សេចក្តីសម្រេចរបស់តុលាការហុងកុងឱ្យបង្កើតយន្តការឯករាជ្យសម្រាប់បណ្តឹងប្រឆាំងនឹងប៉ូលិសបានជួយដល់ការអំពាវនាវឲ្យប៉ូលិសនៅហុងកុងទទួលខុសត្រូវចំពោះមុខច្បាប់ទាក់ទងនឹងការប្រព្រឹត្តរបស់ពួកគេ។
សេចក្តីសម្រេចរបស់តុលាការហុងកុងបានពង្រឹងការអំពាវនាវឱ្យបង្កើតយន្តការឯករាជ្យមួយសម្រាប់បណ្តឹងប្រឆាំងនឹងប៉ូលិសចំពេលមានការទាមទារយ៉ាងខ្លាំងទាំងក្នុងនិងក្រៅប្រទេសប្រឆាំងការចាប់ខ្លួនតាមអំពើចិត្តនិងការប្រើប្រាស់កម្លាំងហួសហេតុរបស់ប៉ូលិស។
កាលពីមុនក្រុងហុងកុងត្រូវបានគេចាត់ទុកថាជាតំបន់ល្អបំផុតនៅអាស៊ីតែឥឡូវប៉ូលិសដែលមានកម្លាំង៣ម៉ឺននាក់នៅទីក្រុងនេះបានរងនូវការរិះគន់ចំពោះសកម្មភាពក្នុងកំឡុងពេលមានបាតុកម្មរីករាលដាលប្រឆាំងរដ្ឋាភិបាលនៅទីក្រុងហុងកុងកាលពីឆ្នាំមុន។ឧស្ម័នបង្ហូរទឹកភ្នែកកាំភ្លើងបាញ់ទឹកបំពុងបាញ់ជាតិហឹរហើយនិងដំបងត្រូវបានប៉ូលិសប្រើយ៉ាងទូលំទូលាយដើម្បីបំបែកក្រុមអ្នកតវ៉ាដែលកំពុងពុះកញ្ជ្រោល។
នៅថ្ងៃទី២៩ខែវិច្ឆិកាតុលាការដំបូងនៅទីក្រុងហុងកុងបានសម្រេចក្តីស្របទៅតាមសមាគមអ្នកកាសែតហុងកុង។ តុលាការបានបញ្ជាក់ថាប្រព័ន្ធការិយាធិបតេយ្យដែលមានស្រាប់គឺមិនគ្រប់គ្រាន់សម្រាប់ការស៊ើបអង្កេតបណ្តឹងប្រឆាំងនឹងការរំលោភបំពានរបស់ប៉ូលិសលើច្បាប់ស្តីពីសិទ្ធិពលរដ្ឋរបស់ទីក្រុងនេះទាក់ទងនឹងការធ្វើទារុណកម្មនិងការធ្វើបាបយ៉ាងព្រៃផ្សៃទេ។តុលាការបាននិយាយថាការដែលសមត្ថកិច្ចប៉ូលិសមិនធ្វើតាមតម្រូវការឱ្យមន្រ្តីប្រឆាំងកុបកម្មបង្ហាញស្លាកឈ្មោះនិងអត្តលេខរបស់ពួកគេនៅក្នុងពេលមានការតវ៉ានោះបានរំលោភលើច្បាប់ស្តីពីសិទ្ធិពលរដ្ឋហុងកុង។
មន្ត្រីប៉ូលិសហុងកុងបង្ហាញបដាព្រមានមួយ ក្នុងទិវាជាតិចិន នៅក្រុងហុងកុងកាលពីថ្ងៃទី១ ខែតុលា ឆ្នាំ២០២០។
លោក Eric Cheung Tat-ming សាស្ត្រាចារ្យនិងជានាយកអប់រំផ្នែកច្បាប់នៅសាកលវិទ្យាល័យហុងកុងបានមានប្រសាសន៍ថា៖«ប្រសិនបើរដ្ឋាភិបាលនៅតែគោរពតុលាការរដ្ឋាភិបាលគួរតែទទួលខុសត្រូវក្នុងការកែតម្រូវបញ្ហា»។
