តំណាងទូតចិនប្រចាំនៅកម្ពុជា បានថ្លែងកាលពីថ្ងៃពុធថា ប្រទេសចិន «ពុំមានគំនិតចង់ល្អតែឯង» នោះទេ ហើយចាត់ទុកវ៉ាក់សាំងបង្ការជំងឺកូវីដ១៩ ជាផលិតផលសុខភាពសាធារណៈដែលត្រូវផ្តល់ដល់ប្រទេសផ្សេងៗ ដូចកម្ពុជាផងដែរ ដែលជា«មិត្តដែកថែប»របស់ចិន។ ការថ្លែងរបស់ឯកអគ្គរដ្ឋទូតចិនប្រចាំកម្ពុជា ធ្វើឡើងនៅក្នុងពិធីមួយ ដែលកម្ពុជាទទួលវ៉ាក់សាំងផលិតដោយរដ្ឋចិនឈ្មោះ ស៊ីណូហ្វាម (Sinopharm) ចំនួន ៧០ ម៉ឺនដូស ដែលជាជំនួយឥតសំណង។
ក្នុងពិធីប្រគល់និងទទួលវ៉ាក់សាំង ដែលធ្វើឡើងនៅអាកាសយានដ្ឋានអន្តរជាតិភ្នំពេញ នៅពេលយប់ថ្ងៃទី ៣១ ខែមីនា ភាគីទាំងពីរបានប្រកាសចំណងទាក់ទងរវាងប្រទេសទាំងពីរកាន់តែរឹងមាំបន្ថែមទៀត។
លោក Wang WenTian ឯកអគ្គរដ្ឋទូតចិនប្រចាំនៅកម្ពុជា បានថ្លែងថា មនុស្សជាច្រើនបានសួរថាប្រទេសចិនមានប្រជាជនច្រើន ហើយវ៉ាក់សាំងក៏ខ្វះខាតផងដែរ ប៉ុន្តែហេតុអ្វីបានជាផ្តល់ជំនួយជាវ៉ាក់សាំងដល់កម្ពុជា។ លោកបញ្ជាក់ថា ប្រទេសចិនចាត់ទុកតម្រូវការវ៉ាក់សាំងបង្ការជំងឺកូវីដ១៩ ជាការកសាងសហគមន៍សុខាភិបាលមួយ ហើយចិនត្រូវតែជួយកម្ពុជា ដែលជាមិត្តដែកថែបរបស់ចិន។
លោកថ្លែងតាមរយៈអ្នកបកប្រែថា៖ «ប្រឈមមុខនឹងវីរុសកូវីដ១៩ ដែលជាវីរុសរាតត្បាតទូទាំងសាកលលោក ប្រទេសចិននិងប្រទេសមហាអំណាចមួយចំនួន បានអនុវត្តគោលនយោបាយខុសគ្នាឆ្ងាយណាស់។ ប្រទេសចិនគ្មានគំនិតចង់ល្អតែខ្លួនឯងនោះទេ ដោយបានប្រកាន់ខ្ជាប់គំនិតជួយសង្រ្គោះអ្នកដទៃ»។
លោកបន្ថែមថា៖ «ទីពីរ គឺតម្រូវការកសាងសហគមន៍ជោគវាសនារួមរវាងចិននិងកម្ពុជា។ កិច្ចសហប្រតិការលើវិស័យសុខាភិបាល ជាផ្នែកមួយដ៏សំខាន់នៃការកសាងសហគមន៍ជោគវាសនារួម រវាងចិននិងកម្ពុជា។ ចាប់ផ្តើមពីការផ្ទុះឡើងនៃវីរុសកូវីដ១៩ មក ប្រទេសនិងប្រទេសនិងប្រជាជនទាំងពីរតែងតែជួយគ្នាទៅវិញទៅមក ពុះពាររាល់ការលំបាក និងឧបសគ្គជាមួយគ្នា»។
