កម្ពុជាកំពុងជំរុញទៅមុខនូវច្បាប់ថ្មីដើម្បីទាក់ទាញក្រុមអ្នកវិនិយោគបរទេសឲ្យមកវិនិយោគទៅលើវិស័យកាស៊ីណូនិងឧស្សាហកម្មល្បែងដ៏រីកដុះដាលនេះ ដើម្បីលើកកម្ពស់រាជាណាចក្រនេះឲ្យក្លាយជាមជ្ឈមណ្ឌលល្បែងសំខាន់មួយនៅក្នុងតំបន់អាស៊ីអាគ្នេយ៍។
សំណើច្បាប់ដែលត្រូវបានគេរំពឹងថានឹងអនុម័តក្រោយការបោះឆ្នោតជាតិក្នុងឆ្នាំ២០១៨នេះ ត្រូវបានស្នើជាសេចក្តីព្រាងច្បាប់អស់រយៈពេល៣ឆ្នាំមកហើយ ហើយច្បាប់នេះនឹងគ្រប់គ្រងឧស្សាហកម្មល្បែងដែលនាពេលថ្មីៗនេះបានផ្តល់ប្រាក់ចំណូលពន្ធជិត ៥០លានដុល្លារ។
ក្រុមមន្ត្រីកម្ពុជាបានថ្លែងថា រដ្ឋាភិបាលកំពុងចង់កំណត់អាត្រាពន្ធសម្រាប់កាស៊ីណូពីចន្លោះ ៤ ទៅ៥ភាគរយ ដើម្បីឲ្យស្របជាមួយនឹងកាស៊ីណូក្នុងតំបន់ ដូចជានៅក្នុងប្រទេសសិង្ហបុរីជាដើម។
ពាណិជ្ជកម្មកាស៊ីណូរបស់កម្ពុជា ដែលគ្មានច្បាប់គ្រប់គ្រង បានកើនឡើងឆាប់រហ័ស ចាប់តាំងពីចុងទសវត្សរ៍ ១៩៩០ ដោយមានកាស៊ីណូចំនួន ៦៥ ដែលមានអាជ្ញាប័ណ្ណ ហើយវិស័យនេះត្រូវគ្រប់គ្រងទៅដោយក្រុមហ៊ុនរបស់ហុងកុង ដែលចុះបញ្ជីដូចជា សណ្ឋាគារ Naga World និងមជ្ឈមណ្ឌលកំសាន្តនៅក្នុងទីក្រុងភ្នំពេញ។
ល្បែងស៊ីសងគឺជាពាណិជ្ជកម្មមួយកំពុងលូតលាស់ខ្លាំង
លោកBen Reichel នាយកប្រតិបត្តិនៃក្រុមហ៊ុន Donaco International ដែលមានស្នាក់ការនៅទីក្រុង ស៊ីដនី បានថ្លែងថា នៅទូទាំងតំបន់អាស៊ីអាគ្នេយ៍ មានតម្រូវការសំខាន់ដើម្បីពង្រឹងការរីកលូតលាស់ខ្លាំងនៅក្នុងឧស្សាហកម្មល្បែង។
លោក Reichel បានថ្លែងថា៖
«មានតម្រូវការជាច្រើនដែលមិនសមតាមបំណងនៅក្នុងតំបន់ទាំងមូល។ ប្រសិនបើអ្នកមើលទៅលើចំនួនតុល្បែងក្នុងកាស៊ីណូ ប្រៀបធៀបជាមួយនឹងកន្លែងខ្លះដូចជាសហរដ្ឋអាមេរិក ចំនួនដែលមាននោះគឺមានចំនួនតិចតួច ដែលនេះជាមូលហេតុធ្វើឲ្យមានការប្រកួតប្រជែងខុសច្បាប់ច្រើនកើតមានឡើង»។
កម្ពុជាទទួលបានអត្ថប្រយោជន៍ពីការដាក់កំហិតនិងហាមឃាត់ទាំងស្រុងចំពោះកាស៊ីណូស្របច្បាប់ ដូចនៅក្នុងប្រទេសថៃ ដែលពលរដ្ឋថៃត្រូវបានរារាំងមិនឲ្យចូលលេងល្បែងក្នុងកាស៊ីណូដែលមានក្នុងប្រទេសរបស់ខ្លួន។
នៅក្រៅក្រុងភ្នំពេញដែលកាស៊ីណូ Naga World មានសិទ្ធិផ្តាច់មុខនោះ មានបណ្តុំកាស៊ីណូសំខាន់ៗផ្សេងទៀតនៅក្រុង ប៉ោយប៉ែតនៅជាប់ព្រំប្រទល់ប្រទេសថៃ នៅខេត្តព្រះសីហនុដែលជាក្រុងកំពង់ផែ និងនៅភាគខាងកើតជាប់នឹងព្រំប្រទល់ប្រទេសវៀតណាម។
