទ្ធិរបស់ពួកគេ» ហើយត្រូវតែប្រយ័ត្នប្រយែង។
លោក វណ្ណៈ ដែលធ្លាប់ធ្វើការឲ្យអាស៊ីសេរីដែរនោះ មានប្រសាសន៍ថា៖ «ខ្ញុំព្យាយាមនិយាយច្បាស់ហើយថា ប្រសិនបើអ្នកចាត់ទុកថា ពួកគេទាំងពីរនាក់គឺជា អ្នកកាសែត អញ្ចឹង តើអ្នកសំអាងអីទៅការពារពួកគេ ដោយសារតែអាស៊ីសេរី បានបដិសេធថាពួកគេ មិនបានធ្វើការឲ្យអាស៊ីសេរីទៀតទេ។ អញ្ចឹង តើពួកគេកំពុងធ្វើការឲ្យនរណា?»
ពូថ្លៃរបស់លោក យាង សុធារិន គឺលោក លឹម ស៊ឹម មានប្រសាសន៍ថា ក្មួយប្រុសរបស់លោក បានឈប់បម្រើការឲ្យអាស៊ីសេរីតាំងពីមុនពេលមានការចាប់ខ្លួនម្ល៉េះ។ លោកថ្លែងបន្តថា ក្មួយរបស់លោក គ្រាន់តែទៅផ្ទះសំណាក់នោះ ដើម្បីធ្វើជាសាក្សីមើលគេចាប់ខ្លួនលោក អ៊ួន ឈិន តែប៉ុណ្ណោះ ប៉ុន្តែក្មួយរបស់លោក បែរជាត្រូវអាជ្ញាធរចាប់ខ្លួនដែរ។
លោកថ្លែងថា «ខ្ញុំអត់យល់អារឿងហ្នឹងដែរ»៕
ប្រែសម្រួលដោយ សាយ មុន្នី