លោក ទៀ សីហា រដ្ឋមន្រ្ដីក្រសួងការពារជាតិកម្ពុជានឹងចូលរួមវេទិកាប៉េកាំងសៀនសានលើកទី ១១ នៅប្រទេសចិន ដែលនឹងប្រព្រឹត្តទៅនៅថ្ងៃទី ១២ ដល់ ១៤ ខែកញ្ញា ឆ្នាំ ២០២៤។ នេះបើតាមសេចក្ដីប្រកាសព័ត៌មានរបស់ក្រសួងការពារជាតិ ចេញផ្សាយនៅថ្ងៃអង្គារនេះ។
យោងតាមសេចក្ដីប្រកាសព័ត៌មានក្រសួងការពារជាតិ ក្នុងដំណើរចូលរួមវេទិកាប៉េកាំងសៀនសានតាមការអញ្ជើញពីលោក ដុង ជុន (Dong Jun) រដ្ឋមន្រ្ដីក្រសួងការពារជាតិនៃប្រទេសចិន លោក ទៀ សីហា នឹងឡើងថ្លែងសុន្ទរកថាក្នុងសម័យប្រជុំពេញអង្គទី២ ស្ដីពី «ពហុប៉ូល និងការវិវត្តសណ្ដាប់ធ្នាប់អន្ដរជាតិ»។
ជាមួយគ្នានេះ លោក ទៀ សីហា នឹងពិភាក្សាការងារទ្វេភាគីជាមួយលោក ចាំង យូសៀរ អនុប្រធានទី១ គណៈកម្មការយោធាមជ្ឈិមចិន ដើម្បីពងឹ្រងទំនាក់ទំនងនិងកិច្ចសហប្រតិបត្តិការការពារជាតិរវាងកម្ពុជាចិន។
ទន្ទឹមគ្នានេះ លោក ទៀ សីហា នឹងមានជំនួបទ្វេភាគីជាមួយរដ្ឋមន្រ្ដីការពារជាតិវៀតណាម និងជំនួបទ្វេភាគីជាមួយរដ្ឋមន្រ្ដីការពារជាតិឡាវ និងជំនួបទ្វេភាគីជាមួយដៃគូសន្ទនាមួយចំនួនទៀត៖ «ដើម្បីពង្រឹងទំនាក់ទំនងកិច្ចសហប្រតិបត្តិការការពារជាតិ និងសន្ដិសុខជាមួយគ្នា»។
គួរបញ្ជាក់ថា ក្នុងដំណើរចូលរួមវេទិកាប៉េកាំងសៀនសានលើកទី ១១ នេះ ក៏នឹងមានលោក ណឹម សុវតិ្ថ អគ្គនាយកនៃអគ្គនាយកដ្ឋាននយោបាយនិងកិច្ចការបរទេស លោក ហ៊ុន ម៉ានិត ប្អូនប្រុសរបស់លោក ហ៊ុន ម៉ាណែត និងជាអគ្គនាយក អគ្គនាយកដ្ឋានស្រាវជ្រាវ-ចារកិច្ច និងជាមេបញ្ជាការរងកងទ័ពជើងគោក លោក ចៅ ភិរិទ្ធ អគ្គនាយកនៃអគ្គនាយកដ្ឋានសម្ភារៈបច្ចេកទេស និងមាននាយទាហានជាន់ខ្ពស់នៃកងយោធលខេមរភូមិន្ទមួយចំនួនដែលនឹងចូលរួមអមដំណើរ៕