លោកថា៖ «ប្រសិនបើរដ្ឋាភិបាលចាញ់ក្តីរឿងបណ្តឹងឧទ្ធរណ៍របស់ខ្លួន[នៅជំហានបន្ទាប់នៅក្នុងសាលាឧទ្ធរណ៍]វានឹងត្រូវចំណាយពេលខ្លះដើម្បីបង្កើតយន្តការថ្មី។ ប្រសិនបើមន្រ្តីមិនអើពើនឹងការលើកឡើងរបស់ចៅក្រមវានឹងត្រូវបានចាត់ទុកថាបដិសេធសេចក្តីសម្រេចនេះ»។
លោក Cheung បានធ្វើការអំពាវនាវជាថ្មីម្តងទៀតឲ្យស្ថាប័នឯករាជ្យដំណើរការពាក្យបណ្តឹងនិងកែកំហុសវិជ្ជាជីវៈក៏ដូចជាការចោទប្រកាន់មិនពិតណាមួយប្រឆាំងនឹងមន្ត្រីប៉ូលិស។អ្នកគាំទ្រការអំពាវនាវនេះរួមមានអ្នកតាក់តែងច្បាប់ដែលគាំទ្ររដ្ឋាភិបាល។
លោក Cheung បានមានប្រសាសន៍ថា៖«តាមរយៈការធ្វើបែបនេះរដ្ឋាភិបាលអាចស្តារទំនុកចិត្តសាធារណៈចំពោះប៉ូលិស។ដូចគ្នានេះដែរបើបណ្តឹងប្រឆាំងនឹងប៉ូលិសមិនមានសុពលភាពវានឹងមិនយុត្តិធម៌ទេសម្រាប់ពួកគេដែលប្រព័ន្ធនេះគ្មានទំនុកចិត្តគ្រប់គ្រាន់»។
លោកបានបន្ថែមថារដ្ឋាភិបាលនឹងត្រូវមានវិធីដោះស្រាយនូវបញ្ហាធំៗចំនួនពីរដែលចៅក្រមបានលើកឡើងនៅក្នុងសាលក្រមគឺអវត្តមាននៃការត្រួតពិនិត្យឯករាជ្យនៅក្នុងយន្តការបណ្តឹងប៉ូលិសដែលមានស្រាប់និងការខកខានរបស់មន្ត្រីប៉ូលិសក្នុងការបង្ហាញស្លាកសញ្ញារបស់ពួកគេ។
លោក C. M. Chan មេធាវីនិងជាប្រធានមជ្ឈមណ្ឌលសម្រាប់នីតិរដ្ឋនៃវិទ្យាស្ថានស្រាវជ្រាវគោលនយោបាយហុងកុងដែលជាវិទ្យាស្ថានស្រាវជ្រាវឯករាជ្យបានស្នើថារដ្ឋាភិបាលហុងកុងបានរៀបចំអ្វីមួយស្រដៀងនឹងគណៈកម្មការឯករាជ្យដោះស្រាយបណ្តឹងប៉ូលិស (IPCC)នៅចក្រភពអង់គ្លេសដែលលោកបានពណ៌នាថាដូចជា«សត្វខ្លាមានធ្មេញ»ព្រោះស្ថាប័ននេះមានអំណាចក្នុងការចាប់ផ្តើមការស៊ើបអង្កេត។
លោកបានមានប្រសាសន៍ថា៖«តាមទស្សនៈអភិបាលកិច្ចល្អរដ្ឋាភិបាលគួរតែស្តាប់អនុសាសន៍របស់តុលាការ»។លោកបន្ថែមថា៖ «បច្ចុប្បន្នអ្នកធ្វើបណ្តឹងប្រឆាំងនឹងប៉ូលិសហើយពាក្យបណ្តឹងនេះទៅដល់ប៉ូលិសហើយ IPCCគ្រាន់តែតាមដានការស៊ើបអង្កេតរបស់ពួកគេប៉ុណ្ណោះ»។លោកបាននិយាយដោយសំដៅទៅក្រុមប្រឹក្សាឯករាជ្យដោះស្រាយបណ្តឹងប៉ូលិសរបស់ហុងកុង។
