នៅថ្ងៃពុធនេះ លោក កឹម សុខាបានស្នើសុំឱ្យមានការប្រកាសសាលក្រមឱ្យបានឆាប់លើសវនាការកាត់ក្តីរូបលោក បន្ទាប់ពីតុលាការក្រុងភ្នំពេញបានប្រកាសបិទបញ្ចប់សវនាការសួរដេញដោលលើអង្គហេតុគ្រប់បែបយ៉ាងទាក់ទងនឹងសំណុំរឿងរបស់លោក។ នេះបើយោងតាមសេចក្តីរាយការណ៍របស់ទីភ្នាក់ងារព័ត៌មាន AFP។
លោក កឹម សុខា ដែលជាសហស្ថាបនិកគណបក្សសង្គ្រោះជាតិដែលត្រូវបានតុលាការរំលាយ កំពុងរងការចោទប្រកាន់ពីបទសន្ទិដ្ឋភាពជាមួយបរទេសដើម្បីផ្តួលរំលំរដ្ឋាភិបាលរបស់លោកនាយករដ្ឋមន្ត្រី ហ៊ុន សែន។
នៅក្នុងអំឡុងពេលសវនាការនៅថ្ងៃពុធនេះ លោក កឹម សុខា បានប្រាប់ចៅក្រមថា លោកចង់ឱ្យដំណើរការជំនុំជម្រះនេះចប់ឱ្យបានឆាប់ ព្រោះលោកមានបញ្ហាឈឺខ្នងនិងឈឺស្មា ដោយសារតែអង្គុយយូរពេកនៅក្នុងបន្ទប់សវនាការ។
លោកបានបន្ថែមថា លោកមិនចង់ឱ្យឈឺយូរជាងនេះទេ និងចង់ទទួលបានយុត្តិធម៌។
លោក កុយ សៅ ចៅក្រមជំនុំជម្រះសាលាដំបូងរាជធានីភ្នំពេញ បានប្រកាសបិទបញ្ចប់សវនាការសួរដេញដោលលើអង្គហេតុគ្រប់បែបយ៉ាងទាក់ទងនឹងសំណុំរឿងរបស់លោក កឹម សុខា នៅថ្ងៃពុធនេះ បន្ទាប់ពីមានការជំនុំជម្រះលើរឿងនេះជាង ៦០ លើករួចមក។ តុលាការនឹងបើកសវនាការដើម្បីធ្វើសេចក្ដីសន្និដ្ឋានលើសំណុំរឿងរបស់លោក កឹម សុខា នេះនៅថ្ងៃទី ២១ ខែធ្នូ ឆ្នាំ ២០២២ ខាងមុខ នៅក្រោយពេលដែលភាគីនីមួយៗដាក់សេចក្ដីសន្និដ្ឋានការពារខ្លួនជូនតុលាការ៕
លោក កឹម សុខា ជំរុញតុលាការឱ្យចេញសាលក្រមឱ្យបានឆាប់លើសវនាការកាត់ក្ដីរូបលោក
លោក កឹម សុខា អតីតប្រធានគណបក្សសង្គ្រោះជាតិដែលត្រូវបានតុលាការរំលាយ ស្វាគមន៍អ្នកសារព័ត៌មាននៅគេហដ្ឋានរបស់លោក មុននឹងទៅសាលាដំបូងរាជធានីភ្នំពេញ នៅថ្ងៃទី ១៩ ខែ តុលា ឆ្នាំ២០២២។
ភ្នំពេញ —