រដ្ឋមន្ត្រីការបរទេសសហរដ្ឋអាមេរិកលោក Antony Blinken កំពុងស្ថិតនៅក្នុងទីក្រុងអាប៊ុយដាប៊ី នៃប្រទេសអេមីរ៉ាតអារ៉ាប់រួម នៅថ្ងៃចន្ទនេះ នៅពេលដែលក្រុមមេដឹកនាំនិងអ្នកការទូតមកពីជុំវិញពិភពលោក គោរពវិញ្ញាណក្ខន្ធសពមេដឹកនាំរបស់ប្រទេសនេះ។
លោក Blinken ជាសមាជិកមួយរូបនៃគណៈប្រតិភូជាន់ខ្ពស់អាមេរិក ដែលដឹកនាំដោយលោកស្រីអនុប្រធានាធិបតី Kamala Harris។ ដំណើរទស្សនកិច្ចនេះក៏មានគោលបំណងបន្ធូបន្ថយភាពតានតឹង និងបង្ហាញពីការគាំទ្រនៅពេលដែលទំនាក់ទំនងរវាងសហរដ្ឋអាមេរិកនិងប្រទេសអេមីរ៉ាតអារ៉ាប់រួម មានភាពតានតឹងនៅក្រោមអាណត្តិរបស់លោកប្រធានាធិបតី Joe Biden។
គណៈប្រតិភូជាន់ខ្ពស់អាមេរិកនោះ ក៏រួមមានរដ្ឋមន្ត្រីការពារជាតិលោក Lloyd Austin នាយកទីភ្នាក់ងារស៊ើបការណ៍សម្ងាត់កណ្តាអាមេរិក CIA លោក William J. Burns ផងដែរ។
ព្រះអង្គម្ចាស់ Sheikh Khalifa bin Zayed Al Nahyan ដែលជាមេដឹកនាំយូរអង្វែងចាស់ជរារបស់ប្រទេសអេមីរ៉ាតអារ៉ាប់រួម បានទទួលមរណភាពកាលពីថ្ងៃសុក្រសប្តាហ៍មុន ក្នុងព្រះ ជន្មាយុ ៧៣ ព្រះវស្សា បន្ទាប់ពីដឹកនាំប្រទេសនេះឱ្យក្លាយទៅជាមជ្ឈមណ្ឌលពាណិជ្ជកម្មសាកលលោក និងមជ្ឈមណ្ឌលមហាអំណាចនៅក្នុងតំបន់មក។
គណៈប្រតិភូជាន់ខ្ពស់អាមេរិកក៏នឹងចូលសម្តែងការគួរសមព្រះអង្គម្ចាស់ Sheik Mohammed bin Zayed Al Nahyan ដែលជាអ្នកស្នងតំណែងជំនួស ដែលជាសញ្ញានៃឥទ្ធិពលរបស់រដ្ឋាភិបាលក្រុងអាប៊ុយដាប៊ី នៅក្នុងរដ្ឋធានីប្រទេសលោកខាងលិច និងអារ៉ាប់ផងដែរ៕