ការទាញយកមុខមាត់រវាងគណបក្សប្រឆាំងនិងរដ្ឋាភិបាលពីការកែទម្រង់នានានៅបន្តមានមិនដាច់ស្រេច។ ក្នុងខណៈពេលដែលអ្នកតាមដានមើលឃើញថាវាកើតឡើងដោយសារតែគណបក្សប្រឆាំងបានកើនឡើងសំឡេងទើបរដ្ឋាភិបាលខិតខំប្រឹងកែប្រែប៉ុន្តែរដ្ឋាភិបាលអះអាងថានោះជាផ្នែកមួយនៃការងាររបស់ខ្លួនក្នុងការបម្រើប្រជាពលរដ្ឋ។
លោក សុន ឆ័យ ជាអ្នកតំណាងរាស្ត្រនៃគណបក្សសង្គ្រោះជាតិ និង ជាអនុប្រធានគណៈកម្មាធិការហិរញ្ញវត្ថុនៅរដ្ឋសភាជាតិ ថ្លែងថា គណបក្សប្រឆាំងមានតួនាទីពិនិត្យលើចំណុចអវិជ្ជមានរបស់រដ្ឋាភិបាលនៅលើកិច្ចការអភិវឌ្ឍន៍ប្រទេស។
ប្រតិកម្មរបស់លោកកើតមានឡើងបន្ទាប់ពីលោកនាយករដ្ឋមន្ត្រី ហ៊ុន សែន បានហៅការឃោសនានយោបាយរបស់មេដឹកនាំគណបក្សប្រឆាំងថាមានចេតនាញុះញង់បង្កចលាចល បន្ទាប់ពីលោក កឹម សុខា ប្រធានស្តីទីគណបក្សសង្គ្រោះជាតិ បានថ្លែងពីការតស៊ូមតិរបស់ក្រុមមន្ត្រីនៃគណបក្សសង្គ្រោះជាតិ ក្នុងការយកផ្លូវជាតិលេខ៤ មកប្រើប្រាស់ដោយឥតបង់ប្រាក់។
លោក ស៊ុន ឆ័យ បានបញ្ជាក់បន្ថែមថា៖
«យើងបំពេញតួនាទីយើងក្នុងនាម ជាអ្នកតំណាងរាស្ត្រគណបក្សក្រៅរដ្ឋាភិបាល គឺយើងមើលការខ្វះខាត។ រដ្ឋាភិបាលប្រព្រឹត្តមិនត្រឹមត្រូវ យើងទាមទារ ឲ្យកែលម្អ។ ហើយរូបខ្ញុំផ្ទាល់ ខ្ញុំធ្លាប់លើកឡើងដែរបញ្ហា។ ញឹកញាប់ណាស់បញ្ហាដែលយើងឃើញថា មិនត្រឹមត្រូវ។ បញ្ហាយកលុយផ្លូវជាតិលេខ៤ ក៏ដូចជា រឿងយកលុយភ្ញៀវចូលអង្គរវត្តជាដើម។ ប៉ុន្តែបញ្ហាទាំងអស់នេះវា វាជាបញ្ហាដែលទុកឲ្យប្រជាពលរដ្ឋលោកវិនិច្ឆ័យបាទ មិនត្រូវដណ្ដើមគ្នាអះអាងយ៉ាងណានោះទេបាទ»។
លោកនាយករដ្ឋមន្ត្រីហ៊ុន សែនកាលពីថ្ងៃច័ន្ទកន្លងទៅនេះ បានស្នើឲ្យមេដឹកនាំគណបក្សប្រឆាំង ឈប់កុហកបោកប្រាស់ប្រជាពលរដ្ឋថា ខ្លួនបានរួមចំណែកច្រើនដល់កំណែទម្រង់នៅក្នុងប្រទេសកម្ពុជា។
ការថ្លែងរបស់លោក នាយករដ្ឋមន្ត្រីយ៉ាងដូច្នេះ កើតមានបន្ទាប់ពីលោក កឹម សុខា ប្រធានស្តីទីនៃគណបក្សសង្គ្រោះជាតិ បានថ្លែងទៅកាន់ក្រុមអ្នកគាំទ្ររបស់លោក នៅក្នុងវេទិកាសកម្មជនមូលដ្ឋាននៃ គណបក្សប្រឆាំងក្នុងខេត្តកំពង់ស្ពឺថា មន្ត្រីនៃគណបក្សប្រឆាំង ជាអ្នកនៅពីក្រោយនៃការទាមទារឲ្យបញ្ឈប់ការយកថ្លៃបើកបរលើផ្លូវជាតិលេខបួន។ វេទិកានោះ ត្រូវបានធ្វើឡើងកាលពីសៅរិ៍នៅឯស្រុកសំរោងទង ខេត្តកំពង់ស្ពឺ។
លោក កឹម សុខា ថ្លែងថា បើគ្មានសំឡេងជំទាស់ពីគណបក្សសង្គ្រោះជាតិនោះទេ ផ្លូវជាតិលេខ៤ នឹងមិនត្រូវបើកឲ្យធ្វើចរាចរណ៍ដោយមិនបាច់បង់ប្រាក់នោះឡើយ។ លោកបានមានប្រសាសន៍នៅពេលនោះថា៖
