ករណីស្លាប់ដោយសារជំងឺគ្រុនចាញ់បានធ្លាក់ចុះជាបន្តបន្ទាប់។ ក្នុងឆ្នាំ២០១៦កន្លងទៅនេះ មានមនុស្សតែម្នាក់ប៉ុណ្ណោះដែលបានស្លាប់។ ករណីស្លាប់នេះធ្លាក់ចុះយ៉ាងគំហ៊ុកពីឆ្នាំ២០១៥ដែល មានករណីស្លាប់១០ករណី។
ក្រសួងសុខាភិបាលបានឲ្យដឹងថា ក្នុង២០១៦មានមនុស្សតែម្នាក់ប៉ុណ្ណោះ ដែលបានស្លាប់ដោយសារជំងឺគ្រុនចាញ់។ ចំនួននៃអ្នកស្លាប់ធ្លាក់ចុះយ៉ាងខ្លាំងប្រៀបធៀបទៅនឹងឆ្នាំ២០១៥ដែលមានមនុស្សស្លាប់ទៅដល់១០នាក់។
ករណីជំងឺគ្រុនចាញ់បានធ្លាក់ចុះប្រមាណ៥៣ភាគរយក្នុងឆ្នាំ២០១៦ បើប្រៀបធៀបនឹងឆ្នាំ២០១៥ដែលមាន៥១.២៦២ករណី។ ករណីនេះធ្លាក់មកត្រឹម ២៤.២៣៧ករណី ក្នុងឆ្នាំ២០១៦។ នេះបើយោងតាមនាយកនៃមជ្ឈមណ្ឌលជាតិប្រយុទ្ធប្រឆាំងនឹងជំងឺគ្រុនចាញ់ ប៉ារ៉ាស៊ីតសាស្ត្រនិងបាណកសាស្ត្រ លោកវេជ្ជបណ្ឌិត ហ៊ុយ រ៉េកុល។
លោកបន្ថែមថា មានករណីស្លាប់តែមួយករណីក្នុងឆ្នាំ២០១៦នេះ ជាករណីឆ្លងពីប្រទេសថៃហើយអ្នកជំងឺបានស្លាប់នៅក្នុងប្រទេសកម្ពុជា។
លោកមានប្រសាសន៍ប្រាប់ VOA ថា៖
«ករណីហ្នឹងជាករណីមកពីស្រុកថៃ ចូលមកដល់មន្ទីរពេទ្យយើងបានប្រហែល៤០នាទីទេស្លាប់។អ្នកជំងឺហ្នឹងវាឈឺធ្ងន់ធ្ងរហើយ ដឹកពីស្រុកគេមក ដូចដឹកមកស្លាប់អញ្ចឹង»។
លោកមិនមានព័ត៌មានពីអត្តសញ្ញាណរបស់អ្នកជំងឺដែលស្លាប់នោះទេ។
អត្រាអ្នកស្លាប់ដោយជំងឺគ្រុនចាញ់នៅប្រទេសកម្ពុជាក្នុងរយៈពេល១០ឆ្នាំចុងក្រោយនេះ។ (ប្រភព៖ មជ្ឈមណ្ឌលជាតិប្រយុទ្ធប្រឆាំងនឹងជំងឺគ្រុនចាញ់ ប៉ារ៉ាស៊ីតសាស្ត្រនិងបាណកសាស្ត្រ)
លោក ហ៊ុយ រ៉េកុល បានបញ្ជាក់ថា ទិន្នន័យនេះត្រូវបានប្រមូលពីសេវាសុខភាពទាំងអស់ទាំងផ្នែករដ្ឋ និងឯកជន តាមរយៈប្រព័ន្ធតាមដានអង្កេតថ្នាក់ជាតិដែលមានទៅដល់តំបន់ឆ្ងាយៗ។
លោកបញ្ជាក់ថា៖
«គេមានប្រព័ន្ធតាមដានជំងឺរបស់គេ អញ្ចឹងប្រព័ន្ធគេតាមដានហ្នឹង គេធ្វើគេមានបណ្តាញគេគេធ្វើពីណាពីណីមក គេធ្វើអញ្ចឹងរហូតមកហើយ។ប្រព័ន្ធគេមានបណ្តាញរហូតដល់ភូមិ»។
