លោក Joe Biden បេក្ខជនប្រធានាធិបតីខាងគណបក្សប្រជាធិបតេយ្យ នឹងធ្វើដំណើរទៅកាន់ទីក្រុង Kenosha នៃរដ្ឋ Wisconsin សហរដ្ឋអាមេរិកដែលនៅទីនោះលោកនឹងធ្វើការជួបប្រជុំសហគមន៍។
យុទ្ធនាការឃោសនាបោះឆ្នោតរបស់លោក Biden បានប្រាប់ឲ្យដឹងថា គោលបំណងនៃការពិភាក្សានៅក្នុងទីក្រុងដែលមានប្រជាពលរដ្ឋ១សែននាក់ដែលស្ថិតនៅមាត់បឹង Michigan នោះ គឺ«ដើម្បីបង្រួបបង្រួមពលរដ្ឋអាមេរិកាំងដើម្បីផ្សះផ្សានិងដោះស្រាយបញ្ហាលំបាកដែលយើងប្រឈម»។
លោក Biden បានថ្លែងក្នុងសន្និសីទកាសែតកាលពីថ្ងៃពុធម្សិលមិញថា៖ «អ្វីដែលយើងចង់ធ្វើគឺយើងត្រូវតែផ្សះផ្សាគ្នា។ យើងត្រូវតែបង្រួបបង្រួមគ្នា»។
ដំណើរទស្សនកិច្ចរបស់លោក Biden កើតឡើង២ថ្ងៃបន្ទាប់ពីលោកប្រធានាធិបតី Donald Trump បានអញ្ជើញទៅទីក្រុង Kenosha ហើយបានដើរនៅតាមផ្លូវដែលមានអាគារខូចខាតឬត្រូវបានបំផ្លាញក្នុងអំឡុងនៃចលាចលស៊ីវិលដែលបណ្តាលមកពីមន្រ្តីប៉ូលិសស្បែកសម្នាក់បានបាញ់បុរសស្បែកខ្មៅ។
ដំណើរទស្សនកិច្ចរបស់លោក Biden បញ្ជាក់អំពីវិធីរបស់លោកនិងលោក Trump ក្នុងការព្យាយាមដើម្បីទទួលបានអត្ថប្រយោជន៍ខាងនយោបាយលើបញ្ហារសើបដែលសហរដ្ឋអាមេរិកគិតគូរអំពីបញ្ហាជាតិសាសន៍និងទង្វើរបស់ប៉ូលិសលើជនជាតិភាគតិច។ បញ្ហានេះបានលេចធ្លោឡើងនៅពេលដែលបុរសស្បែកខ្មៅម្នាក់ឈ្មោះ George Floyd បានស្លាប់កាលពីចុងខែឧសភាខណៈស្ថិតនៅក្រោមសមត្ថកិច្ចរបស់ប៉ូលិសក្នុងទីក្រុង Minneapolis រដ្ឋ Minnesota ហើយបានក្លាយទៅជាការតវ៉ាប្រឆាំងពាសពេញប្រទេសអំពីការស្លាប់របស់លោក Floyd នេះ ហើយឧបទ្ទវហេតុស្រដៀងគ្នាមួយចំនួនទៀតដែលបានកើតមានឡើងបន្ទាប់ពីនោះមក៕