ពេលដែលអ្នកឃើញក្រុមមនុស្សកាន់បដាគ្រវីបក់ចុះឡើង នៅក្នុងពេលដែលគណបក្សនយោបាយធ្វើមហាសន្និបាតជាតិ ដើម្បីសម្រេចជ្រើសរើសបេក្ខជនសម្រាប់តំណែងប្រធានាធិបតី គឺពួកគេជាប្រតិភូដែលមកពីតាមរដ្ឋនានា។
ភាគច្រើននៃប្រតិភូទាំងនេះគឺមកពីថ្នាក់ស្រុកឬសង្កាត់នីមួយៗតំណាងឲ្យមណ្ឌលក្នុងរដ្ឋ។ ពួកគេគឺជាអ្នកស្មោះត្រង់និងស្ម័គ្រចិត្តរបស់គណបក្ស សម្រាប់ធ្វើការងារដើម្បីជួយសហគមន៍។
ប្រតិភូសភាប្រចាំមណ្ឌលនិងគណៈកម្មាធិការកណ្តាលនៃគណបក្សប្រចាំរដ្ឋ មានភារៈកិច្ចរៀបរំផែនការនិងចូលរួមកិច្ចប្រជុំផ្តល់ព័ត៌មាននៅទូទាំងតំបន់និ ងធ្វើការជាមួយគ្នានៅទូទាំងរដ្ឋ ដើម្បីតំណាងសហគមន៍របស់ពួកគេទៅលើកម្មវិធីនយោបាយរបស់គណបក្ស នៅក្នុងរដ្ឋនិងជ្រើសរើសថ្នាក់ដឹកនាំគណបក្សប្រចាំរដ្ឋផងដែរ។
នៅក្នុងមណ្ឌលនីមួយៗមានប្រតិភូសភាចំនួន ១៤ នាក់ ដែលមានស្ត្រី ៧ រូបនិងបុរស ៧ រូប។ ពួកគេត្រូវបានជ្រើសរើសតាមរយៈការបោះឆ្នោតដែលបើកឲ្យដល់អ្នកចុះឈ្មោះជាអ្នកគាំទ្រគណបក្សនយោបាយនីមួយៗ នៅក្នុងរដ្ឋ។ នេះបើតាមលក្ខខន្តិកៈរបស់គណបក្ស។
នៅក្នុងឆ្នាំ ២០២១ នេះ មានសមាជិកសហគមន៍ខ្មែរអាមេរិកាំងពីរនាក់កំពុងឈរជាប្រតិភូសភាប្រចាំមណ្ឌលទី ៧០ របស់គណបក្សប្រជាធិបតេយ្យក្នុងរដ្ឋកាលីហ្វញ៉ា។ មណ្ឌលនេះគ្របដណ្តប់លើក្រុងCatalina Island, Long Beach, San Pedro និង Signal Hill និងមានបេក្ខជនចំនួន ៤៥ នាក់កំពុងប្រកួតប្រជែង។
កញ្ញា Vanndearlyn Vong អាយុ ២១ ឆ្នាំកំពុងឈរឈ្មោះជាថ្មី ក្រោយពីបានជាប់មួយអណត្តិកន្លងមកនេះ។ កញ្ញាត្រូវបានជ្រើសរើសដំបូងសម្រាប់ការងារនេះក្នុងឆ្នាំ ២០១៩។
កញ្ញា Vanndearlyn បានបញ្ជាក់ក្នុងបទសម្ភាសជាមួយនឹងវីអូអេថា៖ «ខ្ញុំមានចិត្តចង់ទាមទារការថែរក្សាសុខភាពសម្រាប់មនុស្សទាំងអស់ កិច្ចព្រមព្រៀងការពារបរិស្ថានថ្មី ដែលនាំឲ្យយើងឈប់អាស្រ័យលើឋាមពលផូស៊ីល និងបង្កើតការងារថ្មីដែលល្អចំពោះបរិស្ថាន ក៏ដូចជាលុបចោលប៉ូលិសអន្តោប្រវេសន៍ ព្រោះវាជាប្រព័ន្ធដែលបណ្តេញបងប្អូនរបស់យើងដោយមិនត្រឹមត្រូវ»។