ទិន្នន័យរបស់មជ្ឈមណ្ឌលប្រឆាំងជំងឺគ្រុនចាញ់បានឲ្យដឹងថា ឆ្នាំ២០១៤ ករណីស្លាប់ដោយសារជំងឺគ្រុនចាញ់មាន១៨ករណី ឆ្នាំ២០១៣ មាន១២ករណីឆ្នាំ២០១២ មាន៤៥ករណីនិងឆ្នាំ២០១១ មាន៩២ករណី។ កាលពីអំឡុងទសវត្សរ៍ឆ្នាំ៨០និង៩០ ករណីជំងឺគ្រុនចាញ់ប្រចាំឆ្នាំមានប្រមាណជា១៣ម៉ឺនករណីនិងករណីស្លាប់មានពី៧០០ករណី ទៅ៨០០ករណីក្នុងមួយឆ្នាំៗ។ ក្នុងឆ្នាំ២០០០ដល់២០១០ ករណីជំងឺគ្រុនចាញ់ប្រចាំឆ្នាំមានប្រមាណ៩.២២១៣ ករណី និងករណីស្លាប់ប្រមាណជា ៣៥៧នាក់ក្នុងមួយឆ្នាំៗ។
លោក ហ៊ុយ រ៉េកុល បានបញ្ជាក់ថា ការធ្លាក់ចុះនៃករណីស្លាប់ដោយជំងឺគ្រុនចាញ់ក្នុងឆ្នាំ២០១៦នេះ ដោយសារមានការតាមដានទៀងទាត់នៃជំងឺគ្រុនចាញ់និងការព្យាបាលត្រឹមត្រូវ និងមានប្រសិទ្ធភាព រួមមានការផ្លាស់ប្តូរថ្នាំទៀងទាត់ រៀងរាល់៣ទៅ៥ឆ្នាំម្តង។
កាលពីឆ្នាំ២០១៦ កម្ពុជាបានផ្លាស់ប្តូរពីការប្រើថ្នាំព្យាបាលជំងឺគ្រុនចាញ់ពី (DHA)-piperaquine (PP) ទៅ Artesunate plus Mefloquine(ASMQ)។
លោក ហ៊ុយ រ៉េកុល មានប្រសាសន៍ថា៖
«យុទ្ធសាស្រ្តជាតិយើង យើងមានយុទ្ធសាស្រ្តមួយសិក្សាស្រាវជ្រាវ អញ្ចឹងសិក្សាស្រាវជ្រាវ យើងបានសិក្សាមេរោគគ្រុនចាញ់ហើយនិងភាពបន្សាំថ្នាំគ្រុនចាញ់។ អញ្ចឹងហើយបានជាប្រទេសខ្មែរយើង ឆ្នាំមុន យើងដូរថ្នាំ ដូរថ្នាំមកប្រើប្រភេទថ្នាំថ្មីទាន់ពេលវេលា រហូតដល់យើងរក្សាបាន ធានាបាននូវអត្រាស្លាប់មិនឲ្យកើតមាន»។
អនុប្រធានផ្នែកជំងឺគ្រុនចាញ់ និងជាអ្នកស្រាវជ្រាវជាន់ខ្ពស់នៃវិទ្យាស្ថានប៉ាស្ទ័រកម្ពុជា លោកបណ្ឌិត Benoit Witkowski បានមានប្រសាសន៍ថា «ទិន្នន័យរបស់មជ្ឈមណ្ឌលជាតិប្រឆាំងនឹងជំងឺគ្រុនចាញ់អាចគួរឲ្យជឿបាន»។
លោកបានបញ្ជាក់ប្រាប់ VOA ថា «វាជាជំហានវិជ្ជមានមួយ» តាមរយៈការផ្តល់ការព្យាបាលប្រឆាំងជំងឺគ្រុនចាញ់ ការធ្វើរោគវិនិច្ឆ័យ ការព្យាបាលទាន់ពេលវេលា និងការការពារកុំឲ្យមូសខាំ។
