ភ្នំពេញ៖ សាលាក្តីខ្មែរក្រហមបានអះអាងនៅថ្ងៃសុក្រនេះថាស្ថានភាពសុខភាពរបស់ជនជាបចោទអៀង សារី មានភាពនឹងនបន្តិចស្របពេលដែលមន្ដ្រីសង្គមស៊ីវិលរិះគន់ថារបាយការណ៍ស្តីពីអាការៈជំងឺរបស់ជនជាប់ចោទគួរតែត្រូវដឹងឮជាសាធារណៈខ្លះ។
លោក នេត្រ ភក្ត្រា អ្នកនាំពាក្យសាលាក្តីពិសេសនេះនិយាយថាអៀង សារី មានស្ថានភាពនឹងនបន្តិច។
«ស្ថានភាពសុខភាពរបស់គាត់គឺនៅថេរចាប់តាំងថ្ងៃម្សិលម៉ិញមក។ ហើយជារៀងរាល់ថ្ងៃក្រុមគ្រូពេទ្យបានបញ្ជូនរបាយការណ៍ទាក់ទងស្ថានភាពសុខភាពលោកអៀងសារី មកកាន់សាលាក្តីដើម្បីជូនដំណឹងអំពីស្ថានភាពសុខភាពនេះ»។
អៀង សារី ដែលឈានដល់វ័យ៨៧ឆ្នាំត្រូវបញ្ជូនទៅកាន់មន្ទីរពេទ្យកាលពីថ្ងៃច័ន្ទ។ មេធាវីរបស់គាត់និយាយថាកូនក្តីរបស់ខ្លួនមានស្ថានភាពធ្ងន់ធ្ងរហើយដកដង្ហើមដោយសារមានជំនួយខ្យល់អុកស៊ីសែន។
លោកឡាត់ គី អ្នកសម្របសម្រួលកម្មវិធីសាលាក្តីខ្មែរក្រហមរបស់អង្គការការពារសិទ្ធិមនុស្សអាដហុក សម្តែងការងឿងឆ្ងល់ថាហេតុអ្វីបានជាការលេចឮព័ត៌មានពីស្ថានភាពធ្ងន់ធ្ងររបស់ជនជាប់ចោទអៀង សារី ប៉ុន្តែសាលាក្តីខ្មែរក្រហមមិនបានបង្ហាញព័ត៌មានអំពីបញ្ហានេះជាសាធារណៈ។
«យើងដូចជាមិនសូវយល់ដែរដោយសារតែពាក់ព័ន្ធនឹងបញ្ហាសុខភាព យើងមិនដែលមានលទ្ធភាពទទួលបានព័ត៌មានទាំងអស់ហ្នឹងពីខាងសាលាក្តី។ យើងគ្រាន់តែបានដឹងថាមានការចូលនិងមានការចេញ(ពីមន្ទីរពេទ្យ)តែប៉ុណ្ណឹង»។
លោក ឡាត់ គី គិតថាស្ថានភាពសុខភាពរបស់ជនជាប់ចោទក្នុងរយៈពេលចុងក្រោយនាំឲ្យមានការព្រួយបារម្ភសម្រាប់ជនរងគ្រោះ។
លោកបណ្ឌិតឡៅ ម៉ុងហៃអ្នកវិភាគឯករាជ្យដែលបានចូលរួមតាមដានដំណើរការសវនាការជាប្រចាំមានប្រសាសន៍ថាតុលាការមានកាតព្វកិច្ចលាក់ការណ៍ចំពោះរបាយការណ៍វេជ្ជបណ្ឌិតអំពីស្ថានភាពជំងឺរបស់អៀង សារី ហើយនេះគឺជាបញ្ហាបច្ចេកទេសដោយរង់ចាំការពិនិត្យនិងការវាយតម្លៃពីក្រុមអ្នកជំនាញ។
ក៏ប៉ុន្តែលោកមានប្រសាសន៍ថាទំនងជាដល់ពេលវេលាថាត្រូវសម្រេចថាតើអៀង សារី អាចចូលរួមសវនាការតទៅទៀតបានឬយ៉ាងណា។
លោក អាង ឧត្តម សហមេធាវីកម្ពុជារបស់អៀង សារី មានប្រសាសន៍ថាលោកមិនបានជួបកូនក្តីរបស់លោកទេនៅថ្ងៃនេះដោយសារតែជាថ្ងៃនេះជាថ្ងៃឈប់សម្រាកទិវាសិទ្ធិនារីអន្តរជាតិ៨មិនាហើយលោកមិនបានដឹងពីស្ថានភាពសុខភាពថ្មីៗរបស់អៀង សារីនោះទេ។
យ៉ាងណាក៏ដោយបើយោងតាមប្រភពស្និទ្ធនឹងសំណុំរឿងខ្មែរក្រហមបានឲ្យដឹងថាអៀង សារី នៅតែស្ថិតក្រោមការដាក់បញ្ចូលខ្យល់អុកស៊ីសែននៅឡើយមកទល់នឹងថ្ងៃសុក្រនេះ។
អង្គជំនុំជម្រះសាលាដំបូងគ្រោងនឹងបើកសវនាការស្តីពីសុខភាពនិងសម្បទាសម្រាប់ចូលរួមសវនាការលើជនជាប់ចោទអៀង សារី និងនួន ជា នៅថ្ងៃទី២៥ខែមិនានេះ៕