រដ្ឋមន្ត្រីការបរទេសសហរដ្ឋអាមេរិកលោក Antony Blinken បាននិយាយកាលពីថ្ងៃចន្ទម្សិលមិញថា ប្រទេសចិនគឺជាបញ្ហាប្រឈមចំពោះផលប្រយោជន៍ជាតិរបស់សហរដ្ឋអាមេរិកនៅក្នុងរយៈពេលប៉ុន្មានឆ្នាំខាងមុខ ប៉ុន្តែបើទោះបីជាមាន «ការលេចឡើងនូវទិដ្ឋភាពជាសត្រូវយ៉ាងច្បាស់» ដូច្នេះក៏ដោយ ក៏មាន «ទិដ្ឋភាពបែបសហប្រតិបត្តិការ» ផងដែរនៅក្នុងទំនាក់ទំនងទ្វេភាគីរវាងប្រទេសទាំងពីរដូចជាផ្នែកប្រយុទ្ធប្រឆាំងនឹងការប្រែប្រួលអាកាសធាតុនិងការលើកកម្ពស់សុខភាពនៅលើពិភពលោកជាដើម។
លោក Blinken ក៏បានបញ្ជាក់ឡើងវិញផងដែរអំពីការតាំងចិត្តរបស់សហរដ្ឋអាមេរិកចំពោះសន្តិភាពនិងស្ថិរភាពនៅទូទាំងច្រកសមុទ្រតៃវ៉ាន់ នៅចំពេលដែលមានការប្រែប្រួលនៃវិធានការរបស់ចិនចំពោះកោះតៃវ៉ាន់។
លោក Blinken បានបន្ថែមថា ប្រទេសចិនបានចាត់ទុកស្ថានភាពបច្ចុប្បន្ននៅច្រកសមុទ្រតៃវ៉ាន់ថា «មិនអាចទទួលយកបានទៀតទេ» និងកំពុងធ្វើយ៉ាងណាឱ្យកោះតៃវ៉ាន់បានស្ថិតនៅក្រោមការគ្រប់គ្រងរបស់ខ្លួន «ក្នុងពេលដ៏ឆាប់បំផុតជាងមុន» និងអាចតាមរយៈការប្រើកម្លាំង។
ការលើកឡើងរបស់លោក Blinken នេះបានធ្វើឡើងនៅចំពេលដែលប្រទេសចិនកំពុងធ្វើសមាជគណបក្សកុម្មុយនីស្តចិនលើកទី ២០ ដែលនៅក្នុងសមាជនេះគេរំពឹងថាប្រធានាធិបតីចិនលោក Xi Jinping នឹងត្រូវបានគេជ្រើសរើសឱ្យធ្វើជាមេដឹកនាំនៅអាណត្តិទី ៣ រយៈពេល ៥ ឆ្នាំជាបន្តទៀត។
លោក Blinken បាននិយាយនៅក្នុងអំឡុងការពិភាក្សាមួយកាលពីថ្ងៃចន្ទជាមួយនឹងអតីតរដ្ឋមន្ត្រីការបរទេសសហរដ្ឋអាមេរិកអ្នកស្រី Condoleezza Rice នៅក្នុងតំបន់ Stanford រដ្ឋ California ថា៖ «ទិដ្ឋភាពបែបប្រកួតប្រជែង [នៃទំនាក់ទំនងរវាងសហរដ្ឋអាមេរិកនិងចិន] គឺជាទិដ្ឋភាពចម្បង»។
លោកបានបញ្ជាក់ដូច្នេះថា៖ «យើងបានឃើញប្រទេសចិនបែបផ្សេងផ្ទុយស្រឡះពីមុនលេចឡើងនៅក្នុងរយៈពេលប៉ុន្មានឆ្នាំថ្មីៗនេះនៅក្រោមការដឹកនាំរបស់លោក Xi Jinping។ វាមានលក្ខណៈគាបសង្កត់ជាងមុននៅក្នុងប្រទេស និងមានលក្ខណៈគឃ្លើនជាងមុននៅបរទេស។ នៅក្នុងករណីជាច្រើន ចំណុចនេះគឺជាបញ្ហាប្រឈមចំពោះផលប្រយោជន៍និងគុណតម្លៃផ្ទាល់របស់សហរដ្ឋអាមេរិក»។
ប៉ុន្តែ លោក Blinken បានបន្ថែមថា «បញ្ហាធំៗ» មួយចំនួនដូចជាបញ្ហាអាកាសធាតុនិងបញ្ហាសុខភាពពិភពលោកជាដើមគឺ «មានការលំបាកខ្លាំងជាងមុនច្រើននៅក្នុងការដោះស្រាយ» ប្រសិនបើសហរដ្ឋអាមេរិកនិងប្រទេសចិន «មិនចូលរួម» នៅក្នុងកិច្ចសហប្រតិបត្តិការជាមួយគ្នា៕
លោក Blinken ថា ចិនគឺ «ផ្ទុយស្រឡះពីមុន» នៅក្រោមការដឹកនាំរបស់លោក Xi Jinping
រដ្ឋមន្ត្រីការបរទេសសហរដ្ឋអាមេរិកលោក Antony Blinken ឆ្លើយសំណួរក្នុង អំឡុងពេលសន្និសីទសារព័ត៌មាននៅសាកលវិទ្យាល័យ Stanford ក្នុងទីក្រុង Stanford រដ្ឋ California នៅថ្ងៃទី១៧ ខែតុលា ឆ្នាំ២០២២។
វ៉ាស៊ីនតោន —