កញ្ញា Vanndearlyn តំណាងឲ្យសំឡេងចម្រើននិយមនៅក្នុងគណបក្សប្រជាធិបតេយ្យ ហើយនៅក្នុងពេលមហាសន្និបាតថ្នាក់ជាតិរបស់គណបក្ស កាលពីខែសីហា ឆ្នាំ២០២០ គឺបានចូលរួមជាប្រតិភូគាំទ្រសមាជិកព្រឹទ្ធសភាប្រចាំរដ្ឋV ermont គឺលោក Bernie Sanders សម្រាប់បេក្ខជនប្រធានាធិបតីរបស់គណបក្ស ប៉ុន្តែលោកមិនបានជោគជ័យទេដោយជ័យជម្នះបានទៅលោក Joe Biden អតីតអនុប្រធានាធិបតី ដោយសារលោកទទួលបានសំឡេងប្រតិភូច្រើនជាង។
ព័ត៌មានទាក់ទង៖ ខ្មែរ-អាមេរិកាំងទី១ គឺអ្នកស្រី ស៊ូលី សារ៉ូ បានស្បថចូលកាន់តំណែងក្រុមប្រឹក្សាក្រុងឡុងប៊ិច
តាមរយៈបទពិសោធនេះ កញ្ញាV anndearlyn កំពុងសំឡឹងយកតួនាទីជានាយកគណៈកម្មការនៃក្រុមប្រតិភូសភានេះ ដោយប្រកួតនឹងបេក្ខជន ៧ នាក់ផ្សេងទៀត។
កញ្ញាលើកទឹកចិត្តឲ្យយុវជនដទៃទៀតចូលរួមសកម្មភាពនយោបាយដោយចាត់ទុកថា វាប្រៀបបីដូចជាការស្ម័គ្រចិត្តនៅកម្រិតអង្គការស្ម័គ្រចិត្តថ្នាក់មូលដ្ឋានដែរ ដោយគ្រាន់តែត្រូវមានគោលការណ៍ណាដែលប្រតិភូចង់បានបញ្ចូលក្នុងគោលនយោបាយ និងមិនត្រូវការបទពិសោធនិងចំណេះដឹងខ្ពង់ខ្ពស់ទេ។
ជានិស្សិតឯកទេសវិទ្យាសាស្ត្រនយោបាយឆ្នាំបញ្ចប់នៅសាកលវិទ្យាល័យរដ្ឋកាលីហ្វញ៉ាប្រចាំនៅទីក្រុងឡុងប៊ិច កញ្ញា Vanndearlyn Vong ចង់បន្តការសិក្សារហូតដល់ថ្នាក់អនុបណ្ឌិត ប៉ុន្តែក៏នៅតែធ្វើសកម្មភាពដើម្បីជួយសហគមន៍។
«ខ្ញុំមើលឃើញថាវាជាមូលដ្ឋាន សម្រាប់ខ្ញុំរៀនសូត្រនិងចូលរួមខាងផ្នែកនយោបាយ ទោះក្នុងនាមជាប្រតិភូនៅកម្រិត ១ ទៀត ឬជាមន្ត្រីជាប់ឆ្នោត គឺខ្ញុំមិនមានផែនការនៅឡើយទេ ប៉ុន្តែខ្ញុំចង់នៅជួយការងារនិងបន្តរៀនសូត្រ ដែលខ្ញុំអាចយកចំណេះដឹង ដើម្បីបម្រើសហគមន៍»។
រដ្ឋកាលីហ្វញ៉ាមានមណ្ឌលសភាចំនួន ៨០ និងជាមូលដ្ឋានដ៏រឹងមាំរបស់គណបក្សប្រជាធិបតេយ្យ។ ពលរដ្ឋខ្មែររស់នៅរដ្ឋនេះច្រើនជាងគេបំផុតក្នុងសហរដ្ឋអាមេរិក ដោយមានចំនួនប្រហែល ៥០.០០០ នាក់រស់នៅក្នុងទីក្រុង Los Angeles។
រូបឯកសារ៖ លោក ឆល សុង ដែលបានជួយដល់យុទ្ធនាការឃោសនារបស់អ្នកស្រី ស៊ូលី សារ៉ូ (Suely Saro) បេក្ខជនខ្មែរអាមេរកាំងសម្រាប់តំណែងចៅសង្កាត់លេខ៦ នៅទីក្រុងឡុងប៊ិច រដ្ឋកាលីហ្វ័រញ៉ា។ (រូបថតដោយ Suely Saro)
