រដ្ឋធានីវ៉ាស៊ីនតោន — អ្នកស្រី ស៊ូលី សារ៉ូ (Suely Saro) បេក្ខជនខ្មែរអាមេរិកាំងទទួលបានសំឡេងគាំទ្រដ៏ច្រើនលើសលប់លើគូប្រជែងគឺលោក ឌី អែនឌ្រូ (Dee Andrews) សម្រាប់តំណែងចៅ សង្កាត់លេខ៦ នៃទីក្រុងឡុងប៊ិចរដ្ឋកាលីហ្វ័រញ៉ាក្នុងការបោះឆ្នោត កាលពីថ្ងៃអង្គារ ទី៣ខែវិច្ឆិកា។
លោក ឌី អែនឌ្រូ បច្ចុប្បន្នជាចៅសង្កាត់លេខ៦ និងជាចៅហ្វាយរងក្រុង បានកាន់តំណែងរយៈពេល ១៣ឆ្នាំមកហើយ។ លោកព្យាយាមបន្តតំណែងមួយអាណត្តិទៀត។
លទ្ធផលឆ្នោតបឋមបង្ហាញថា អ្នកស្រី ស៊ូលី សារ៉ូ ទទួលបានសន្លឹកឆ្នោតជាង ៥.៦០០សំឡេង ដែលត្រូវជាជាង៥៩ ភាគរយ ទល់នឹងលោក ឌី អែនឌ្រូ ដែលទទួលបានសន្លឹកឆ្នោតជិត ៣.៩០០ សំឡេង ដែលត្រូវជាជិត ៤១ ភាគរយ។ នេះបើតាមគេហទំព័ររបស់ស្មៀនក្រុងឡូសអាន់ជឺឡេស (Los Angeles)។
បើលទ្ធផលនេះនៅដដែលគឺអ្នកស្រីនឹងក្លាយជាខ្មែរទី ១ ដែលនឹងកាន់តំណែងក្រុមប្រឹក្សាក្រុងឡុងប៊ិចដែលជាទីមានពលរដ្ឋខ្មែររស់នៅច្រើនជាងគេបំផុតក្រៅពីប្រទេសកម្ពុជា។
អ្នកស្រី ស៊ូលី សារ៉ូ ដែលមានអាយុ៣៩ ឆ្នាំបានធ្វើយុទ្ធនាការដោយឈរលើការបង្កើតការងារលំនៅដ្ឋានសន្តិសុខនិងសុខភាពអនាម័យសម្រាប់ពលរដ្ឋនៅក្នុងសង្កាត់ដែលអ្នកស្រីចាត់ទុកថាមិនទទួលបានសេវាត្រឹមត្រូវនិងមិនមានតំណាងបានល្អជាច្រើនឆ្នាំ។
អ្នកស្រីស៊ូលី បានប្រកាសតាមទំព័រហ្វេសប៊ុកក្រោយពីទទួលបានលទ្ធផលឆ្នោតថា៖
«យប់នេះសហគមន៍យើងបានបោះឆ្នោតជ្រើសរើសមេដឹកនាំថ្មីហើយខ្ញុំប្តេជ្ញាថានឹងធ្វើការបម្រើការចង់បានរបស់ពលរដ្ឋនិងលើកកម្ពស់ជីវភាពនិងការងារក្នុងសង្កាត់លេខ៦ ដោយគ្មាននឿយហត់។ គោលបំណងរបស់ខ្ញុំគឺដើម្បីដោះស្រាយបញ្ហាលំបាកដែលសហគមន៍យើងជួបប្រទះដើម្បីធ្វើឲ្យប្រសើរឡើងនូវគុណភាពជីវិតសម្រាប់អ្នករាល់គ្នា»។
អ្នកស្រី ស៊ូលី បានលើកឡើងថាមានមនុស្សជាច្រើនចង់ឲ្យអ្នកស្រីធ្លាក់ចេញពីការបោះឆ្នោតនេះដោយសារតែគេគិតថាស្ត្រីមិនមែនស្បែកសនិងជាម្តាយ មិនអាចជម្នះឧបសគ្គនានាក្នុងការងារបានឡើយ។
អ្នកស្រីបានបន្ថែមថា៖ «យប់នេះយើងបង្ហាញថាពួកគេខុសហើយ។ ប៉ុន្តែអ្វីដែលសំខាន់ជាងនេះគឺយើងបានបង្ហាញឲ្យឃើញថាការគិតវិជ្ជមានគឺនឹងឈ្នះ ការផ្លាស់ប្តូរអាចកើតឡើងនិងអ្វីក៏អាចកើតឡើងបានដែរ»។
