មន្ត្រីសុខាភិបាល នៅថ្ងៃពុធនេះ បានឲ្យដឹងថាសំណាកចំនួន ៥៩ត្រូវបានប្រមូលពីអ្នកដំណើរ និងបុគ្គលិកនៃនាវា Viking Cruise Journey ដើម្បីធ្វើតេស្តរកជំងឺកូវីដ១៩ បន្ទាប់ពីរកឃើញថា ស្ត្រីជនជាតិអង់គ្លេសម្នាក់ដែលនៅលើនាវានោះមានផ្ទុកវីរុសកូវីដ១៩ ។
កាលពីម្សិលមិញ ស្ត្រីជនជាតិអង់គ្លេសមួយរូប វ័យ៦៥ឆ្នាំ ត្រូវបានគេរកឃើញថាបានឆ្លងវីរុសកូវីដ១៩ (COVID-19) ដោយបានរកឃើញពេលស្ត្រីនោះនៅខេត្តកំពង់ចាម ជាទីតាំងដែលនាវាដឹកដំណើរកំសាន្តដងទន្លេមេគង្គ Viking Cruise Journey ចូលចត។
នៅថ្ងៃពុធនេះ អ្នកស្រី ឱ វណ្ណឌីន អ្នកនាំពាក្យក្រសួងសុខាភិបាលបានឲ្យដឹងថា ដោយមានសំណើពីស្ថានទូតអង់គ្លេសប្រចាំនៅកម្ពុជា និងដោយសារស្ត្រីជនជាតិអង់គ្លេសអាយុ ៦៥ ឆ្នាំ ដែលលទ្ធផលតេស្តកូវីដ១៩បង្ហាញថាវិជ្ជមាន ជាអ្នកដែលមានជើងសិប្បនិមិត្តម្ខាងនិងមានការពិបាកក្នុងការប្រើបន្ទប់ទឹក ក្រសួងបានសម្រេចយកស្ត្រីរូបនេះមកព្យាបាលនៅមន្ទីរពេទ្យក្នុងក្រុងភ្នំពេញ នៅម៉ោង ៤និង៣០នាទីរសៀលនេះ ។
លោកស្រីបន្ថែមថា ក្រសួងកំពុងស្វែងរកអ្នកប៉ះពាល់ផ្ទាល់ ឬប្រយោល ជាមួយស្ត្រីរូបនេះទាំងនៅកំពង់ចាម និងរាជធានីភ្នំពេញ។ មកទល់ពេលនេះក្រសួងបានរកឃើញថា មានស្ត្រីជាអ្នកបកប្រែ មួយរូបដែល មានកូនស្រីអាយុ៤ឆ្នាំម្នាក់ និងអ្នកបើករឺម៉កម៉ូតូ២នាក់ដែលត្រូវបានក្រសួងធ្វើតេស្តវិភាគសំណាកដោយមានលទ្ធផលអវិជ្ជមានទាំងអស់គ្នា។ បច្ចុប្បន្នអ្នកទាំង៤នាក់ ត្រូវបានអនុញ្ញាតឲ្យវិលត្រឡប់ទៅផ្ទះវិញ ដោយបានណែនាំឲ្យអនុវត្តវិធានការតាមដានសុខភាពផ្ទាល់ខ្លួនជាបន្តទៀតក្នុងរយៈពេល១៤ថ្ងៃ។
វេជ្ជបណ្ឌិត គឹម សួរភិរុណ ប្រធានមន្ទីរសុខាភិបាលខេត្តកំពង់ចាម បានប្រាប់វីអូអេថា៖ «អ្នកដែលនៅលើនាវាហ្នឹង យើងបានទៅមើលគ្រប់គ្នាអស់ហើយ។ យើងបានបញ្ជូនសំណាកហ្នឹង ឥឡូវនេះ តាមដំណឹងគឺថាដល់វិទ្យាស្ថានប៉ាស្ទ័រហើយ»។
អ្នកដំណើរលើនាវាទាំងនោះមាន៣០នាក់ដែលក្នុងនោះ មានជនជាតិអង់គ្លេស អាមេរិក កាណាដា វៀតណាម ភូមា និងជនជាតិផ្សេងៗទៀត។ នេះបើតាមលោក ប្រធានមន្ទីរសុខាភិបាលខេត្ត។ បុគ្គលិកនៅលើនាវានោះមាន ៣៤នាក់ ដែលបុគ្គលិកចំនួន២៤ នាក់ក្នុងចំណោមនោះជាពលរដ្ឋកម្ពុជា។
