ប្រភពជំនួយសម្រាប់មជ្ឈមណ្ឌលសិទ្ធិមនុស្សកម្ពុជា (CCHR) បានស្ថិតក្នុងការសួរដេញដោលរបស់សាលាដំបូងរាជធានីភ្នំពេញ អំឡុងពេលនៃការសួរសាក្សីគឺអ្នកស្រី ចក់ សុភាព ក្នុងសំណុំរឿងក្បត់ជាតិរបស់លោកកឹម សុខា អតីតប្រធានគណបក្សសង្គ្រោះជាតិដែលត្រូវរំលាយកាលពី ៥ ឆ្នាំមុន។
សវនាការរបស់លោក កឹម សុខា ដែលធ្វើឡើងកាលពីថ្ងៃពុធ ទី ១២ ខែតុលា គឺជាសវនាការលើកទី ៦០។ ហើយនៅថ្ងៃព្រហស្បតិ៍ ទី ១៣ ខែតុលានេះ តុលាការបានបន្តសវនាការទៀត ដើម្បីសាកសួរសាក្សីមួយចំនួនបន្ថែមទៀត។
នៅក្នុងសវនាការកាលពីថ្ងៃពុធ តុលាការបានសួរដេញដោលអ្នកស្រី ចក់ សុភាព ជា សាក្សីម្នាក់ និងបច្ចុប្បន្នជានាយិកាមជ្ឈមណ្ឌលសិទ្ធិមនុស្សកម្ពុជា អំពីប្រភពជំនួយដែលមជ្ឈមណ្ឌលទទួលបាន ដើម្បីធ្វើប្រតិបត្តិការក្នុងប្រទេសកម្ពុជា។ នេះបើតាមសកម្មជនសិទ្ធិមនុស្ស ដែលតាមដានសវនាការលោក កឹម សុខា ដែលធ្លាប់ជាប្រធានមជ្ឈមណ្ឌលសិទ្ធិមនុស្សកម្ពុជា។
លោក អំ សំអាត នាយកទទួលបន្ទុកកិច្ចការទូទៅអង្គការសិទ្ធិមនុស្សលីកាដូ ប្រាប់វីអូអេថា តុលាការរាជធានីភ្នំពេញកំពុងបន្តសួរនាំសាក្សីបន្ថែមទៀតនាថ្ងៃព្រហស្បតិ៍នេះ។ ប៉ុន្តែលោកថា កាលពីថ្ងៃពុធ តុលាការបានចោទសួរសាក្សីមួយចំនួន ក្នុងនោះរួមមានអ្នកស្រី ចក់ សុភាព និងលោក ឈឹម ផលវរុណ។
បើតាមលោក អំ សំអាត អ្នកស្រី ចក់ សុភាព ត្រូវបានអយ្យការចោទសួរអំពីប្រភពមូលនិធិដែលត្រូវបានផ្តល់ជូនមជ្ឈមណ្ឌលសិទ្ធិមនុស្សកម្ពុជា អំឡុងពេលអ្នកស្រីបំពេញការងារជាមួយលោក កឹម សុខា។ តុលាការក៏បានចោទសួរសាក្សីប្រាំនាក់ផ្សេងទៀត រួមមានសកម្មជនសង្គម និងសកម្មជនអតីតគណបក្សសង្គ្រោះជាតិ និងអតីតសកម្មជនដីធ្លីនៅតំបន់បុរីកីឡា អំពីដំណើររឿងពាក់ព័ន្ធនឹងព្រឹត្តិការណ៍ថ្ងៃចន្ទពណ៌ខ្មៅ (Black Friday) ក្នុងយុទ្ធនាការតវ៉ាទាមទារឱ្យដោះលែងអ្នកការពារសិទ្ធិមនុស្សនៃសមាគមអាដហុក ដែលជាប់ឃុំកន្លងមក។
លោកថ្លែងប្រាប់វីអូអេថា៖ «យើងឃើញមានសាក្សី ៥ នាក់ផ្សេងទៀតដែរ ដែលឆ្លើយ ហើយក្នុងហ្នឹងក៏ឃើញអ្នកស្រី ចក់ សុភាព ដែរ ដែលសួរពាក់ព័ន្ធហ្នឹងខាងផ្នែកហិរញ្ញវត្ថុនៃមជ្ឈមណ្ឌលសិទ្ធិមនុស្សកម្ពុជា ដែលអ្នកស្រីធ្វើការជាមួយឯកឧត្តម កឹម សុខា»។
លោកថ្លែងបន្ថែមថា៖ «យើងឃើញថា សាក្សីផ្សេងទៀត ដូចជាសួររឿងការបណ្តុះបណ្តាល ទៅលើបញ្ហា Canvas អង្គការ Canvas ថា ជាអង្គការមួយដែលពាក់ព័ន្ធបដិវត្តន៍ពណ៌អីជាដើមហ្នឹង។ ហើយជាមួយនឹងរឿង Black Monday ដែលអង្គការសង្គមស៊ីវិល ឬក៏សហគមន៍ដែលគាត់ធ្វើការមានបំណងតែមួយទេ គឺជួយធ្វើម៉េចឱ្យមានការដោះលែងទៅលើបុគ្គលិកសមាគមអាដហុក ៥ នាក់ ដែលត្រូវបានចាប់ខ្លួនក្នុងឆ្នាំ ២០១៦។ អាហ្នឹងយើងឃើញមានការដេញដោលប៉ុណ្ណឹងម្សិលមិញនេះ»។
