ប្រជាពលរដ្ឋកម្ពុជាបានបោះឆ្នោតក្រុមប្រឹក្សាឃុំសង្កាត់នៅថ្ងៃអាទិត្យនេះ ដែលការបោះឆ្នោតលើកនេះអាចធ្វើឲ្យរង្គោះរង្គើដល់ការក្ដោបក្ដាប់អំណាចរបស់លោកនាយករដ្ឋមន្ត្រីហ៊ុន សែន និងគណបក្សប្រជាជនកម្ពុជារបស់លោក។ ការបោះឆ្នោតលើកនេះ ក៏អាចមានឥទ្ធិពលខ្លាំងដល់ទិដ្ឋភាពនយោបាយកម្ពុជានៅមុនការបោះឆ្នោតថ្នាក់ជាតិឆ្នាំ ២០១៨ ខាងមុខនេះ។
លោកនាយករដ្ឋមន្ត្រីហ៊ុន សែន និងភរិយារបស់លោក ស្ថិតក្នុងចំណោមអ្នកទៅបោះឆ្នោតមុនគេបង្អស់។ កន្លងមក រដ្ឋាភិបាលរបស់លោករងការចោទប្រកាន់ថាបានប្រើអំពើហិង្សាប្រឆាំងនឹងក្រុមអ្នកប្រឆាំង។ ហើយលោកនាយករដ្ឋមន្ត្រីហ៊ុន សែន បានព្រមានម្ដងហើយម្ដងទៀត ថាអាចនឹងសង្គ្រាមកើតឡើង ប្រសិនបើគណបក្សរបស់លោកចាញ់ឆ្នោត។
លោក កឹម សុខា ប្រធានគណបក្សសង្គ្រោះជាតិ ដែលជាគណបក្សប្រឆាំង ក្រោយពីបោះឆ្នោតមក បាននិយាយថា លោកសង្ឃឹមថា នឹងឈ្នះសំឡេងឆ្នោតច្រើនជាង ៦០ ភាគរយ។
កាលពីថ្ងៃសុក្រសប្ដាហ៍នេះ លោកហ៊ុន សែន បានអំពាវនាវឲ្យគណបក្សនយោបាយទាំងអស់ទទួលយកលទ្ធផលបោះឆ្នោត ជាជាងចោទប្រកាន់ថាមានភាពមិនប្រក្រតីកើតឡើង ដោយលោកបានបញ្ជាក់ថា តុលាការអាចរំលាយគណបក្សនយោបាយណាបាន ប្រសិនបើគណបក្សនយោបាយនោះតវ៉ាចំពោះលទ្ធផលបោះឆ្នោត។
នៅក្នុងសប្ដាហ៍នេះ អង្គការ Amnesty International បានចោទប្រកាន់រដ្ឋាភិបាលកម្ពុជា ថាបានប្រើប្រាស់ការក្ដោបក្ដាប់លើប្រព័ន្ធតុលាការ ដើម្បីគំរាមកំហែងអ្នកការពារសិទ្ធិមនុស្ស និងសកម្មជននយោបាយ។ របាយការណ៍របស់អង្គការនេះបានបញ្ជាក់ថា ចាប់តាំងពីការបោះឆ្នោតឆ្នាំ ២០១៣ មក រដ្ឋាភិបាលលោកហ៊ុន សែន បានប្រើតុលាការជាឧបករណ៍ ដើម្បីឃុំខ្លួនមន្ត្រីគណបក្សប្រឆាំង អ្នកការពារសិទ្ធិមនុស្ស និងសកម្មជនដីធ្លី ក៏ដូចជាមនុស្សជាច្រើនទៀត ដែលប្រឈមនឹងសំណុំរឿងផ្លូវច្បាប់។
កាលពីដើមខែនេះ ក្រសួងការបរទេសសហរដ្ឋអាមេរិក បានបញ្ជាក់ថា សហរដ្ឋអាមេរិកបានជំរុញរដ្ឋាភិបាលកម្ពុជាឲ្យធានាយ៉ាងណាកុំឲ្យមានការគំរាមកំហែងចំពោះលំហនយោបាយនៅក្នុងប្រទេសកម្ពុជា និងគោរពសេរីភាពបញ្ចេញមតិសម្រាប់ប្រជាពលរដ្ឋខ្មែរទាំងអស់៕