វត្តខ្មែរកម្ពុជាក្រោមឬហៅថា វត្តសាមគ្គីរង្សីគឺជាវត្តដែលមានទីតាំងតាមបណ្តោយផ្លូវស្ទឹងមានជ័យនិងមានសកម្មភាពសង្គមនិងនយោបាយយ៉ាងច្រើនក្នុងពេលកន្លងមក។
វត្តនេះត្រូវបានលោក ឃួង ស្រេង អភិបាលរងក្រុងភ្នំពេញដឹកនាំកងកម្លាំងមានសមត្ថកិច្ចជាច្រើនរយនាក់មកធ្វើបែបបទរដ្ឋបាលកាលពីថ្ងៃអង្គារក្រោមការតាមសង្កេតមើលពីក្រុមសិទ្ធិមនុស្សនិងប្រជាពលរដ្ឋប៉ុន្តែមិនមានការប៉ះទង្គិចណាមួយកើតឡើងរវាងក្រុមអាជ្ញាធរមានសមត្ថកិច្ចនិងក្រុមប្រជាពលរដ្ឋទេ។
ក្រោយពីបានធ្វើបែបបទរដ្ឋបាល មន្ត្រីអាជ្ញាធរក្រុងភ្នំពេញបានចោទប្រកាន់ថាវត្តសាមគ្គីរង្សី សឹងក្លាយទៅជាតំបន់អបគមន៍ ក៏ប៉ុន្តែមន្ត្រីអង្គការសង្គមស៊ីវិលវិញចាត់ទុកថា អាជ្ញាធរកំពុងគំរាមកំហែងដល់ព្រះសង្ឃដោយសារតែព្រះសង្ឃខ្មែរកម្ពុជាក្រោមកន្លងមកហ៊ានចេញមុខចូលរួមបាតុកម្មទាមទារសិទ្ធិជូនពលរដ្ឋរងគ្រោះនានានិងចូលរួមបាតុកម្មប្រឆាំងស្ថានទូតវៀតណាមក្នុងប្រទេសកម្ពុជាជាដើម។
លោក ឡុង ឌីម៉ង់ អ្នកនាំពាក្យសាលាក្រុងភ្នំពេញបានមានប្រសាសន៍ថា តាមរយៈការចុះធ្វើបែបបទរដ្ឋបាលកាលពីម្សិលមិញអាជ្ញាធរហាក់បីដូចជាព្រឺឆ្អឹងខ្នងនៅពេលដែលឃើញហ្វូងមនុស្សមកឡោមព័ទ្ធក្រុមសមត្ថកិច្ច។
លោកបានបញ្ជាក់ថាវត្តសាមគ្គីរង្សីនេះសឹងក្លាយទៅជាទីតាំងតំបន់អបគមន៍ដោយសារតែកន្លងមកវត្តនេះមិនដែលមានការសហការជាមួយក្រុមអាជ្ញាធរទេ អាជ្ញាធរបង្គាប់ឱ្យធ្វើស្តាំ គាត់ធ្វើឆ្វេង។
លោកនិយាយថា៖ «សួរថាតើផ្តល់នូវភាពទុកចិត្តផ្តល់នូវភាពកក់ក្តៅបានទេ។ អាហ្នឹងហើយបានជាខ្ញុំប្រើពាក្យថាគាត់ត្រូវតែសហការពីព្រោះបើមិនអញ្ចឹងទេវាសឹងតែក្លាយទៅជាតំបន់អបគមន៍»។
លោកបញ្ជាក់ថាវត្តផ្សេងៗនៅក្នុងទីក្រុងភ្នំពេញមានការសហការជាមួយសមត្ថកិច្ចក្នុងការរាយការណ៍ពីការស្នាក់នៅក្នុងវត្តតែសម្រាប់វត្តសាមគ្គីរង្សីមិនដែលសហការជាមួយកងកម្លាំងមានសមត្ថកិច្ចទេ។