នៅលើធុងដាក់វ៉ាក់សាំងនេះ មានបិទរូបភាពទង់ជាតិនៃប្រទេសទាំងពីរ និងសារជាភាសាចិននិងខ្មែរថា «ជឿទុកចិត្តគ្នា ជួយយកអាសាគ្នាទៅវិញទៅមក»។
នៅក្នុងពិធីនោះដែរ លោក ទៀ បាញ់ រដ្ឋមន្រ្តីក្រសួងការពារជាតិ បានថ្លែងថា ការផ្តល់ជំនួយឥតសំណងជាវ៉ាក់សាំងជុំទី ២ នេះ បានឆ្លុះបញ្ចាំងយ៉ាងច្បាស់អំពី «ចំណងមិត្តភាពដែកថែប» និង «កិច្ចសហប្រតិបត្តិការដ៏រឹងមាំ» រវាងប្រទេសទាំង២។
លោកថ្លែងថា៖ «ក្នុងនាមរដ្ឋាភិបាល ក្រសួងការពារជាតិ និងប្រជាជនកម្ពុជា ពិតជាមានការដឹងគុណដ៏ជ្រាលជ្រៅចំពោះរដ្ឋាភិបាលនិងប្រជាជនចិន ដែលបានផ្តល់អំណោចនិងជំនួយសប្បុរសធម៌ជាច្រើន ជាពិសេសការផ្តល់វ៉ាក់សាំងការពារជំងឺកូវីដ១៩ ជាជំហានទី ២ ចំនួន ៧០ ម៉ឺនដូស តាមរយៈក្រសួងការពារជាតិ សម្រាប់ចាក់ជូនកងទ័ពនិងប្រជាជនកម្ពុជាក្នុងកាលៈទេសៈដ៏លំបាកនេះ»។
នៅលើទំព័រហ្វេសប៊ុក លោកនាយករដ្ឋមន្រ្តី ហ៊ុន សែន កាលពីយប់ថ្ងៃពុធ បានលើកឡើងថា៖ «កម្ពុជាសូមអរគុណមិត្តចិនដែលតែងតែជួយដល់កម្ពុជា ជាពិសេសក្នុងពេលដែលកម្ពុជាកំពុងប្រយុទ្ធប្រឆាំងនឹងជំងឺកូវីដ១៩»។
វ៉ាក់សាំង ៧០ ម៉ឺនដូស ដែលផ្តល់ដោយចិននេះ ក្នុងនោះ ៣០ ម៉ឺនដូស ប្រគល់ជូនក្រសួងការពារជាតិ និង ៤០ ម៉ឺនដូសប្រគល់ជូនទៅក្រសួងសុខាភិបាល។ វ៉ាក់សាំងកូវីដ១៩ ស៊ីណូហ្វាម ៧០ ម៉ឺនដូសនេះ គឺជាការផ្តល់ជូនលើកទី ២ បន្ថែមពីលើជំនួយលើកទី ១ ចំនួន ៦០ ម៉ឺនដូស ដែលបានដឹកមកដល់កម្ពុជា កាលពីថ្ងៃទី ៧ ខែកុម្ភៈ។
លោកបណ្ឌិត អ៊ា សុផល ដែលជាសាស្ត្រាចារ្យនៃមហាវិទ្យាល័យ Occidental College ក្នុងទីក្រុង Los Angeles រដ្ឋកាលីហ្វ័រញ៉ា សហរដ្ឋអាមេរិក មានប្រសាសន៍ថា ការផ្តល់វ៉ាក់សាំងបង្ការជំងឺកូវីដ១៩ ជាកាយវិការមនុស្សធម៌មួយរបស់ចិនដែលមានប្រជាជនដល់ទៅ ១.៣០០ លាននាក់ ហើយត្រូវការវ៉ាក់សាំង ប៉ុន្តែសុខចិត្តផ្តល់ដល់កម្ពុជា។