ប៉ុន្តែការសម្រេចចិត្តមួយដោយក្រុមអាជ្ញាធរវៀតណាមដើម្បីអនុញ្ញាតឲ្យអ្នកលេងល្បែងក្នុងស្រុកអាចចូលលេងក្នុងកាស៊ីណូក្នុងប្រទេសវៀតណាម ត្រូវបានគេមើលឃើញថា កាស៊ីណូទាំងនោះគឺជាការគំរាមកំហែងមួយដល់កាស៊ីណូកម្ពុជាដែលស្ថិតនៅក្បែរព្រំប្រទល់ជាមួយនឹងប្រទេសវៀតណាម។
ភ្នាក់ងាររៀបចំការកំសាន្ត
កត្តាជំរុញដ៏សំខាន់មួយជុំវិញការរីកលូតលាស់នៃពាណិជ្ជកម្មកាស៊ីណូជាទូទៅគឺមកពីអ្នកធ្វើប្រតិបត្តិការ ដែលត្រូវបានគេស្គាល់ថាជា ភ្នាក់ងារ VIP រៀបចំការកំសាន្ត។ តួនាទីរបស់ភ្នាក់ងារទាំងនេះគឺដើរតួជាអ្នកត្រួសត្រាយផ្លូវ អ្នកធានារ៉ាប់រ៉ងចំនួននៃ ប្រាក់ចំណូល ដោយមានផ្តល់ជាកន្លែងស្នាក់នៅ ការដើរកំសាន្តនិងអត្ថប្រយោជន៍ផ្សេងៗទៀតដោយឥតគិតថ្លៃដល់អ្នកលេងល្បែង។
ឥទ្ធិពលនៃភ្នាក់ងារ VIPរៀបចំការកំសាន្តទាំងនោះគឺខ្លាំងណាស់។ កាស៊ីណូ NagaWorld ដែលជាកាស៊ីណូធំបំផុតនៅកម្ពុជា ថ្មីៗនេះត្រូវគេរាយការណ៍ថា បានកើនប្រាក់ចំណូល ១៤០ភាគរយ គឺកើនពី ៨,៧១ ពាន់លានដុល្លារក្នុងឆ្នាំ២០១៦ ដល់ ២១,១ ពាន់លានដុល្លារសម្រាប់ឆ្នាំ២០១៧ នេះបើយោងតាមក្រុមហ៊ុន Naga Corp នៃផ្សារហ៊ុនហុងកុងដែលបានចេញផ្សាយលទ្ធផលហិរញ្ញវត្ថុនៅថ្ងៃទី ២៨ ខែកុម្ភៈ។
ប្រាក់ចំណូលរបស់ក្រុមហ៊ុន NagaWorld គឺជាង ៦២៥ លានដុល្លារនៅក្នុងឆ្នាំ២០១៧ គឺកើនពីជាង ២២៥ លានដុល្លារកាលពីឆ្នាំ២០១៦។ ហើយប្រាក់ចំណេញកើនឡើង ៣៩ភាគរយ គឺកើនរហូតដល់ទៅជាង ២៥៥ លានដុល្លារ។
អ្នកលេងល្បែងជនជាតិចិនគឺជាគោលដៅសំខាន់មួយ
ផលប្រយោជន៍ទៅលើទីផ្សារកម្ពុជាក៏មកពីច្បាប់ដែលធ្វើឲ្យភ្ញៀវជនជាតិចិនមានភាពងាយស្រួលក្នុងការទទួលបានទិដ្ឋាការ។ នៅក្នុងឆ្នាំ២០១៧ ភ្ញៀវជនជាតិចិនបានកើនដល់ជាង ៤០ភាគរយ គឺដល់ទៅ ១លាន២សែននាក់ ដែលលើសចំនួនភ្ញៀវទេសចរវៀតណាម ហើយចិនបានក្លាយជាប្រភពភ្ញៀវទេសចរច្រើនបំផុតនៅក្នុងប្រទេសកម្ពុជា។
លោក Reichel មកពីក្រុមហ៊ុន Donaco បានថ្លែងថា៖ «រដ្ឋាភិបាលបានឲ្យដឹងថា ពួកគេចង់ធ្វើឲ្យចិនក្លាយជាប្រភពភ្ញៀវទេសចរមកកម្ពុជាច្រើនជាងគេបំផុតមួយក្នុងចំណោមប្រភពភ្ញៀវទេសចរកំពូលចំនួនបី ប្រសិនបើមិនបានជាប់ចំណាត់ថ្នាក់ទី១នៃប្រភពទេសចរសម្រាប់តទៅថ្ងៃមុខទៀត»។
