អស់រយៈពេលជិត៥ខែនៃការឆ្លងរាលដាលខ្លាំងក្លានៃជំងឺកូវីដ១៩ក្នុងប្រទេស ដែលមិនធ្លាប់មាន ស្ថានភាពអាសន្ននៃជំងឺរាតត្បាតជាសាកលនេះ អាចនឹងវិវត្តទៅរកសភាពអាក្រក់ជាងនេះនៅកម្ពុជា។ នេះបើតាមមន្ត្រីអង្គការសុខភាពពិភពលោក (WHO) និងមន្ត្រីក្រសួងសុខាភិបាលកម្ពុជា។
វេជ្ជបណ្ឌិត Li Ailan តំណាងប្រចាំប្រទេសកម្ពុជានៃអង្គការសុខភាពពិភពលោក បានសរសេរក្នុងទំព័រTwitter របស់ខ្លួនកាលពីថ្ងៃសៅរ៍កន្លងទៅនេះ ដោយបានបង្ហាញក្ដីបារម្ភពីសមត្ថភាពទទួលព្យាបាលរបស់ប្រព័ន្ធសុខាភិបាលតបនឹងកំណើនជាគំហុកនៃករណីឆ្លងជំងឹកូវីដ១៩។
អ្នកស្រីបានសរសេរថា៖ «កម្ពុជាកំពុងធ្វើដំណើរតម្រង់ទៅរកការឆ្លងរាលដាលក្នុងសហគមន៍ទ្រង់ទ្រាយធំ[នៃវីរុសកូវីដ១៩] និងការជន់ជោរលើសលប់ហួសកម្រិតសមត្ថភាពទទួលបាននៃសេវាថែទាំកម្រិតធ្ងន់តាម មន្ទីរពេទ្យនានា បើសិនជាវិធានការបុគ្គលនិងសង្គមមិនត្រូវបានអនុវត្តឱ្យបានជាបន្ទាន់ ពោរពេញដោយទំនួលខុសត្រូវ និងប្រកបដោយប្រសិទ្ធភាពទេនោះ»។
វេជ្ជបណ្ឌិត Li Ailan បានសរសេរបន្តទៀតថា៖«គួរឱ្យសោកស្ដាយ វីរុសនេះនៅតែបន្តធ្វើដំណើរឆ្លងរាលដាលយ៉ាងធំធេង ហើយនឹងមានការបាត់បង់ជីវិតមនុស្សជាច្រើនបន្ថែមទៀត»។
មន្ត្រីអង្គការសុខភាពពិភពលោករូបនេះបានបន្ថែមថា៖ «ជាអកុសល [មកទល់ពេលនេះ]មិនទាន់មានសោះឡើយនូវសញ្ញាវិជ្ជមាននៃការដែលអាចបង្អង់ល្បឿននៃការចម្លងរាលដាល។ អត្រាឆ្លងថ្មីនិងស្លាប់ជាមធ្យមប្រចាំសប្ដាហ៍នៅតែកំពុងកើនឡើង។ វិធានការដែលកំពុងដាក់ចេញជាធរមាននាពេលនេះ មិនទាន់គ្រប់គ្រាន់ ហើយអន្តរាគមន៍ថ្មីៗនានាពិតជាចាំបាច់ត្រូវដាក់ចេញ»។
វេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាលក៏បានសរសេរនៅលើទំព័រ Twitter របស់អ្នកស្រីកាលពីថ្ងៃសៅរ៍ដែរថាគ្រោះអាសន្នកំពុងតែឈានមកដល់នៃស្ថានភាពកូវីដនៅកម្ពុជា។