«រហូតមកដល់ថ្ងៃនេះ អ្នកខ្លះគេថា គណបក្សសង្គ្រោះជាតិ ធ្វើការអត់បានការ។ អ្នកខ្លះគេថា គណ បក្សសង្គ្រោះជាតិ ថ្នាក់ដឹកនាំយើងធ្វើមិនត្រូវ អ្នកគេខ្លះគណបក្សសង្គ្រោះជាតិ ថ្នាក់ដឹកនាំយើងទន់ជ្រាយ។ ប៉ុន្តែបងប្អូនជនរួមជាតិទាំងអស់ ជាពិសេសសកម្មជន សកម្មនារី ទាំងអស់ជ្រាបដោយខ្លួនឯងហើយថា បើគ្មានកម្លាំងរួបរួម បង្កើតជាគណបក្សសង្គ្រោះជាតិមួយដ៏ខ្លាំងក្លានោះទេ ថ្ងៃនេះប្រហែលជាផ្លូវជាតិលេខ៤ អម្បាញ់មិញនេះ គេនៅយកលុយនៅឡើយទេ»។
ទំនងជាចង់ឆ្លើយតបទៅលោក កឹម សុខានោះ លោកហ៊ុន សែនបានសរសេរនៅលើទំព័រហ្វេសប៊ុករបស់លោកកាលពីថ្ងៃច័ន្ទ ស្នើឲ្យមេដឹកនាំបក្សប្រឆាំងរូបនេះ ឈប់ទាញយកផលចំណេញនយោបាយពីសមិទ្ធផល របស់រាជរដ្ឋាភិបាលកម្ពុជាដឹកនាំដោយគណបក្សប្រជាជនកម្ពុជា តាមរយៈការភូតភរកុហកនេះ។
លោកបានថ្លែងថា ដើម្បីផលប្រយោជន៍ប្រទេសជាតិ ក្នុងនាមលោកជានាយករដ្ឋមន្ត្រី លោកបានសម្រេចឈប់ឲ្យប្រជាពលរដ្ឋខ្មែរបង់ប្រាក់លើការធ្វើដំណើរឆ្លងតាមផ្លូវវេងស្រេង បញ្ឈប់ការយកលុយថ្លៃធ្វើប័ណ្ណបើកបរសម្រាប់ម៉ូតូកម្លាំងពី (១២៥CC) ចុះក្រោម បញ្ចុះតម្លៃធ្វើប័ណ្ណបើកបរយានយន្ត (៥០%) បញ្ឈប់យកថ្លៃសេវាផ្ទេរអចលនទ្រព្យពីជីតាជីដូនទៅចៅ ពីឪពុកម្តាយទៅកូនពីប្រពន្ធទៅ និងប្តីទៅប្រពន្ធ និងឈប់ឲ្យប្រជាពលរដ្ឋបង់លុយពេលធ្វើដំណើរឆ្លងតាមផ្លូវជាតិលេខ៤ជាដើម។ លោកថ្លែងផ្តាំផ្ញើទៅមេដឹកនាំ និងក្រុមមន្ត្រីនៃគណបក្សប្រឆាំងថា៖
«ខ្ញុំសូមផ្ញើសារខ្លីនេះទៅកាន់មេបក្សប្រឆាំងព្រមទាំងក្រុមបក្សប្រឆាំងទាំងអស់ ត្រូវឈប់បោកប្រាស់ប្រជាពលរដ្ឋតទៅទៀត។ ព្រោះកន្លងទៅប៉ុន្មានអាទិត្យនេះ បក្សប្រឆាំងបានយកលទ្ធផលដែលគណបក្សប្រជាជន និងលទ្ធផលដែលនាយករដ្ឋមន្រ្តីបានសម្រេចខាងលើ យកទៅធ្វើនយោបាយប្រជាភិថុតឃោសនាបោកប្រជាពលរដ្ឋថា ដោយសារពួកគេទាមទារ ទើបនាយករដ្ឋមន្រ្តីសម្រេចធ្វើបែបនេះ។ នេះជាការនិយាយកុហកបោកប្រាស់ប្រជាពលរដ្ឋសុទ្ធសាធ ដែលគណបក្សប្រឆាំងចេះធ្វើទៅរួចដែរ ដោយគ្មានការអៀនខ្មាស់។ តែការពិតគឺវានៅតែជាការពិតដដែល គឺគណបក្សប្រឆាំងគ្មានបានធ្វើអ្វីក្រៅតែអំពីការឃោសនាបោកប្រជាពលរដ្ឋតែប៉ុណ្ណោះ»។
លោកក៏បានហៅការថ្លែងរបស់មេដឹកនាំបក្សប្រឆាំងថា ជាការញុះញង់ផ្នែកនយោបាយផងដែរ។ លោកបញ្ជាក់ថា៖