លោក ឆល សុង គឺជាបេក្ខជន១រូបទៀតសម្រាប់មណ្ឌលទី ៧០ នេះដែរ។ លោកបានបម្រើការងារសហគមន៍ជាង ៣០ ឆ្នាំ។ បច្ចុប្បន្នលោកគឺជាអ្នកផ្តល់ប្រឹក្សាខាងស្វែងរកការងារនៅសមាគមខ្មែរនៅទ្វីបអាមេរិក។
លោក ឆល សុង បានបញ្ជាក់ប្រាប់វីអូអេថា៖ «ជំហររបស់ខ្ញុំគឺត្រង់ស្ថិតលើការតស៊ូមតិ ដើម្បីយកភាពយុត្តិធម៌នៅក្នុងសហគមន៍តម្លាភាពសម្រាប់សហគមន៍សមភាពសមធម៌ ផ្នែកផ្ទះសម្បែងសមរម្យហើយក៏ដូចជាខាងសុខាភិបាល ដើម្បីយកមកបម្រើប្រជាពលរដ្ឋយើងត្រង់ទៅមុខ»។
លោក ឆល សុង រៀបរាប់ពីការងារកន្លងមកដែលលោកបានចូលរួមគឺការដឹកនាំសកម្មភាពឃោសនាដើម្បីបោះឆ្នោតជ្រើសរើសអ្នកស្រី ស៊ូលី សារ៉ូជា សមាជិកក្រុមប្រឹក្សាទីក្រុងឡុងប៊ិចដំបូង ដែលចេញពីសហគមន៍ខ្មែរអាមេរិកាំងការលុបបំបាត់ការកំណត់ព្រំដែនបោះឆ្នោត ដោយពុះជ្រែកសហគមន៍ខ្មែរជាច្រើនផ្នែកនិងការជួយឲ្យកញ្ញា Vanndearlyng Vong បានជាប់ឆ្នោតជាប្រតិភូរបស់គណបក្សប្រជាធិបតេយ្យមួយអណត្តិមកនេះ។
លោក ឆល សុង បានបន្ថែមថា៖ «អីចឹងដោយសារតែអ្វីដែលយើងបានរៀបចំហ្នឹង ហើយបានជាខ្ញុំយល់ឃើញថានេះ គឺជាឱកាសដ៏ល្អមួយដែលយើងអាចពង្រឹងនិងពង្រីក នៅក្នុងផ្នែកនយោបាយដើម្បីយកមកបម្រើស្ថាប័នរបស់យើង ផ្នែកខាងក្រោមហ្នឹង ឲ្យបងប្អូនយើងបានយល់កាន់តែច្រើនទៅទៀត ពីព្រោះគោលជំហររបស់ខ្ញុំ គឺខ្ញុំចង់ត្រួសត្រាយផ្លូវឲ្យប្អូនៗជំនាន់ក្រោយ ឲ្យមានការងាយស្រួលដល់ពេលណាពួកគាត់ត្រៀមខ្លួនរួចរាល់»។
ដើម្បីចូលរួមជ្រើសរើសប្រតិភូរបស់គណបក្សប្រជាធិបតេយ្យ នៅឆ្នាំ ២០២១ នេះ បានពលរដ្ឋត្រូវចុះឈ្មោះជាអ្នកបោះឆ្នោតរបស់គណបក្សឲ្យបានត្រឹម ថ្ងៃចន្ទ ទី១១ ខែមករា។ នេះបើតាមគេហទំព័ររបស់គណបក្សប្រចាំរដ្ឋកាលីហ្វញ៉ា។
បន្ទាប់ពីនេះរហូតដល់ថ្ងៃទី១៨ ខែមករា ពួកគេនឹងទទួលបានសន្លឹកឆ្នោតតាមប្រៃសណីយ៍ដែលអាចផ្ញើទៅប្រអប់សំបុត្ររបស់គណបក្សនៅទីក្រុង Los Angeles ឬទីក្រុង Sacramento នៃរដ្ឋកាលីហ្វញ៉ា ឲ្យបានត្រឹមថ្ងៃទី២៧ ខែមករានេះ៕