លោកបន្តថាទាំងអ្នកផ្ទុកវីរុសកូវីដ១៩ ម្នាក់ ដែលនៅដាច់ដោយឡែកក្រោមក្របខណ្ឌចត្តាឡីស័ក (quarantine) នៅក្នុងមន្ទីរពេទ្យបង្អែកខេត្តកំពង់ចាម អ្នកដែលគេចាត់ថាមានទំនាក់ទំនងជិតដិតម្នាក់ដែលដាក់ឲ្យនៅដាច់ដោយឡែកលើនាវា និងអ្នកដែលនៅលើនាវា ៦៣នាក់ ផ្សេងទៀត ពុំមានរោគសញ្ញាទេមកដល់ពេលនេះ ។ លោកថា លោកនិងក្រុមគ្រូពេទ្យកំពង់បន្តតាមដាន រោគសញ្ញារបស់ អ្នកទាំងនោះយ៉ាងហោច១៤ថ្ងៃ។
លោកបន្តថា មន្ទីរពេទ្យបង្អែកខេត្តកំពង់ចាមមានបន្ទប់បរិក្ខារត្រៀមចំនួន៥ សម្រាប់ការព្យាបាលអ្នកជំងឺកូវីដ១៩នេះ។
នាវា Viking Cruise Journey ធ្វើដំណើរចេញពីកំពង់ផែ My Thoក្បែរក្រុងហូជីមិញ កាត់តាមចូវដុក និងក្អមសំណរ កាលពីនៅថ្ងៃទី៥ ខែមីនា ។ នាវានេះ មកដល់ភ្នំពេញ នៅថ្ងៃទី៧ ខែមីនា។
ក្រសួងសុខាភិបាលបានឲ្យដឹងថា មានការរាយការណ៍ពីអាជ្ញាធរវៀតណាម ដែលសង្ស័យលើអ្នកដំណើរនាវា Viking Cruise Journey ជាជនជាតិអង់គ្លេស៥នាក់ដែលបានជិះយន្តហោះចេញពីទីក្រុងឡុងដ៍ ប្រទេសអង់គ្លេស ទៅទីក្រុងហាណូយប្រទេសវៀតណាម តាមជើងហោះហើរ VN054 មុននឹងពួកគេឡើងនាវាពីកំពង់ផែ My Tho។
តាមជើងយន្តហោះនេះ មានអ្នកដំណើររួមជាមួយនឹងស្ត្រីជនជាតិវៀតណាមម្នាក់ ដែលគេពិនិត្យរកឃើញថា មានផ្ទុកកូវីដ១៩ ពេលស្ត្រីនោះទៅដល់ទីក្រុងហាណូយ។
អាជ្ញាធរកម្ពុជាបានស្នើសុំធ្វើតេស្តអ្នកដំណើរជនជាតិអង់គ្លេសទាំង៥ ពេលនាវាចតនៅភ្នំពេញ។ នៅមន្ទីរពេទ្យមិត្តភាពខ្មែរសូវៀត កន្លែងដែលពួកគេពិនិត្យសុខភាព សំណាកពីអ្នកដំណើរបីនាក់ក្នុងចំណោមអ្នកដំណើរទាំងប្រាំនាក់ត្រូវបានបញ្ជូនទៅធ្វើតេស្ត ដោយលទ្ធផលអវិជ្ជមាន។
អ្នកដំណើរ២នាក់បានប្រកែក មិនឲ្យយកសំណាកពួកគេទៅធ្វើតេស្ត។ រហូតដល់ពេលនាវាចតនៅកំពង់ផែនៅទីរួមខេត្តកំពង់ចាម អ្នកគ្រប់គ្រងនាវាសម្របសម្រួលទើបបានយកសំណាកពីខេត្តកំពង់ចាមមកវិញ។
ហើយម្នាក់នៅក្នុងចំណោមនោះត្រូវបានបញ្ជាក់ថា វិជ្ជមានកូវីដ១៩ នៅថ្ងៃទី១០។ នេះបើតាមលោក ម៉ម ប៊ុនហេង រដ្ឋមន្ត្រីសុខាភិបាលនៅក្នុងសន្នីសីទកាសែតបន្ទាន់នៅល្ងាចម្សិលមិញ។
នៅឯខេត្តសៀមរាបវិញ អ្នកនាំពាក្យក្រសួងសុខាភិបាល លោក លី សូវ៉ាន់ បានឲ្យដឹងថា ក្រសួងបានរកឃើញ អ្នកមានទំនាក់ទំនងជិតសិ្នទ្ធិ និងប្រយោល ជាមួយបុរសជនជាតិជប៉ុន ដែលផ្ទុកវីរុសកូវីដ១៩ ក្រោយចេញដំណើរពីខេត្តសៀមរាប ទៅដល់ប្រទេសជប៉ុន។ លោកលី សូវ៉ាន់ក៏បានបន្ថែមថា ក្រសួងក៏បានរកឃើញ អ្នកមានទំនាក់ទំនងជិតសិ្នទ្ធិ និងប្រយោល ជាមួយបុរសជាពលរដ្ឋខ្មែរ ម្នាក់ដែលផ្ទុកវីរុសកូវីដ១៩ បន្ទាប់ពីមានទំនាក់ទំនងជាមួយបុរសជនជាតិជប៉ុននោះ។
