កម្ពុជាកំពុងប្រឈមនឹងការធ្លាក់ចុះនៃជើងយន្តហោះប្រមាណ៥០ភាគរយនៅអាកាសយានដ្ឋានអន្តរជាតិទាំងបីនៅខែកុម្ភៈ បើធៀបនឹងរយៈពេលដូចគ្នាកាលពីឆ្នាំមុន បន្ទាប់ពីវីរុសកូរ៉ូណា Covid-19 ដែលកើតឡើងនៅប្រទេសចិន បានឆ្លងទៅដល់ប្រទេសផ្សេងទៀតក្នុងពិភពលោក។
តាមការរំពឹងទុករបស់ក្រុមហ៊ុន Cambodia Airport ជើងយន្តហោះទាំងទៅទាំងមកសរុបនៅដំណាច់ខែកុម្ភៈនេះនឹងមានការធ្លាក់៥០ភាគរយ ដោយសារជំងឺឆ្លង Covid-19។ នេះយោងតាមលោក ខែក នរិនដា នាយកផ្នែកទំនាក់ទំនងសាធារណៈនៅក្រុមហ៊ុន Cambodia Airport។
លោកបានសរសេរតាមសារអេឡិចត្រូនិកថា៖ «ដោយសារតែការផ្ទុះវីរុសកូរ៉ូណា ចរាចរនៃអ្នកដំណើរបានធ្លាក់ចុះយ៉ាងខ្លាំង។ យើងរំពឹងថានឹងមានការធ្លាក់ចុះ៥០ភាគរយនៅចុងខែកុម្ភៈនេះ ទាំងបីអាកាសយានដ្ឋាន បើប្រៀបធៀបនឹងខែកុម្ភៈឆ្នាំមុន»។
លោកបានបន្តថា ជើងយន្តហោះមកដល់អាកាសយានដ្ឋានអន្តរជាតិទាំងបីក្នុងរយៈពេលបីខែក្នុងឆ្នាំ២០១៩មានការធ្លាក់ចុះ៣,១ភាគរយ ហើយជើងយន្តហោះនៅខេត្តព្រះសីហនុមានការធ្លាក់ចុះយ៉ាងគំហុកបន្ទាប់ពីមានការផ្ទុះឆ្លងវីរុស Covid-19។
លោកបានបន្តថាមាន៖ «ក្រុមហ៊ុនហោះហើរជាច្រើនបានបន្ថយ ឬលុបចោលជើងយន្តហោះដោយសារតែតម្រូវការធ្លាក់ចុះ ដែលការណ៍នេះនឹងប៉ះពាល់ដល់សេដ្ឋកិច្ចកម្ពុជានិងអាកាសយានដ្ឋានកម្ពុជា»។
លោក ខែក នរិនដា បានឲ្យដឹងថា លោកមិនទាន់អាចកំណត់ផលប៉ះពាល់បាននៅឡើយទេពេលនេះ។
តារាងបង្ហាញជើងយន្តហោះនៅស្ថានីយ៍ដំណើរមកដល់នៅអាកាសយានដ្ឋានអន្តរជាតិភ្នំពេញ នៅរាជធានីភ្នំពេញ ថ្ងៃទី ២៤ ខែមករា ឆ្នាំ២០២០។ (ខាន់ សុគុំមនោ/VOA)
ប៉ុន្តែលោកថា ជើងយន្តហោះនៅអាកាសយានដ្ឋានអន្តរជាតិខេត្តព្រះសីហនុមានការធ្លាក់ចុះ៦២ភាគរយ នៅសៀមរាប៦០ភាគរយ និង៤០ភាគរយនៅអាកាសយានដ្ឋានអន្តរជាតិភ្នំពេញ នៅត្រឹមខែកុម្ភៈ។
VOA បានព្យាយាមទាក់ទងសុំការអធិប្បាយពីលោកជា អូន អ្នកនាំពាក្យអាកាសចរស៊ីវិល តែមិនអាចទាក់ទងបាននោះទេ រហូតមកដល់ល្ងាចថ្ងៃសុក្រនេះ។
ចាប់តាំងពីមានការផ្ទុះវីរុស Covid-19 ដែលមានប្រភពមកពីប្រទេសចិននេះមក ប្រមុខរដ្ឋាភិបាលកម្ពុជាលោក ហ៊ុន សែនបានប្រកាសថា កម្ពុជានឹងមិនបិទជើងយន្តហោះទៅឬមកពីប្រទេសចិននោះទេ។
យ៉ាងណាក៏ដោយ អ្នកស្រីឆាយ ស៊ីវលីន ប្រធានសមាគមទីភ្នាក់ងារទេសចរកម្ពុជា និយាយថា ភ្ញៀវទេសចរបរទេសជាច្រើនបានលុបចោលការកក់ការស្នាក់នៅតាមសណ្ឋាគារនិងសេវាកម្មទេសចរផ្សេងៗហើយ ក្នុងនោះគឺមានភ្ញៀវទេសចរចិនជាង៩០ភាគរយ។
អ្នកស្រីបាននិយាយថា៖ «បារម្ភរឿងអត់ភ្ញៀវ។ ផ្នែកខាងទេសចរគឺយើងអាស្រ័យទៅលើភ្ញៀវអ៊ីចឹងណា៎។ បើភ្ញៀវអត់មកយើងបានអីរស់។ តើយើងអាចឈរជើងនឹងអត់ ព្រោះយើងត្រូវការចំណាយជារៀងរាល់ថ្ងៃជារៀងរាល់ខែ»។
VOA មិនអាចទាក់ទងលោកតុប សុភ័ក អនុរដ្ឋលេខាធិការ និងអ្នកនាំពាក្យក្រសួងទេសចរបានទេនៅរសៀលថ្ងៃសុក្រនេះ។
ជំងឺឆ្លងវីរុស Covid-19 ឬវីរុសកូរ៉ូណាបានផ្ទុះតាំងពីខែមករាចេញមកពីទីក្រុងវូហាន ខេត្តហ៊ូប៉េប្រទេសចិន ហើយឥឡូវបានរាលដាលពាសពេញពិភពលោក ដូចជាកូរ៉េខាងត្បូង ជប៉ុន ថៃអ៊ីតាលី អ៊ីរ៉ង់ និងសហរដ្ឋអាមេរិកជាដើម នៅដើមឆ្នាំ២០២០នេះ។
យោងតាមរបាយការណ៍របស់អង្គការសុខភាពពិភពលោក គិតត្រឹមថ្ងៃទី២៧ ខែកុម្ភៈនេះមានមនុស្សជាង៨ម៉ឺននាក់ឆ្លង និងជាង២.៧០០នាក់ស្លាប់៕