«យើងកំពុងមានការបារម្ភអំពីការឆ្លងផុតបន្ទាត់ក្រហមប្រសិនបើជាមហាជននៅតែបន្តបន្ធូរបន្ថយនូវវិធានការបង្ការការពារនានា។ យើងត្រូវតែធ្វើសកម្មភាពប្រកបដោយទំនួលខុសត្រូវឥឡូវនេះដើម្បីកែកុនស្ថានការណ៍ឱ្យរកសភាពដើមវិញ។ ការឆ្លងទ្រង់ទ្រាយធំក្នុងសហគមន៍កំពុងស្ថិតនៅចំពីមុខយើងហើយ បើសិនជាមានការចូលរួមតិចតួចពីបុគ្គល បណ្ដាក្រុមគ្រួសារ និងវិធានការមិនមែនសុខាភិបាលនានា»។
នាសប្ដាហ៍កន្លងទៅ គឺចាប់ពីថ្ងៃទី៥ខែកក្កដា ដល់ថ្ងៃទី១១ខែកក្កដា ក្រសួងសុខាភិបាលបានរកឃើញការឆ្លងកូវីដ១៩ថ្មីចំនួន៦.៦៨៣ ករណី ក្នុងនោះមាន១.៥៣៣ ជាករណីនាំចូលនិងមានការស្លាប់មនុស្សចំនួន១៧៧នាក់។ ជាមធ្យមមួយថ្ងៃឆ្លងថ្មី៩៥៤ករណី និងស្លាប់២៥នាក់។
ក្នុងរយៈពេលមួយសប្តាហ៍ គិតពីថ្ងៃទី២៨ខែមិថុនា ដល់ថ្ងៃទី៤ខែកក្កដា ក្រសួងសុខាភិបាលបានរកឃើញការឆ្លងកូវីដ១៩ថ្មីចំនួន៦.៦៥៥ ករណី ក្នុងនោះមាន១.០២៩ ជាករណីនាំចូល និងមានការស្លាប់មនុស្សចំនួន១៩២នាក់។ ជាមធ្យមក្នុងសប្តាហ៍នោះមួយថ្ងៃឆ្លងថ្មី ៩៥០ករណី និងស្លាប់២៧ នាក់។
អត្រាឆ្លងជាមធ្យមនារយៈពេលពីរសប្ដាហ៍កន្លងទៅនេះ មានកំណើនខ្ពស់ជាងអត្រាឆ្លងនិងស្លាប់ជាមធ្យម កាលពីខែមិថុនាកន្លងទៅ ដែលបានរកឃើញករណីឆ្លងថ្មី២០.៦៧៤នាក់ និងស្លាប់ ៤០៨នាក់ ដែលជាមធ្យមក្នុងមួយថ្ងៃៗ មានករណីឆ្លងថ្មី៦៨៩នាក់ និងស្លាប់១៣នាក់។
រូបឯកសារ៖ ភ្នាក់ងារសុខាភិបាលចាត់ចែងបូជាសាកសពអ្នកជំងឺកូវីដ១៩ម្នាក់នៅស្រុកកំពង់ត្រាច ខេត្តកំពត កាលពីខែមិថុនា ឆ្នាំ២០២១។ (រូបថត៖ ហ្វេសប៊ុកស្នងការដ្ឋាននគរបាលខេត្តកំពត)
ដើម្បីបន្ធូរបន្ថយបន្ទុកលើមន្ទីរសម្រាកព្យាបាលនានា ក្រសួងសុខាភិបាលបានអនុញ្ញាតជាផ្លូវការឱ្យមានការព្យាបាលតាមផ្ទះសម្រាប់អ្នកជំងឺកូវីដ១៩ដែលមានស្ថានភាពជំងឺស្រាល ឬគ្មានរោគសញ្ញា ដែលមន្ត្រីបានលើកឡើងនៅថ្ងៃចន្ទនេះថាមានរង្វង់ពី៧៥%ទៅ៨០%នៃករណីសរុប។