លោកបានប្រាប់វីអូអេថា៖ «យើងធានាថា ១០០ ភាគរយ យើងបានរកឃើញអស់ហើយ។យើងកំពុងតាមដានសុខភាពរបស់គាត់»។
លោកបន្តថាអ្នកទាំងនោះពុំមានរោគសញ្ញាទេ ហើយបុរស ៣៨ឆ្នាំដែលផ្ទុកវីរុសកូវីដ១៩ នោះក៏ពុំមានរោគសញ្ញាដែរ។ បច្ចុប្បន្ន មន្ទីរពេទ្យបង្អែកខេត្តកំពុងបន្តព្យាបាល បុរសនោះ។
លោក លី សូវ៉ាន់បានប្រាប់អំពីនីតិវិធីនៃការព្យាបាលបុរស ៣៨ឆ្នាំ ដែលផ្ទុកកូវីដ១៩នោះថា៖ «យើងធ្វើតាមអ្វីដែលបានជោគជ័យនៅក្រុងព្រះសីហនុហ្នឹង យកមកធ្វើ[ព្យាបាល]នៅនេះដែរ»។
លោកបន្តថា៖ «ទី១ ព្យាបាលតាមការគាំទ្រវេជ្ជសាស្ត្រ។ តែករណីនេះគាត់អត់មានក្តៅខ្លួនទេ មិនមែនដូចខាងចិននោះទេ។ ខាងនេះយើងឲ្យគាត់ញ៉ាំឲ្យមានកម្លាំងខ្លាំង ញ៉ាំឲ្យបានឆ្ងាញ់ល្អ ឲ្យគាត់សប្បាយចិត្ត ដូច្នេះគាត់អាចមានកម្លាំងក្នុងខ្លួនក្នុងការសម្លាប់មេរោគបានហើយ»។
ករណីទី១នៃជំងឹកូវីដ១៩នៅកម្ពុជា ត្រូវបានរកឃើញលើបុរសជនជាតិចិនមួយរូប ដែលបានធ្វើដំណើរពីទីក្រុង Wuhan ខេត្ត Hubei ប្រទេសចិន មកដល់ខេត្តព្រះសីហនុ កាលពីចុងខែមករា។ លោកត្រូវបានប្រកាសថាជាសះស្បើយ និងបានវិលត្រឡប់ទៅកាន់ប្រទេសកំណើតវិញក្រោយចាកចេញពីមន្ទីរពេទ្យបង្អែកខេត្តព្រះសីហនុ។
ករណីទី២ ជាករណីឆ្លងក្នុងប្រទេស កើតមានលើពលរដ្ឋកម្ពុជាមួយរូបនៅខេត្តសៀមរាបត្រូវបានរកឃើញថា បានឆ្លងជំងឺ COVID-19 បន្ទាប់ពីបុរសរូបនេះមានការប្រាស្រ័យទាក់ទងជាមួយនឹងបុរសជនជាតិជប៉ុនម្នាក់មានផ្ទុកមេរោគនេះ រកឃើញនៅប្រទេសជប៉ុន ក្រោយបានចេញពីកម្ពុជាកាលពីសប្តាហ៍មុន។
មកដល់ពេលនេះសាលារៀនរដ្ឋ និងឯកជនចំនួនប្រមាណ១១០ នៅក្នុងក្រុងសៀមរាប ត្រូវបានផ្អាកដំណើរការបណ្តោះអាសន្នរហូតដល់មានការជូនដំណឹងជាថ្មី។ លោកនាយករដ្ឋមន្រ្តី ហ៊ុន សែន ក៏បានសម្រេចផ្អាកការប្រារព្ធពិធីបុណ្យចូលឆ្នាំទ្រង់ទ្រាយមួយនៅខេត្តសៀមរាបនៅខែមេសាខាងមុខនេះ។
ជំងឺកូវីដ១៩ (COVID-19) ឆ្លងរីករាលដាលដល់ជាង១០០ ប្រទេសនៅទូទាំងពិភពលោក។ ជំងឺកូវីដ១៩ ដែលបង្កឡើងដោយវីរុសកូរ៉ូណាថ្មី បានឆ្លងដល់មនុស្ស យ៉ាងហោចណាស់ចំនួនជាង១២ម៉ឺននាក់។ ជំងឺនេះបានសម្លាប់មនុស្សជាង៤៣០០ នាក់ដែលភាគច្រើនជាជនជាតិចិន។ នេះបើគិតត្រឹមល្ងាចថ្ងៃទី១១ ខែមីនា ឆ្នាំ២០២០៕