រដ្ឋមន្ត្រីការបរទេសកម្ពុជាលោក សុខ ចិន្តាសោភា បានចូលរួមប្រជុំមហាសន្និបាតអង្គការសហប្រជាជាតិ លើកទី ៧៩ ក្រោមមូលបទ «ការមិនទុកនរណាម្នាក់ចោល» និងកិច្ចប្រជុំកំពូលស្តីពី «អនាគត» នៅទីក្រុងញូវយ៉ក សហរដ្ឋអាមេរិក ដែលប្រព្រឹត្តទៅចាប់ពីថ្ងៃទី ២២ ដល់ថ្ងៃទី ៣០ ខែកញ្ញា ឆ្នាំ ២០២៤។
កិច្ចប្រជុំកំពូលស្តីពី «អនាគត» នឹងបើកផ្លូវឱ្យរដ្ឋជាសមាជិករបស់អង្គការសហប្រជាជាតិ (អ.ស.ប.) ធ្វើការរួមគ្នាដើម្បីលើកស្ទួយសន្តិភាព ការអភិវឌ្ឍប្រកបដោយចីរភាព និងសេចក្តីថ្លៃថ្នូររបស់មនុស្ស ជាតិសម្រាប់មនុស្សជំនាន់បច្ចុប្បន្ន និងទៅថ្ងៃអនាគត។
សាស្ត្រាចារ្យវិទ្យាសាស្ត្រនយោបាយ លោក ឯម សុវណ្ណារ៉ា ថ្លែងថា ការចូលរួមរបស់រដ្ឋមន្ត្រីក្រសួងការបទេស លោក សុខ ចិន្តាសោភា ក្នុងមហាសន្និបាតអង្គការសហប្រជាជាតិ និងកិច្ចប្រជុំកំពូលផ្សេងទៀត នៅទីក្រុងញូវយ៉ក សហរដ្ឋអាមេរិក គឺជានយោបាយការទូតរបស់ប្រទេសជាសមាជិក។
បើតាមលោក ឯម សុវណ្ណារ៉ា បើសិនជារដ្ឋមន្ត្រីក្រសួងការបរទេសកម្ពុជា ដឹកនាំកិច្ចការងារនេះបានល្អ នោះវានឹងជួយពង្រីកសកម្មភាព និងមុខមាត់របស់រដ្ឋាភិបាលកម្ពុជា។
លោកប្រាប់វីអូអេថា៖ «សហគមន៍អន្តរជាតិ ឬមតិអន្តរជាតិ គេអាចអង្កេតតាមដានមើលអំពីខ្លឹមសារឬជំហរនៃការថ្លែងរបស់គាត់នៅក្នុងវេទិការអន្តរជាតិហ្នឹងដែរ»។
នៅក្នុងកិច្ចប្រជុំកំពូលស្តីពី«អនាគត» លោក សុខ ចិន្តាសោភា ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ កាលពីថ្ងៃទី ២៣ ខែកញ្ញា បានថ្លែងសុន្ទរកថា នូវគន្លឹះចំនួន ៥ ចំណុច ដែលរួមមាន៖ ទី ១ ភាពកាន់តែផុយស្រួយនៃសន្តិភាព និងសន្តិសុខអន្តរជាតិ។ ទី ២ តម្រូវការហិរញ្ញប្បទានសម្រាប់ការអភិវឌ្ឍប្រកបដោយចីរភាព។ទី ៣ ដំណោះស្រាយ និងហានិភ័យនៃការរីកចម្រើននៃវិទ្យាសាស្ត្រ បច្ចេកវិទ្យាឌីជីថល និងនវានុវត្តន៍ចំពោះការអភិវឌ្ឍមនុស្សជាតិ។ ទី ៤ សារៈ សំខាន់នៃការចូលរួមរបស់យុវជននៅក្នុងការអភិវឌ្ឍ និងទី ៥ សារៈសំខាន់នៃការផ្លាស់ប្តូរអភិបាលកិច្ចសាកលសម្រាប់សន្តិភាព ស្ថិរភាព និងការសម្រេចបាននូវគោលដៅអភិវឌ្ឍន៍ប្រកបដោយចីរភាព។ នេះបើយោងតាមក្រសួងការបរទេសកម្ពុជា។
នៅក្នុងមហាសន្និបាតនោះ កម្ពុជាក៏បានចូលរួមកិច្ចប្រជុំរដ្ឋមន្ត្រីការបរទេស G20 ហើយនឹងចូលរួមកិច្ចប្រជុំរដ្ឋមន្ត្រីអាស៊ាន-សម្ព័ន្ធប៉ាស៊ីហ្វីកលើកទី ៧ និងគ្រោងជួបពិភាក្សាទ្វេភាគីជាមួយអគ្គលេខាធិការអង្គការសហប្រជាជាតិ និងឥស្សរជនជាន់ខ្ពស់របស់បណ្តាប្រទេសនានា។