នៅក្នុងអត្ថាធិប្បាយដែលបានផ្ញើតាមអ៊ីម៉ែលទៅកាន់ VOA ក្រុមប្រតិបត្តិនៃក្រុមហ៊ុន Suncity Group ដែលមានមូលដ្ឋាននៅទីក្រុងម៉ាកាវបានថ្លែងថា៖«ក្រុមអ្នកលេងល្បែងជនជាតិចិននឹងក្លាយជាក្រុមសំខាន់សម្រាប់ទីផ្សារ VIP នៅក្នុងប្រទេសកម្ពុជា»។
កម្ពុជាក៏ជាជម្រើសមួយទៀតដល់ក្រុមអ្នកលេងល្បែងជនជាតិចិន ក្រៅពីទៅលេងនៅទីក្រុងម៉ាកាវដែលនៅប៉ុន្មានឆ្នាំចុងក្រោយថ្មីៗនេះ ចំនួនភ្ញៀវលេងល្បែង VIP បានធ្លាក់ចុះដោយសារតែការបង្ក្រាបរបស់លោកប្រធានាធិបតី Xi Jinping ទៅលើអំពើពុករលួយ។
តំបន់លេងល្បែងសំខាន់មួយទៀតនៅកម្ពុជា
ក្រុងប៉ោយប៉ែត ដែលជាច្រកព្រំដែនសំខាន់មួយរបស់កម្ពុជាជាមួយនឹងប្រទេសថៃ មានទីតាំងស្ថិតនៅចន្លោះខេត្តសៀមរាប និងបាត់ដំបង។ រដ្ឋាភិបាលកម្ពុជាចង់អភិវឌ្ឍតំបន់ប៉ោយប៉ែតឲ្យកា្លយជាតំបន់ឧស្សាហកម្មមួយ។
លោក Reichel មកពីក្រុមហ៊ុន Donaco ដែលក្រុមហ៊ុននេះគ្រប់គ្រងកាស៊ីណូ Star Vegas នៅក្នុងក្រុងប៉ោយប៉ែត បានថ្លែងថា អ្នកមកលេងល្បែងភាគច្រើនគឺមកពីប្រទេសថៃ ប៉ុន្តែក៏មានអ្នកលេងល្បែងមកពីប្រទេសឥណ្ឌូនេស៊ី ម៉ាឡេស៊ី និងជនបរទេសរស់នៅក្នុងប្រទេសថៃផងដែរ។
លោកបានថ្លែងថា៖
«វាពិតជារីកលូតលាស់យ៉ាងឆាប់រហ័ស ហើយជាមួយនឹងឧស្សាហកម្មកាស៊ីណូនៅទីនោះ គេអាចឆ្លងព្រំប្រទល់ពីប្រទេសថៃ ហើយគេមិនចាំបាច់ប្តូររូបិយប័ណ្ណនោះទេ។ ក្រុងនោះទាំងមូលប្រើប្រាស់លុយបាត ថៃ។ ទីនោះប្រៀបដូចជាផ្នែកមួយនៃប្រទេសថៃនៅលើទឹកដីកម្ពុជាអញ្ជឹង»។
ប៉ុន្តែអ្នកប្រតិបត្តិការមួយចំនួនក៏មានការប្រុងប្រយ័ត្នផងដែរ។ ក្រុមហ៊ុន Amax International ដែលជាក្រុមហ៊ុនវិនិយោគខាងវិស័យល្បែងស៊ីសងដែលមានមូលដ្ឋាននៅទីក្រុងម៉ាកាវ ដែលមានបណ្តាញជាមួយនឹងកម្ពុជា បានថ្លែងថា ជាពិសេសទីផ្សារ VIP អាចមានការប្រែប្រួលឆាប់រហ័ស។
ពាណិជ្ជកម្មល្បែងងាយទទួលផលប៉ះពាល់ពីការធ្លាក់ចុះនៃសេដ្ឋកិច្ច ភាពមិនប្រាកដប្រជា និងកត្តានានាដែលប៉ះពាល់ដល់វិស័យទេសចរណ៍។ ក្រុមហ៊ុន Amax បានបន្ថែមថា បណ្តាប្រទេសនានា ដូចជាប្រទេសចិន «ប្រហែលអាចដាក់ឬសម្រួលការដាក់កំហិតរបស់រដ្ឋាភិបាលទៅលើការប្តូររូបិយប័ណ្ណ ឬសមត្ថភាពនៃការនាំចេញរូបិយប័ណ្ណ»៕
ប្រែសម្រួលដោយ ស្រេង លក្ខិណា