លោកបញ្ជាក់ថា នេះជា «ជាតិនិយមវ៉ាក់សាំងនិងការទូតកូវីដ» ដែលប្រទេសចិនផលិតវ៉ាក់សាំងបញ្ចេញវ៉ាក់សាំងទៅប្រទេសកំពុងអភិវឌ្ឍន៍ផ្សេងៗ ដូចជាកម្ពុជាជាដើម។ លោកថា កម្ពុជាដែលសុំវ៉ាក់សាំងពីចិន ពុំមានជម្រើសអ្វីក្នុងការទទួលយកវ៉ាក់សាំងទាំងនេះ ខណៈលោករិះគន់ប្រសិទ្ធភាពនៅទាបនៅឡើយ។ ទោះជាយ៉ាងណា លោក អ៊ា សុផល លើកឡើងថា វាគ្រាន់បើជាងពុំមានវ៉ាក់សាំងសម្រាប់ចាក់បង្ការជំងឺកូវីដ១៩។
អ្នកជំនាញខាងសុខភាពរបស់អង្គការសុខភាពពិភពលោក (WHO) បានប្រកាសកាលពីថ្ងៃពុធថា ប្រសិទ្ធភាពវ៉ាក់សាំងរបស់ចិន គឺស៊ីណូហ្វាម ដែលផលិតដោយរដ្ឋចិន និងស៊ីណូវ៉ាក់ (Sinovac) ដែលផលិតដោយក្រុមហ៊ុននៅទីក្រុងប៉េកាំង ត្រូវនឹងស្តង់ដារដែលជាតម្រូវការរបស់អង្គការសុខភាពពិភពលោក ប៉ុន្តែអ្នកជំនាញថា មិនទាន់មានទិន្នន័យគ្រប់គ្រាន់សម្រាប់ប្រសិទ្ធភាពទៅលើមនុស្សចាស់ជរា និងអ្នកមានផ្ទុកជំងឺស្រាប់។
កាលពីសប្តាហ៍មុន វ៉ាក់សាំងដែលផលិតដោយក្រុមហ៊ុននៅប្រទេសចិន ឈ្មោះស៊ីណូវ៉ាក់ ចំនួន ១ លាន ៥ សែនដូស ដែលកម្ពុជាបានទិញក្នុងតម្លៃសរុប ១៥ លានដុល្លារអាមេរិក ត្រូវបានបញ្ជូនមកដល់កម្ពុជា។ វ៉ាក់សាំងនេះអាចចាក់មនុស្សបាន ៧៥ ម៉ឺននាក់ ដោយសារមនុស្សម្នាក់ត្រូវការចំនួន ២ ដូស ក្នុងចន្លោះ ១៤ ថ្ងៃ។
ក្រសួងសុខាភិបាល កាលពីថ្ងៃពុធ បានប្រកាសយុទ្ធនាការចាក់វ៉ាក់សាំងស៊ីណូវ៉ាក់នេះ ដែលចាប់ផ្តើមពីថ្ងៃទី ១ ខែមេសា ឆ្នាំ ២០២១ នេះតទៅ។ ក្រសួងសុខាភិបាលបញ្ជាក់ថា វ៉ាក់សាំងនេះអាចចាក់មនុស្សអាយុពី ១៨ ឆ្នាំឡើងទៅ ដោយមិនកំណត់អាយុក្រោម ៦០ ឆ្នាំ ដូចស៊ីណូហ្វាមនោះទេ។ កម្ពុជាមានផែនការចាក់វ៉ាក់សាំងដល់ប្រជាជនយ៉ាងតិចចំនួន ១០ លាននាក់។
កាលពីថ្ងៃពុធ ក្នុងពិធីប្រគល់និងទទួលវ៉ាក់សាំង ឯកអគ្គរដ្ឋទូតចិនប្រចាំនៅកម្ពុជា លោក Wang WenTian បានប្រកាសទៀតថា លោកសង្ឃឹមថា លោកនឹងចូលរួមទទួលវ៉ាក់សាំងរបស់ចិនបន្ថែមទៀតនៅពេលខាងមុខ៕