ស្ថានីយ៍វិទ្យុអាស៊ីសេរីបានបដិសេធថា ខ្លួនមិនមានទំនាក់ទំនងអ្វីជាមួយនឹងអតីតអ្នកសារព័ត៌មានពីរនាក់ដែលត្រូវអាជ្ញាធរកម្ពុជាចាប់ខ្លួននោះទេ។
អតីតអ្នកសារព័ត៌មានវិទ្យុអាស៊ីសេរី ២នាក់គឺឈ្មោះ អ៊ួន ឈិន និងលោកយាង សុធារិន ហៅយាង សុជាមេត្តា ត្រូវបានប៉ូលិសឃាត់ខ្លួនកាលពីយប់ថ្ងៃអង្គារនៅរាជធានីភ្នំពេញ ដោយសង្ស័យថា បានរាយការណ៍ព័ត៌មានបញ្ជូនទៅស្នាក់ការកណ្តាលវិទ្យុអាស៊ីសេរីនៅសហរដ្ឋអាមេរិក។
លោក រ៉ូហ៊ីត មាហាចាន់ អ្នកនាំពាក្យវិទ្យុអាស៊ីសេរីប្រចាំនៅរដ្ឋធានីវ៉ាស៊ីនតោនបានបញ្ជាក់ប្រាប់VOAថា៖
«សូមបញ្ជាក់ឱ្យច្បាស់ថា [ពួកគេ]មិនមានទំនាក់ទំនងអ្វីជាកិច្ចសន្យា ឬអ្វីដទៃទៀតជាមួយនឹងវិទ្យុអាស៊ីសេរីក្នុងការផ្តល់សេវាព័ត៌មាន ឬសេវាអ្វីផ្សេងទៀតឡើយ»។
អតីតអ្នកសារព័ត៌មានទាំងពីរនាក់ក៏បានបដិសេធថា ពួកគេមិនបានបញ្ជូនព័ត៌មានទៅឲ្យវិទ្យុអាស៊ីសេរីនោះទេ។ ការណ៍ដែលពួកគេដំឡើងស្ទូឌីយោនៅក្នុងបន្ទប់សណ្ឋាគារមួយគឺ សម្រាប់បង្កើតអាជីវកម្មផលិតចម្រៀងខារ៉ាអូខេតែប៉ុណ្ណោះ។
លោក រ៉ូហ៊ីត មាហាចាន់ បានបន្ថែមថា វិទ្យុអាស៊ីសេរីនៅមិនទាន់ទទួលបានការចោទប្រកាន់ណាជាក់លាក់ពីរដ្ឋាភិបាលកម្ពុជានៅឡើយទេ ហើយបន្ថែមថា ស្ថានីយ៍វិទ្យុនេះកំពុងតែតាមដានមើលការវិវត្តសភាពការណ៍នេះ «ប្រកបដោយការព្រួយបារម្ភ»។
លោក ស៊ឹម វុទ្ធី ស្នងការរងនគរបាលរាជធានីភ្នំពេញទទួលផែនសន្តិសុខ បានប្រាប់អ្នកសារព័ត៌មានថា សមត្ថកិច្ចបានរកឃើញសម្ភារៈមួយចំនួន ដែលបង្ហាញថា អ្នកទាំងពីរនោះបានរាយការណ៍ព័ត៌មានទៅឲ្យវិទ្យុអាស៊ីសេរីនៅសហរដ្ឋអាមេរិកពិតមែន ប៉ុន្តែមិនបានផ្តល់ព័ត៌មានលម្អិតនោះទេ។
វិទ្យុអាស៊ីសេរីបានប្រកាសកាលពីដើមខែកញ្ញាថា ខ្លួនផ្អាកដំណើរការការិយាល័យព័ត៌មាននៅរាជធានីភ្នំពេញមួយរយៈទាំងបង្ខំ ហើយបានចោទថា រដ្ឋាភិបាលកម្ពុជាថា កំពុងធ្វើទុក្ខបុកម្នេញបណ្ដាញសារព័ត៌មានឯករាជ្យ និងគូបដិបក្ខនៅមុនការបោះឆ្នោតថ្នាក់ជាតិឆ្នាំ២០១៨។
ក្រោយការប្រកាសផ្អាកដំណើរការការិយាល័យនៅភ្នំពេញ ក្រសួងព័ត៌មានក៏បានប្រកាសថា អ្នកសារព័ត៌មានរបស់វិទ្យុអាស៊ីសេរីទាំងអស់នឹងត្រូវចាប់ខ្លួន ប្រសិនបើពួកគេនៅបន្តចុះយកព័ត៌មាន និងរាយការណ៍ពីប្រទេសកម្ពុជា។