ទស្សនាកម្រងរូបភាពអំពីទិដ្ឋភាពទូទៅនៃវត្តសាមគ្គីរង្សី៖
កម្រងរូបភាព៖ វត្តសាមគ្គីរង្សី
ក្រោយពីបានចុះធ្វើបែបបទរដ្ឋបាលមក ក្រុមអាជ្ញាធរបានរកឃើញថាវត្តពុំទាន់មានច្បាប់គ្រប់គ្រាន់នៅឡើយហើយការប្រើប្រាស់ព្រះឆាយាលក្សក៏មិនទាន់បានត្រឹមត្រូវ។
ព្រះតេជគុណ ថាច់ ហាសំអាង ព្រះចៅអធិការស្តីទីវត្តសាមគ្គីរង្សីមានសង្ឃដីការថា វត្តបានទទួលការអនុញ្ញាតផ្លូវច្បាប់ប្រមាណ៨០ភាគរយហើយនៅសល់តែក្រសួងធម្មការតែមួយប៉ុណ្ណោះមិនព្រមចុះបញ្ជីការឱ្យ។
ព្រះអង្គបានបញ្ជាក់ថាការធ្វើបែបបទរដ្ឋបាលរបស់អាជ្ញាធរក្រុងភ្នំពេញនោះគឺខុសបែបបទរដ្ឋបាលនិងបង្ហាញថាប្រទេសកម្ពុជានៅតែទទួលរងសម្ពាធពីប្រទេសវៀតណាមដោយសារតែកន្លងមកព្រះសង្ឃខ្មែរកម្ពុជាក្រោមតែងតែចូលរួមបាតុកម្មដើម្បីទាមទាររកយុត្តិធម៌នឹងប្រឆាំងជាមួយស្ថានទូតវៀតណាម។
ព្រះអង្គបានបញ្ជាក់ថា៖ «អាត្មាមានការសន្និដ្ឋានថាមានការជាប់ពាក់ព័ន្ធនឹងយួននៅពីក្រោយខ្នងបញ្ជា។ បញ្ជាដោយសារយួនគេស្អប់ខ្ពើម គេខឹងនឹងព្រះសង្ឃខ្មែរក្រោមជាពិសេសព្រះសង្ឃវត្តខ្មែរកម្ពុជាក្រោមនៅវត្តសាមគ្គីរង្សីប្រឆាំង។ អញ្ចឹងគេអាចបញ្ជាសាលាក្រុងហើយសាលាក្រុងនេះមិនអាចចុះមកក្នុងលេសថាយួនបញ្ជាទេប៉ុន្តែគេយកហេតុផ្សេងមួយដើម្បីលាងមុខមាត់គេ លាងការចោទប្រកាន់ពីប្រជាពលរដ្ឋខ្មែរ»។
យ៉ាងតិចមានព្រះសង្ឃខ្មែរកម្ពុជាក្រោមប្រមាណ៥២អង្គបានគង់នៅក្នុងវត្តសាមគ្គីរង្សី ដោយបូករួមទាំងសិស្ស និស្សិត និង យាយជី តាអាចារ្យ ចំនួន២២នាក់ផ្សេងទៀត។
លោក អំ សំអាត ប្រធានផ្នែកស៊ើបអង្កេតអង្គការសិទ្ធិមនុស្សលីកាដូបានបញ្ជាក់ថា ការធ្វើបែបបទរដ្ឋបាលអាជ្ញាធរកំពុងតែគំរាមកំហែងដល់ព្រះសង្ឃខ្មែរកម្ពុជាក្រោម។
លោកបានបញ្ជាក់ថាកន្លងមកព្រះសង្ឃខ្មែរកម្ពុជាក្រោមបានចេញព្រះភ័ក្ត្រយ៉ាងសកម្មក្នុងការទាមទាររកយុត្តិធម៌ក្នុងសង្គម៕