ក្រោមយន្ដការពីរជាន់នាពេលបច្ចុប្បន្នពាក្យបណ្តឹងប្រឆាំងនឹងការិយាល័យប៉ូលិសដែលជាអង្គភាពមួយនៅក្នុងកម្លាំងប៉ូលិសសំដៅទៅលើពាក្យបណ្តឹងដែលអាចរាយការណ៍ទៅIPCCដែលទទួលខុសត្រូវក្នុងការឃ្លាំមើលនិងពិនិត្យមើលករណីដែលអាចរាយការណ៍បាន។ទោះយ៉ាងណាក៏ដោយវាមិនអាចបដិសេធពាក្យបណ្តឹងប្រឆាំងការសន្និដ្ឋានរបស់ការិយាល័យប៉ូលិសឬផ្តួចផ្តើមការស៊ើបអង្កេតបានទេ។
លោក Johnny Lau Yui-siu អ្នកតាមឃ្លាំមើលជើងចាស់ចំពោះស្ថានការណ៍ប្រទេសចិនមានមូលដ្ឋាននៅហុងកុងបានបង្ហាញសុទិដ្ឋិនិយមតិចជាង។
លោកបានមានប្រសាសន៍ថា៖«រដ្ឋាភិបាលអាចគ្រាន់តែបង្ហាញថាពួកគេគោរពសេចក្តីសម្រេចរបស់តុលាការប៉ុន្តែច្រានចោលតម្រូវការណាមួយដើម្បីណែនាំកំណែទម្រង់ទៅនឹងប្រព័ន្ធបណ្តឹងរបស់ប៉ូលិសដែលមានស្រាប់»។
ទោះយ៉ាងណាលោកមើលឃើញថាការវិនិច្ឆ័យរបស់តុលាការជាជំហានឆ្ពោះទៅរកដំណើរការដ៏វែងមួយក្នុងការដោះស្រាយឥទ្ធិពលរបស់បក្សកុម្មុយនីស្តចិនលើដែនដីហុងកុង។លោកបានបន្ថែមថា៖« វានឹងមានប្រសិទ្ធិភាពខ្លាំងឡើងៗក្នុងការជំរុញការផ្លាស់ប្តូរ»។ លោកបន្ថែមថាអភិបាលកិច្ចផ្អែកលើច្បាប់ដែលអះអាងដោយប្រធានាធិបតីចិនលោកស៊ីជីនពីងគឺជាសញ្ញាមួយថារដ្ឋាភិបាលចិនមិនអាចព្រងើយកន្តើយចំពោះការណ៍ពិតដែលថាអាជ្ញាធរត្រូវតែអនុវត្តតាមច្បាប់ទោះបីជាពួកគេព្យាយាមធ្វើគោលនយោបាយតាមអំពើចិត្តក្តី។
ស្នងការប៉ូលិសលោក Chris Tang បាននិយាយថាកម្លាំងនេះនឹងប្តឹងឧទ្ធរណ៍ចំពោះការសម្រេចរបស់តុលាការជាន់ខ្ពស់ដែលថាការខកខានរបស់មន្រ្តីក្នុងការបង្ហាញលេខអត្តសញ្ញាណរបស់ពួកគេគឺជាការរំលោភលើច្បាប់សិទ្ធិពលរដ្ឋ។
អ្នកស្រី Carrie Lam មេដឹកនាំដែនដីក្រុងហុងកុងដែលគាំទ្រដោយរដ្ឋាភិបាលចិនដីគោកបាននិយាយម្តងហើយម្តងទៀតថាយន្តការដែលមានស្រាប់គឺគ្រប់គ្រាន់ដើម្បីដោះស្រាយជាមួយនឹងបណ្តឹងហើយមិនចាំបាច់បង្កើតប្រព័ន្ធឯករាជ្យទេ៕