លោក Yves Bourny នាយកប្រចាំប្រទេសនៃអង្គការមិនរកកម្រៃឈ្មោះ Malaria Consortium Cambodia មានប្រសាសន៍ថា មិនមានករណីស្លាប់ដោយសារជំងឺគ្រុនចាញ់ក្នុងខេត្តដែលជាគោលដៅផ្តោតរបស់លោក ដែលរួមមានខេត្ត ប៉ៃលិន ស្ទឹងត្រែង រតនគិរី និង ខេត្តព្រះវិហារ។
ទាក់ទងនឹងការធ្លាក់ចុះករណីស្លាប់នៃជំងឺគ្រុនចាញ់នេះ លោកបញ្ជាក់ថា៖
«វាជាសញ្ញាល្អណាស់ បើទោះជានៅតែមានកន្លែងមួយចំនួន មានករណីជំងឺគ្រុនចាញ់ច្រើន»។
លោកបន្ថែមថា កម្មវិធីគ្រប់គ្រងជំងឺគ្រុនចាញ់របស់រដ្ឋាភិបាលបានដើរជំហានកាន់តែធំក្នុងការលុបបំបាត់ជំងឺគ្រុនចាញ់ក្នុងរយៈពេលប៉ុន្មានឆ្នាំចុងក្រោយនេះ។
បើទោះបីជាករណីស្លាប់ដោយជំងឺគ្រុនចាញ់នៅកម្ពុជាមានការធ្លាក់ចុះច្រើនក៏ដោយតំបន់នៅភាគខាងឦសានប្រទេស ជាពិសេសតំបន់ព្រៃឈើនៅជាប់ព្រំដែនវៀតណាម ឡាវ និង ថៃ នៅតែជាតំបន់គ្រោះថ្នាក់នៃជំងឺគ្រុនចាញ់។
លោក Yves Bourny មានប្រសាសន៍ថា ការពង្រីកការព្យាបាលទៅតំបន់ដាច់ស្រយាល ការព្យាបាលសម្រាប់ជនចំណាកស្រុកនិងប្រជាជនដែលផ្លាស់ប្តូរទីលំនៅ ជាពិសេសអ្នកឆ្លងព្រំដែន នៅតែជាបញ្ហាប្រឈមដែលត្រូវដោះស្រាយ។
កាលពីដើមខែមករា ឆ្នាំ២០១៦ កម្ពុជាបានចាប់ផ្តើមដាក់ឲ្យអនុវត្តផែនការរយៈពេល៥ឆ្នាំ (២០១៦-២០២០)។ ផែនការនេះ មានគោលដៅលុបបំបាត់ករណីស្លាប់ដោយសារជំងឺគ្រុនចាញ់។ កម្ពុជាក៏បានដាក់យុទ្ធសាស្រ្តលុបបំបាត់ជំងឺគ្រុនចាញ់ឲ្យបានទាំងស្រុងនៅត្រឹមឆ្នាំ២០២៥។ អង្គការសុខភាពពិភពលោកបានដាក់គោលដៅលុបបំបាត់ជំងឺគ្រុនចាញ់ឲ្យបាននៅត្រឹមឆ្នាំ២០៣០។
បើតាមផែនការនោះកម្ពុជាគ្រោងនឹងដាក់យ៉ាងតិចភ្នាក់ងារម្នាក់ ដើម្បីធ្វើការលើជំងឺគ្រុនចាញ់នៅតាមភូមិនីមួយៗ រួមបញ្ចូលទាំងតំបន់ឆ្លងកាត់ព្រំដែនដែលជាតំបន់គ្រោះថ្នាក់នៃជំងឺគ្រុនចាញ់៕