«ច្បាស់ណាស់ ទោះបីមាន់មិនរងាវ ក៏ព្រះអាទិត្យនៅតែរះដដែល ហើយបើទោះបី គណបក្សប្រឆាំងមិនស្រែក ក៏ខ្ញុំនៅតែបន្តធ្វើបម្រើប្រទេសជាតិ និងប្រជាពលរដ្ឋដដែល។ ជាការពិតគឺមានសមិទ្ធផលជាតិជាច្រើនដែលខ្ញុំបានសម្រេច ដោយគ្មានការចូល រួមពីបក្សប្រឆាំងបន្តិចណាឡើយ។ អ្វីដែលគណបក្សប្រឆាំងបានធ្វើពិតប្រាកដគឺបោកប្រាស់ ជេរប្រមាថ ញុះញង់បង្កចលាចល និងដើរទៅសុំឱ្យបរទេសផ្តាច់ជំនួយ ឬកុំមកវិនិយោគនៅកម្ពុជា។ល។និង។ល។ សូមថ្នាក់ដឹកនាំបក្សប្រឆាំងគ្រប់ជាន់ថ្នាក់មានភាពថ្លៃថ្នូរកុំឆក់ប្លន់សមិទ្ធផលរបស់គេធ្វើជារបស់ខ្លួន»។
ការលើកឡើងរបស់លោក នាយករដ្ឋមន្ត្រីហ៊ុន សែននេះ ធ្វើឡើង នៅក្រោយពេលដែលលោក កឹម សុខា បានដឹកនាំក្រុមមន្ត្រីនៃគណបក្សសង្គ្រោះជាតិ ចូលរួមវេទិការបស់ក្រុមអ្នកគាំទ្រគណបក្សប្រឆាំងនៅមូលដ្ឋាន នៅតាមបណ្តាខេត្តនានានៃប្រទេសកម្ពុជា។ បន្ទាប់ពីការចុះទៅជួបអ្នកគាំទ្ររបស់គណបក្សប្រឆាំងនៅខេត្តកំពង់ស្ពឺកាលពីថ្ងៃសៅរ៍ លោក កឹម សុខា បានទៅកាន់ខេត្តកំពង់ធំកាលពីថ្ងៃអាទិត្យផងដែរ។ នៅឯខេត្តកំពង់ធំ លោក កឹម សុខា បានថ្លែងពីភាពទន់ខ្សោយរបស់រដ្ឋាភិបាលកម្ពុជា ក្នុងការផ្តល់សេវាសាធារណៈ ដូចជាការអប់រំ ការថែទាំសុខភាព និងការបង្កើតការងារជាដើម។
VOA ពុំទាន់អាចទាក់ទងលោក កឹម សុខា នៅថ្ងៃអង្គារនេះបានទេ ដើម្បីសុំការអធិប្បាយទាក់ទិនប្រតិកម្មរបស់លោក នាយករដ្ឋមន្ត្រីហ៊ុន សែន។
អ្នកតាមដានកិច្ចការអភិវឌ្ឍន៍សង្គមកម្ពុជា ថ្លែងថា សំឡេងពីក្រុមគណបក្សប្រឆាំងអាចធ្វើឲ្យគណបក្សដឹកនាំប្រទេស បំពេញការខ្វះខាតរបស់ខ្លួននៅក្នុងការកសាងប្រទេស។
លោក មាស នី អ្នកស្រាវជ្រាវការអភិវឌ្ឍសង្គមឯករាជ្យ មានប្រសាសន៍ថា ជារឿងធម្មតា ដែលគណបក្សប្រឆាំងធ្វើការទាមទារឲ្យរដ្ឋាភិបាលកែលម្អ គោលនយោបាយរបស់រដ្ឋាភិបាលដែលមិនបម្រើប្រយោជន៍សាធារណៈ។ លោកបញ្ជាក់ថា៖
«យើងមើលពីដើមមកគណបក្សប្រឆាំងធ្លាប់ ទាមទារសូមឲ្យដំឡើងប្រាក់ខែរហូតដល់ ២៥០ដុល្លារ ឥឡូវហ្នឹងគណបក្ស កាន់អំណាចហ្នឹងបានខំតាម ហើយព្យាយាមធ្វើម៉េចឲ្យបានប្រាក់ខែឡើងទៅគ្រប់។ អានេះវាជារឿងធម្មតានៅក្នុងប្រទេសមួយដែលមានលទ្ធិប្រជាធិបតេយ្យ គឺគេប្រណាំងប្រជែងគ្នានឹងរឿងគោលនយោបាយ។ គេប្រណាំងប្រជែងគ្នាជាមួយនឹងអ្វីដែលជា តម្រូវការចាំបាច់ក្នុងការជួយពលរដ្ឋរបស់ខ្លួនឯង»។
ចាប់ពីដើមឆ្នាំ ២០១៦នេះ លោក កឹម សុខា បានបង្កើនការចុះជួបក្រុមអ្នកគាំទ្រគណបក្សប្រឆាំងនៅតាមខេត្តនានានៅក្នុងប្រទេសកម្ពុជា។ លោកតែងតែបានលើកឡើងពីការផ្លាស់ប្តូរមេដឹកនាំរដ្ឋាភិបាល នៅគ្រប់ពេលដែលលោកបានជួបក្រុមអ្នកគាំទ្រ៕