នៅរាជធានីភ្នំពេញតែមួយ ត្រឹមព្រឹកថ្ងៃចន្ទ មានអ្នកជំងឺកំពុងសម្រាកព្យាបាលតាមផ្ទះចំនួន១.០៣៣នាក់។ នេះបើយោងតាមវេជ្ជបណ្ឌិត ងី មានហេង ប្រធានមន្ទីរសុខាភិបាលរាជធានី។
កំណើននៃការឆ្លងនេះ កើតមានឡើងចំពេលដែលដំណើរការចាក់ថ្នាំបង្ការឬវ៉ាក់សាំងប្រឆាំងកូវីដ១៩សម្រេចបានជិត៥លាននាក់នៅទូទាំងប្រទេស ហើយរាជធានីភ្នំពេញទើបបានបិទបញ្ចប់ការចាក់វ៉ាក់សាំងពេញលេញ ដែលមានមនុស្សប្រមាណ១លាន៧សែននាក់បានទទួលវ៉ាក់សាំង។
ឆ្លើយតបនឹងសំណួររបស់អ្នកសារព័ត៌មាននៅអាកាសយានដ្ឋានអន្តរជាតិភ្នំពេញកាលពីថ្ងៃសៅរ៍សប្តាហ៍មុន វេជ្ជបណ្ឌិតយក់ សម្បត្តិ រដ្ឋលេខាធិការក្រសួងសុខាភិបាល បានលើកឡើងថាក្រុមជំនាញរបស់រដ្ឋកំពុងពិនិត្យសិក្សាលើប្រសិទ្ធភាពនៃវ៉ាក់សាំងដែលបានចាក់ជូនពលរដ្ឋ។
អ្នកស្រីបញ្ជាក់ថា៖ «ហើយចំពោះប្រសិទ្ធភាពវ៉ាក់សាំង ដូចខ្ញុំធ្លាប់ជម្រាបជូនហើយ ថាវ៉ាក់សាំងអាចការពារយើងមិនឱ្យវិវត្តទៅរកសភាពធ្ងន់ធ្ងរ ឬស្លាប់បាន ប៉ុន្តែបើសិនជាយើងមិនការពារនិងមិនអនុវត្ត«៣កុំ៣ការពារ»យើងអាចងាយនឹងចម្លង ទោះបីយើងចាក់វ៉ាក់សាំង២ដូសក្ដី»។
ក្នុងចំណោមមនុស្សជិត៥លាននាក់ ដែលបានទទួលវ៉ាក់សាំងគិតត្រឹមថ្ងៃអាទិត្យមានប្រមាណ១លាន៦សែននាក់ដែលបានទទួលវ៉ាក់សាំង BBIBP-CorV ផលិតដោយ Sinopharm មានប្រមាណ៣លាននាក់ បានទទួលវ៉ាក់សាំង CoronaVac ផលិតដោយSinovac។
បណ្ដាប្រទេសក្នុងតំបន់ រួមមានថៃ ឥណ្ឌូណេស៊ី និងសិង្ហបុរី កាលពីប៉ុន្មានសប្ដាហ៍កន្លងមកបានសម្ដែងការបារម្ភអំពីប្រសិទ្ធភាពនៃវ៉ាក់សាំង CoronaVac របស់ក្រុមហ៊ុន Sinovac ជាពិសេសក្នុងការប្រយុទ្ធនឹងវីរុសកូវីដប្រភេទបំប្លែងថ្មីដូចជាដែលតា (Delta) និងអាល់ហ្វា (Alpha)។
មានការកត់ត្រានិងការបញ្ជាក់នាពេលកន្លងមក ថាវីរុសកូវីដ១៩បំប្លែងថ្មីប្រភេទអាល់ហ្វា(Alpha) ដែលរកឃើញដំបូងនៅចក្រភពអង់គ្លេស មានចំណែកភាគច្រើន ក្នុងចំណោមអ្នកជំងឺកូវីដ១៩ ដែលបានតេស្ដវិជ្ជមាន និងសម្រាកព្យាបាលក្នុង«ព្រឹត្តិការណ៍២០កុម្ភៈ»នេះ។