ទាក់ទិនការចោទសួរលោក ឈឹម ផលវរុណ អតីតបុគ្គលិកមជ្ឈមណ្ឌលសិទ្ធិមនុស្សកម្ពុជានិងបច្ចុប្បន្នជាអ្នកនាំពាក្យគណបក្សកាន់អំណាចនោះ លោក អំ សំអាត លើកឡើងថា សក្ខីកម្មដែលផ្តល់ដោយលោក ឈឹម ផលវរុណ អាចបង្កភាពចម្រូងចម្រាសជុំវិញថា តើអ្វីដែលសាក្សីរូបនេះនិយាយពិតឬយ៉ាងណា ឬក៏ជាចេតនានៃការសងសឹកគំនុំផ្ទាល់ខ្លួន ដែលលោកធ្លាប់មានទំនាស់ជាមួយលោក កឹម សុខា ក្នុងអំឡុងពេលលោកបានបម្រើការងារនៅមជ្ឈមណ្ឌលសិទ្ធិមនុស្សកម្ពុជា។
ទោះយ៉ាងណាក៏ដោយ ក៏មន្ត្រីសិទ្ធិមនុស្សរូបនេះអះអាងថា ភ្លើងជម្លោះនយោបាយមិនអាចពន្លត់តាមប្រព័ន្ធតុលាការកម្ពុជាបានទេ។
លោកថ្លែងថា៖ «សំខាន់ខ្ញុំគិតថា អ្នកនយោបាយខ្មែរទាំងអស់គួរតែបន្តនូវអាវប្បធម៌នៃការសន្ទនា ដើម្បីបញ្ចប់នូវវិបត្តិនយោបាយដែលសេសសល់ ហ្នឹងគឺវាជាការផ្តល់[ផល]ចំណេញសម្រាប់កម្ពុជាទេ។ ហើយងាកទៅរកការប្រកួតប្រជែង តាមបែបលទ្ធិប្រជាធិបតេយ្យ គឺការបោះឆ្នោត ដោយសេរីត្រឹមត្រូវ និងយុត្តិធម៌ ដូចដែលបទពិសោធន៍អ្នកនយោបាយធ្លាប់ដោះស្រាយកន្លងមកតាំងពីឆ្នាំ ១៩៩៣ មកនោះ»។
ដោយឡែក អ្នកស្រី ចក់ សុភាព នាយិកាមជ្ឈមណ្ឌលសិទ្ធិមនុស្សកម្ពុជា ប្រាប់វីអូអេថា មជ្ឈមណ្ឌលសិទ្ធិមនុស្សកម្ពុជាបានធ្វើប្រតិបត្តិការដោយតម្លាភាព ទាំងការរៀបចំវេទិកាសាធារណៈ ឬការចាយវាយធនធានមូលនិធិ ដែលមជ្ឈមណ្ឌលទទួលបានពីម្ចាស់ជំនួយ។
អ្នកស្រីថ្លែងថា៖ «អ៊ីចឹង យើងមិនមានអីដែលមានការព្រួយបារម្ភ អំពីការចោទប្រកាន់ អំពីភាពមិនប្រក្រតីណាមួយ គឺយើងអត់មានទេ។ ប៉ុន្តែជារួម ខ្ញុំគិតថា កន្លងមកមានការលើកច្រើន ពេលខ្លះមានការលាបពណ៌ពីរដ្ឋាភិបាល ឬពីអ្នកគាំទ្រមាននិន្នាការនយោបាយមួយចំនួនហ្នឹង តែងតែលើកថា អង្គការសង្គមស៊ីវិលដែលយើងអាស្រ័យមូលនិធិពីបរទេសហ្នឹង យើងជាភ្នាក់ងារ ឬក៏យើងធ្វើការឱ្យបរទេស តែងតែមានការចោទប្រកាន់អ៊ីចឹង»។
អ្នកស្រីបន្ថែមថា៖ «ប៉ុន្តែខ្ញុំមានចំណោទទៅវិញថា បើសិនជារាល់ការទទួលមូលនិធិពីបរទេស ត្រូវបានរងនូវការចោទថា យើងជាភ្នាក់ងារបរទេស ចុះមូលនិធិទាំងឡាយដែលម្ចាស់ជំនួយបរទេសផ្សេងៗផ្តល់ទៅរដ្ឋាភិបាល តើនោះជាអ្វី? បើយើងឈរលើគោលការណ៍ហ្នឹង»។
វីអូអេមិនទាន់អាចទាក់ទងសុំការអត្ថាធិប្បាយពីលោក ឈឹម ផលវរុណ បានទេនៅថ្ងៃព្រហស្បតិ៍នេះ។ ប៉ុន្តែលោកបានប្រាប់វិទ្យុអាស៊ីសេរីថា អ្វីដែលលោកបាននិយាយជាការពិត គ្មានការសន្និដ្ឋាន ឬនិយាយដោយប្រហែលៗនោះទេ។
លោក កឹម សុខា កំពុងស្ថិតក្រោមការចោទប្រកាន់ពីបទ «សន្ទិដិ្ឋភាពជាមួយបរទេស»។ ប្រសិនបើតុលាការរកឃើញថាមានទោស លោក កឹម សុខាអាចជាប់ពន្ធនាគារពី ១៥ ឆ្នាំ ទៅ ៣០ ឆ្នាំ។ អ្នកឃ្លាំមើលសវនាការរបស់អតីតមេបក្សជំទាស់រូបនេះ ជឿថា តុលាការអាចនឹងមានការកោះហៅសាក្សីបន្ថែមទៀត ដើម្បីបំភ្លឺសំណុំរឿងនយោបាយសាំញ៉ាំមួយនេះ៕