បើតាមសេចក្តីប្រកាសព័ត៌មានរបស់ក្រសួងការបរទេសកម្ពុជាកាលពីថ្ងៃទី ២៦ ខែកញ្ញា កិច្ចប្រជុំស្តីពី «អនាគត» ក្រោមប្រធានបទ «ដំណោះស្រាយពហុភាគីសម្រាប់ថ្ងៃស្អែកកាន់តែល្អប្រសើរ» ដែលធ្វើឡើងកាលពីថ្ងៃទី ២២ និង ២៣ ខែកញ្ញា ឆ្នាំ ២០២៤ នៅទីស្នាក់ការអង្គការសហប្រជាជាតិ ក្នុងទីក្រុងញូវយ៉ក គឺផ្តោតសំខាន់ទៅលើសារៈសំខាន់នៃការពង្រឹងពហុភាគីនិយមសម្រាប់ការថែរក្សាសន្តិភាព និងសន្តិសុខអន្តរជាតិ និងការសម្រេចបាននូវរបៀបវារៈឆ្នាំ ២០២៣ សម្រាប់ការអភិវឌ្ឍប្រកបដោយចីរភាព។
កិច្ចប្រជុំស្តីពី «អនាគត» បានពិភាក្សា និងបញ្ជាក់ពីការប្តេជ្ញាចិត្តចំពោះសកម្មភាពមួយចំនួន ដើម្បីរក្សាសន្តិភាព និងសន្តិសុខសកលលោក ប្រយុទ្ធប្រឆាំងនឹងផលប៉ះពាល់នៃការប្រែប្រួលអាកាសធាតុ ភាពក្រីក្រ វិសមភាព និងធានាថា ការរីកចម្រើននៃបច្ចេកវិទ្យានឹងគាំទ្រដល់កំណើនសេដ្ឋកិច្ចប្រកបដោយចីរភាព និងការអភិវឌ្ឍមនុស្សជាតិ។
លោក វណ្ណ ប៊ុនណា ប្រធានផ្នែកស្រាវជ្រាវ និងតស៊ូមតិនៃសមាគមបណ្តាញយុវជនកម្ពុជា ប្រាប់វីអូអេថា នៅពេលកម្ពុជាត្រូវបានអញ្ជើញឱ្យក្នុងចូលរួមកិច្ចប្រជុំស្តីពី «អនាគត» និងកិច្ចប្រជុំ «G20» គឺជាឱកាសសម្រាប់កម្ពុជាដើម្បីបង្ហាញមុខមាត់របស់ខ្លួន ជាពិសេសការភ្ជាប់ និងការបង្កើតចំណងការទូតជាមួយប្រទេសដទៃ។
លោកថ្លែងថា៖ «អ៊ីចឹងទាក់ទងវត្តមានរបស់កម្ពុជា វាផ្តល់ឱ្យប្រទេសកម្ពុជានូវវឌ្ឍនភាព ឬក៏តួអង្គបង្ហាញពីភាពសកម្ម ជាពិសេសនៅក្រោយពេលដែលកម្ពុជាបង្ហាញអំពីការមិនគាំទ្រលើការឈ្លានពានរបស់រុស្ស៊ីលើអ៊ុយក្រែនហ្នឹង [ដែល]បានធ្វើឱ្យកម្ពុជាបង្ហាញអំពី យុទ្ធសាស្ត្រការទូតបែបបទបែន ដែលជាផ្នែកមួយដែលសំខាន់ ដែលធ្វើឱ្យកម្ពុជាត្រូវបានគេមើលឃើញថា ជាតួអង្គមួយសំខាន់ដែលលែងនៅក្រោមរណបរបស់ពីណា ឬប្រទេសណាមួយ ដូចការដែលគេធ្លាប់គិតកន្លងទៅទេ»។
បើតាមលោក វណ្ណ ប៊ុនណា ការណ៍ដែលកម្ពុជាចាត់រដ្ឋមន្ត្រីការបរទេសទៅចូលរួមកិច្ចប្រជុំកំពូល ក្នុងនាមតំណាងនាយករដ្ឋមន្ត្រីកម្ពុជា គឺមិនមានអ្វីប្លែកនោះទេ ដោយសារការប្រជុំនោះផ្តោតត្រឹមកម្រិតរដ្ឋមន្ត្រី។
លោកបន្ថែមថា៖ «ទាក់ទងរដ្ឋមន្ត្រីការបរទេស ចូលរួមជំនួស អាហ្នឹងវាជារឿងធម្មតាក្នុងវិស័យការទូត។ ហើយមែនទែនទៅ បើសិនជាយើងមើលទាក់ទងនឹងកិច្ចប្រជុំហ្នឹងក៏ផ្តោតសំខាន់ខ្លាំងទៅលើឋានៈអ្នកចូលរួមជាកម្រិតរដ្ឋមន្ត្រី»។
គួរបញ្ជាក់ថា កាលពីឆ្នាំ ២០២២ កម្ពុជាបានខកខានចូលរួមកិច្ចប្រជុំកំពូល G20 នៅកោះបាលី ប្រទេសឥណ្ឌូណេស៊ី និងកិច្ចប្រជុំកំពូលនៃមេដឹកនាំសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) នៅប្រទេសថៃ ដោយសារអតីតនាយករដ្ឋមន្ត្រីកម្ពុជាលោក ហ៊ុន សែន ឆ្លងជំងឺកូវីដ១៩។ នាពេលនោះ អ្នកនយោបាយ និងអ្នកតាមដានសង្គមកម្ពុជាយល់ថា កម្ពុជាបាត់បង់ឱកាសដ៏កម្រមួយជាមួយប្រទេសមហាអំណាចទាំង ២០ និងបានខកខានក្នុងការទាញយកផលប្រយោជន៍ពីប្រទេសជឿនលឿនទាំងនោះ ជាពិសេសផ្នែកសេដ្ឋកិច្ច៕