តំណាងក្រុមហ៊ុនSinovac ត្រូវបានទីភ្នាក់ងារព័ត៌មាន Reuters ដកស្រង់សម្ដីថាវ៉ាក់សាំងពីរដូសរបស់ខ្លួនមានប្រសិទ្ធភាពធ្លាក់ចុះ៣ដងតបទល់នឹងវីរុសកូវីដប្រភេទដែលតាតែថាការចាក់ដូសទីបីនឹងបង្កើនប្រសិទ្ធភាពទល់នឹងកូវីដបំប្លែងថ្មី ទោះក្រុមហ៊ុនមិនបានផ្ដល់ទិន្នន័យ។
កាលពីសប្តាហ៍មុន កម្ពុជាក៏បានប្រកាសថាខ្លួនកំពុងពិចារណាចាក់វ៉ាក់សាំងដូសទីបីដល់ពលរដ្ឋដែលទទួលបានវ៉ាក់សាំងពីរដូសរួចហើយផងដែរ ខណៈការចាក់ពីរដូសដំបូងកំពុងពង្រីកវិសាលភាពទៅបណ្ដាខេត្តតាមទីជនបទ ដែលអាទិភាពអាស្រ័យលើកម្រិតហានិភ័យលើតំបន់នីមួយៗ។
រដ្ឋាភិបាលលោកនាយករដ្ឋមន្ត្រី ហ៊ុន សែន បានប្រកាសយកវ៉ាក់សាំងចិនជា «បង្អែកយុទ្ធសាស្ត្រ»ក្នុងយុទ្ធនាការចាក់ពង្រាយវ៉ាក់សាំងដល់ប្រជាជនគោលដៅ១០លាននាក់។ ក្នុងចំណោមវ៉ាក់សាំងប្រមាណ១៦លានដូសដែលកម្ពុជាបានទទួលគិតត្រឹមថ្ងៃចន្ទ មាន១៥លាន៧សែនដូសបញ្ជូនពីប្រទេសចិន ដែលជាជំនួយឥតសំណងខ្លះ និងការបញ្ជាទិញភាគច្រើន។
តបនឹងសំណួររបស់វីអូអេ កាលពីថ្ងៃសុក្រ វេជ្ជបណ្ឌិត Li Ailan ដែលជាអតីតសាស្ត្រាចារ្យនៅសាកលវិទ្យាល័យ Beijing (ប៉េកាំង) និងជាអតីតមន្ត្រីក្រសួងសុខាភិបាលចិន បានលើកឡើងថាវ៉ាក់សាំង Sinovac នៅតែមានប្រសិទ្ធភាពបង្ការការឈឺធ្ងន់ និងទទួលមរណភាពដោយវីរុសកូវីដ១៩។
វេជ្ជបណ្ឌិត Li បានសរសេរថា៖ «ព្រមពេលជាមួយគ្នា គេក៏ត្រូវត្រួតពិនិត្យអង្កេតលើវីរុសកូវីដ១៩បំប្លែងខ្លួនថ្មីនិងប្រសិទ្ធភាពនៃវ៉ាក់សាំងនានាផងដែរ។ អង្គការសុខភាពពិភពលោកនៅតែផ្ដល់អនុសាសន៍ឱ្យកម្ពុជាបន្តការចាក់វ៉ាក់សាំងកូវីដ១៩ជូនពលរដ្ឋឱ្យបានរហ័សបំផុតតាមតែដែលអាចធ្វើទៅបាន»។
គិតត្រឹមថ្ងៃចន្ទនេះ កម្ពុជាបានកត់ត្រាករណីឆ្លងកូវីដសរុបជាង៦ម៉ឺននាក់ ដែលក្នុងនោះមានករណីជាសះស្បើយជាង៥៣.០០០នាក់ និងករណីស្លាប់ចំនួន៩២៥នាក់៕