សង្កាត់លេខ ៦ ជាតំបន់ដែលមានអាយុកាលមធ្យមទាបនិងអត្រានៃភាពក្រីក្រខ្ពស់នៅក្នុងក្រុងឡុងប៊ិច។ នេះបើតាមការសិក្សារបស់មជ្ឈមណ្ឌលសុខភាពទីក្រុងឡុងប៊ិច (Long Beach Memorial Medical Center) ក្នុងឆ្នាំ ២០១៩។ ការណ៍នេះបានដឹងបន្ថែមតាមរយៈការឆ្លងជំងឺកូវីដ១៩ដែលមានអត្រាអ្នកឆ្លងជាង ១.៧០០ នាក់ ក្នុងចំណោមពលរដ្ឋ១០ ម៉ឺននាក់។ នេះបើតាមទិន្នន័យរបស់សាលាក្រុងឡុងប៊ិចដែលចងក្រង ដោយកាសែតឡុងប៊ិចប៉ុស្តិ៍។
ទីក្រុងឡុងប៊ិចមានពលរដ្ឋខ្មែររស់នៅប្រមាណជាង៥០.០០០នាក់ដែលភាគច្រើនបានរត់ភៀសខ្លួនចេញពីការគ្រប់គ្រងនៃរបបកុម្មុយនីស្តខ្មែរក្រហមនិងក្រោយពីរបបនេះបានដួលរលំក្នុងឆ្នាំ១៩៧៩។ បើទោះបីជារស់នៅក្នុងទីក្រុងនេះជាច្រើនទសវត្សរ៍ក៏ពលរដ្ឋកម្ពុជាមិនដែលបានជ្រើសរើសតំណាងរបស់ខ្លួនសម្រាប់ក្រុមប្រឹក្សាក្រុងទេ។ ពលរដ្ឋកម្ពុជាដំបូងដែលបានឈរឈ្មោះគឺអ្នកស្រី Sandy Blankenship ដែលបានឈរឈ្មោះនៅឆ្នាំ១៩៩៦ សម្រាប់តំណែងសង្កាត់លេខ ៤ ប៉ុន្តែមិនបានជោគជ័យ។
លោក ឆល សុង ដែលបានជួយដល់យុទ្ធនាការឃោសនារបស់អ្នកស្រីស៊ូលី បានបញ្ជាក់ថា៖
«ការពិតទៅយើងមានក្តីរំភើបអត់ឧបមាព្រោះនេះជាលើកទី ១ដែលយើងបានជ្រើសរើសកូនខ្មែរបណ្ឌិតស៊ូលី សារ៉ូ ដើម្បីតំណាងសម្រាប់សង្កាត់លេខ ៦»។
លោក ឆល សុង ជឿជាក់ថា អ្នកស្រីស៊ូលី នឹងអាចដោះស្រាយបញ្ហាប្រឈមនៅក្នុងសង្កាត់បាន។ «អ្វីដែលគាត់បានសន្យាជាមួយប្រជាពលរដ្ឋនៅក្នុងសហគមន៍នៅក្នុងសង្កាត់ គឺជាកិច្ចសន្យាមួយជាមួយប្រជាពលរដ្ឋដែលគាត់ត្រូវដោះស្រាយ»។
លោក ឌី អែនឌ្រូមិនបានសរសេរសារអ្វីលើទំព័រហ្វេសប៊ុកទេក្រោយពីលទ្ធផលឆ្នោត។ រីឯក្រុមយុទ្ធនាការរបស់លោកក៏មិនបានឆ្លើយតបដែរនៅពេលដែលវីអូអេទាក់ទង។
អ្នកស្រី ស៊ូលីចូលរួមប្រកួតក្នុងនាមជាបេក្ខជនមិនចំណុះគណបក្សណាទេប៉ុន្តែអ្នកស្រីទទួលបានការគាំទ្រជាច្រើនពីមន្ត្រីគណបក្សប្រជាធិបតេយ្យក្នុងនោះមានលោកអាឡាំង ឡូវឹនសល(Alan Lowenthal) អ្នកតំណាងរាស្ត្រសហរដ្ឋអាមេរិកប្រចាំមណ្ឌលទី៤៧ នៃរដ្ឋកាលីហ្វញ៉ាដែលក្នុងនោះមានទីក្រុងឡុងប៊ិចផងដែរ។
ដោយឡែកលោក ឌី អែនឌ្រូទទួលបានការគាំទ្រពីលោកRobert Garcia ចៅហ្វាយក្រុងឡុងប៊ិច។ ប៉ុន្តែនៅពេលនេះលោកចៅហ្វាយក្រុងគឺជាអ្នកដែលស្ថិតក្នុងចំណោមអ្នកដែលអបអរសាទរអ្នកស្រីស៊ូលី មុនគេ។
អ្នកស្រីស៊ូលី សារ៉ូ បានកើតនៅជំរំជនភៀសខ្លួនម៉ៃរូតតាមបណ្តោយព្រំដែនកម្ពុជា-ថៃមុននឹងក្រុមគ្រួសារទទួលបានសិទ្ធិមកនៅសហរដ្ឋអាមេរិកក្នុងឆ្នាំ១៩៨២។ អ្នកស្រី មានសញ្ញាបត្រអនុបណ្ឌិតខាងផ្នែករដ្ឋបាលសាធារណៈពីសាកលវិទ្យាល័យរដ្ឋកាលីហ្វ័រញ៉ា ប្រចាំនៅទីក្រុងឡុងប៊ិចនិងបណ្ឌិតផ្នែកអប់រំសិក្សាធិការពីសាកលវិទ្យាល័យឡាវែន៕
