ប្រទេសកម្ពុជានឹងធ្វើជាម្ចាស់ផ្ទះនៃការប្រកួតកីឡាជនពិការ ឬហៅថាអាស៊ានប៉ារ៉ាហេ្គម (Asean Para Games) ដែលនឹងធ្វើឡើងចាប់ពីចុងសប្តាហ៍នេះ។ នេះជាការប្រកួតកីឡាថ្នាក់តំបន់មួយទៀត បន្ទាប់ពីកម្ពុជាបានធ្វើជាម្ចាស់ផ្ទះកីឡាស៊ីហ្គេម ដែលកម្ពុជាស្ថិតក្នុងលំដាប់ថ្នាក់លេខ៤ ក្នុងចំណោមប្រទេសចំនួន១១ ដោយទទួលបានមេដាយមាសចំនួន៨១។
ការប្រកួតកីឡាជនពិការដែលមានប្រទេស១១ចូលរួមនឹងធ្វើឡើងចាប់ពីថ្ងៃទី៣ ដល់ថ្ងៃទី៩ ខែមិថុនា ឆ្នាំ២០២៣។ កីឡាជាង១០ប្រភេទនឹងត្រូវប្រកួតនាចុងសប្តាហ៍នេះ រួមមានវាយសី ប៊ូស្យា អុក យូដូ បាល់ទាត់ លើកទម្ងន់ អត្តពលកម្ម បាល់បោះ រទេះរុញ កូនឃ្លីលើតុ ហែលទឹក បាល់ទះអង្គុយ និងអេឡិចត្រូនិក។
ការប្រកួតកីឡាអាស៊ានប៉ារ៉ាហ្គេមនេះនឹងមានការចូលរួមពីកីឡាករជាជនពិការភាពគ្រប់សមាសភាព រួមមានពិការផ្នែកចក្ខុ ពិការផ្នែកកាយសម្បទា និងពិការផ្នែកបញ្ញាតិចតួច។
លោក គៀ រ៉ាឌី គ្រូបង្វឹកវាយកូនឃ្លីលើតុ ប្រាប់វីអូអេនៅថ្ងៃអង្គារនេះថា លោករំពឹងទទួលបានមេដាយច្រើនសម្រាប់ប្រទេសកម្ពុជា ដែលធ្វើជាម្ចាស់ផ្ទះ។ លោកបន្ថែមថាកាលពីការប្រកួតលើកមុន កម្ពុជាទទួលបានមេដាយសំរឹទ្ធសម្រាប់ប្រភេទកីឡានេះ។
លោកថ្លែងថា៖ «ខ្ញុំមានក្ដីសោមនស្ស និងរំភើបរីករាយ នៅពេលដែលកម្ពុជាយើងបានធ្វើជាម្ចាស់ផ្ទះ ហើយក៏បានបង្ហាញពីការយកចិត្តទុកដាក់របស់ថ្នាក់ដឹកនាំ ជាពិសេសសម្ដេចតេជោអគ្គមហាសេនាបតីតេជោ ហ៊ុន សែន នាយករដ្ឋមន្រ្ដី គាត់បានបើកចិត្តទូលាយ និងការយកចិត្តទុកដាក់ផ្ដល់ឱកាសឱ្យអត្តពលិកទាំងអស់បានចូលរួមប្រកួត និងបញ្ចេញសមត្ថភាពរបស់ខ្លួនដែលមិនថា ខ្លួនជាអ្នកពិការ ទោះបីពិការរាងកាយ តែមិនពិការចិត្ត»។
លោក ម៉ី ពន្លក អាយុ២៦ឆ្នាំ ជាកីឡាករម្នាក់ដែលនឹងចូលរួមប្រកួតបាល់ទាត់ម្ខាងប្រាំ។ លោកពិការភ្នែក។ លោកបង្ហាញអារម្មណ៍ថា ភ័យអរ ដោយសារនេះជាប្រភេទកីឡាថ្មីដែលមិនធ្លាប់បានចូលប្រកួតពីមុនមកទេ។ ទោះជាយ៉ាងណា លោកនៅតែមានសង្ឃឹមថា លោកនឹងធ្វើបានល្អក្នុងការប្រកួតប៉ារ៉ាហ្គេមនាពេលខាងមុខនេះ។
លោកប្រាប់វីអូអេថា៖ «ក្នុងនាមជាកីឡាករដែលយើងត្រូវលេង គឺយើងតែងតែផ្តល់ក្តីសង្ឃឹមចំពោះខ្លួនឯង»។
លោក វ៉ាត់ ចំរើន អគ្គលេខាធិការគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ ប្រាប់វីអូអេថា ក្រុមការងារបានត្រៀមរៀបចំការប្រកួតកីឡាអាស៊ានប៉ារ៉ាហ្គេមរួចរាល់អស់ហើយ ជាមួយក្តីសង្ឃឹមថា កម្ពុជានឹងដណ្ដើមមេដាយបានច្រើនក្នុងនាមជាម្ចាស់ផ្ទះ។
លោកថ្លែងថា៖ «យើងបានរៀបចំការងាររួចរាល់អស់ហើយ ហើយក្ដីរំពឹងរបស់យើងនៅតែខ្ពស់ជាងមេដាយដែលធ្លាប់បានអ៊ីចឹង។ ហើយការរៀបចំរបស់យើងបានត្រៀមលក្ខណៈបច្ចេកទេស ហើយនឹងការហ្វឹកហាត់ហ្នឹង នៅក្នុងនាមម្ចាស់ផ្ទះហ្នឹង បានល្អប្រសើរ»។
កាលពីថ្ងៃទី២៦ ខែឧសភា ឆ្នាំ២០២៣ ក្នុងពិធីជួបសំណេះសំណាលជាមួយកីឡាករប៉ារ៉ាហ្គេម លោកនាយករដ្ឋមន្រ្តី ហ៊ុន សែន បានថ្លែងថា កីឡាករទាំងអស់ត្រូវខិតខំប្រឹងប្រែង ដើម្បីទទួលបានមេដាយមាស និងរក្សាមេដាយដែលខ្លួនធ្លាប់ទទួលបានពីការប្រកួតលើកមុន។
លោកថ្លែងយ៉ាងដូច្នេះថា «អ្នកមានមេដាយមាសត្រូវរក្សាមេដាយមាសឱ្យបាន។ អ្នកដែលធ្លាប់ទទួលបានមេដាយប្រាក់ ឬសំរឹទ្ធត្រូវខិតខំឈានទៅរកមេដាយមាស ហើយអ្នកដែលមិនធ្លាប់មានមេដាយខិតខំធ្វើឱ្យបានមេដាយ។ ហើយប្រសិនបើមាន មេដាយមាសក៏រឹតតែល្អ»។
គួរបញ្ជាក់ថា កាលពីការប្រកួតកីឡាអាស៊ានប៉ារ៉ាហ្គេម លើកទី១១ កម្ពុជាដណ្ដើមបានមេដាយសរុបចំនួន២៨គ្រឿង ក្នុងនោះមានមេដាយមាសចំនួន៧ ប្រាក់ចំនួន១០ និងសំរឹទ្ធ ចំនួន១១។ កម្ពុជាស្ថិតក្នុងចំណាត់ថ្នាក់ទី៧ ក្នុងចំណោម១១ប្រទេសដែលចូលរួមប្រកួតប្រជែង៕