ចំនួនពលរដ្ឋខ្មែរដែលត្រូវបានអាជ្ញាធរសុខាភិបាលថៃ រកឃើញថាមានផ្ទុកវីរុសកូវីដ១៩ ក្នុងប្រទេសថៃ បានកើនឡើងដល់ ១០៨ នាក់ហើយ គិតត្រឹមយប់ថ្ងៃពុធ ទី៦ ខែមករានេះ។ នេះបើយោងតាមរបាយការណ៍បច្ចុប្បន្នភាពចុងក្រោយ ស្តីពីស្ថានភាពជំងឺកូវីដ១៩ ក្នុងប្រទេសថៃ ដែលចេញផ្សាយដោយក្រសួងសុខាភិបាលសាធារណ:របស់ប្រទេសថៃ។
របាយការណ៍នោះបង្ហាញថា គិតចាប់ពីថ្ងៃទី៨ ខែធ្នូ ឆ្នាំ២០២០ រហូតដល់ថ្ងៃទី៦ ខែមករា ឆ្នាំ២០២១នេះ ប្រទេសថៃមានចំនួនអ្នកឆ្លងជំងឺកូវីដ១៩ សរុបជាង ៩ ពាន់ករណី ដែលភាគច្រើនបំផុតជាពលរដ្ឋថៃ ដែលមានចំនួនជាង ៥ ពាន់នាក់។ ប្រទេសថៃមានចំនួនអ្នកស្លាប់ ដោយសារជំងឺនេះសរុបចំនួន ៦៦នាក់។
ចាប់តាំងពីការផ្ទុះការឆ្លងរាលដាលចូលសហគមន៍ក្នុងខេត្ត Samut Sakhon របស់ថៃ កាលពីពេលថ្មីៗនេះមក អាជ្ញាធរថៃបានរាយការណ៍ករណីឆ្លងថ្មីជាង ៧០០ ករណី កាលពីថ្ងៃច័ន្ទ និងជាង ៥០០ ករណីថ្មីទៀតនៅថ្ងៃអង្គារ ដោយភាគច្រើនកើតឡើងក្នុងចំណោមពលករចំណាកស្រុក ដែលចូលទៅធ្វើការក្នុងប្រទេសថៃ។ នេះបើយោងតាមសេចក្តីរាយការណ៍ព័ត៌មានក្នុងស្រុកថៃដោយកាសែត Bangkok Post។
របាយការណ៍របស់ក្រសួងសុខាភិបាលសាធារណ:ថៃ ឲ្យដឹងថា ក្រៅពីពលរដ្ឋខ្មែរចំនួន ១០៨ នាក់ ក៏មានពលរដ្ឋភូមាចំនួន ៦១៩ នាក់ ឥណ្ឌា ៨២ នាក់ និងពលរដ្ឋផ្សេងៗចំនួនជាង ៩២០ នាក់ដែរ ដែលត្រូវបានធ្វើតេស្តឃើញវិជ្ជមានជំងឺកូវីដ១៩។ ក៏ប៉ុន្តែ របាយការណ៍នេះ មិនបានបញ្ជាក់ថា តើពលរដ្ឋកម្ពុជាទាំង ១០៨ នាក់ដែលឆ្លងជំងឺកូវីដ១៩ នោះ ជាពលករចំណាកស្រុកដែលកំពុងធ្វើការនៅក្នុងប្រទេសថៃ ឬយ៉ាងណានោះទេ។
រដ្ឋាភិបាលកម្ពុជាបានអំពាវនាវឲ្យពលករខ្មែរដែលកំពុងធ្វើការនៅក្នុងប្រទេសថៃ បន្តស្នាក់នៅទីនោះតទៅទៀត និងអនុវត្តតាមវិធានការបង្ការការឆ្លងជំងឺកូវីដ១៩ របស់អាជ្ញាធរថៃ ទោះបីជាពលករជាច្រើននៅក្នុងប្រទេសនោះ បានសម្តែងការព្រួយបារម្ភនិងចង់វិលត្រឡប់មកកម្ពុជាវិញក៏ដោយ៕