ប្រធានាធិបតីសហរដ្ឋអាមេរិកលោក Joe Biden កាលពីថ្ងៃពុធ នៅតែប្តេជ្ញាផ្ដល់ថវិកាជំនួយចំនួន ១.៤០០ ដុល្លារទៅឲ្យពលរដ្ឋអាមេរិកាំងរាប់លាននាក់ដើម្បីជួយធ្វើឲ្យសេដ្ឋកិច្ចដែលរងការបំផ្លិចបំផ្លាញដោយសារវីរុសកូរ៉ូណា ប្រសើរឡើងវិញ។
ក៏ប៉ុន្តែ លោកប្រធានាធិបតីបានមានប្រសាសន៍ថា លោកសុខចិត្តពិគ្រោះអំពីការទាមទាររបស់គណបក្សសាធារណរដ្ឋ ដែលចង់ឲ្យរឹតបន្តឹងទៅលើលក្ខខណ្ឌថាតើនរណាខ្លះគួរទទួលបានប្រាក់នេះ។
នៅក្នុងការសន្ទនាតាមទូរស័ព្ទជាមួយសមាជិករដ្ឋសភាខាងគណបក្សប្រជាធិបតេយ្យនៅក្នុងរដ្ឋសភា ហើយក្រោយមកនៅឯជំនួបក្នុងសេតវិមានជាមួយក្រុមសមាជិកព្រឹទ្ធសភាជាន់ខ្ពស់មួយក្រុមខាងគណបក្សប្រជាធិបតេយ្យ លោកប្រធានាធិបតី Biden បានអំពាវនាវឲ្យសភាអនុម័តឲ្យបានឆាប់រហ័សនូវកញ្ចប់ថវិកាជំនួយសម្រាប់សង្គ្រោះវិបត្តិដែលបង្កឡើងដោយវីរុសកូរ៉ូណានេះ។
កញ្ចប់ថវិកានេះមានទឹកប្រាក់ ១,៩ លានលានដុល្លារ ដែលរួមមានទាំងប្រាក់ជំនួយសម្រាប់ពលរដ្ឋម្នាក់ៗផងដែរ។ លោក Biden បានច្រានចោលការអំពាវនាវរបស់សមាជិកព្រឹទ្ធសភាខាងគណបក្សសាធារណរដ្ឋចំពោះការកម្រិតកញ្ចប់ថវិកាជំនួយនេះឲ្យមានទឹកប្រាក់ត្រឹមតែ ៦១៨ ពាន់លានដុល្លារតែប៉ុណ្ណោះ។
លោក Biden បានប្រាប់សមាជិករដ្ឋសភាថា លោកមានឆន្ទៈក្នុងការកែប្រែលក្ខខណ្ឌប្រាក់ចំណូលលើអ្នកដែលនឹងទទួលបានថវិកាចំនួន ១.៤០០ ដុល្លារនេះ ប៉ុន្តែលោកនឹងមិនកាត់បន្ថយទំហំទឹកប្រាក់នោះទេ។
លោកប្រធានាធិបតី Biden បានមានប្រសាសន៍ថា៖ «ខ្ញុំនឹងមិនក្បត់ពាក្យសន្យារបស់ខ្ញុំចំពោះពលរដ្ឋអាមេរិកាំងទេ»។
លោកនិយាយថា ការផ្តល់ប្រាក់ដោយផ្ទាល់នៅក្រោមផែនការរបស់លោកនៅពេលឥឡូវនេះនឹងផ្តល់ថវិកាជំនួយដល់បុគ្គលដែលមានប្រាក់ចំណូល ៧ម៉ឺន ៥ពាន់ដុល្លារក្នុងមួយឆ្នាំឬទាបជាងនេះ ឬប្ដីប្រពន្ធដែលមានប្រាក់ចំណូលប្រចាំឆ្នាំរួមគ្នាចំនួន ១សែន ៥ម៉ឺនដុល្លារ ឬទាបជាងនេះ។
ពួកគណបក្សសាធារណរដ្ឋនិងគណបក្សប្រជាធិបតេយ្យខ្លះបានអំពាវនាវឲ្យផ្តល់ប្រាក់ទៅឲ្យពលរដ្ឋដែលមានប្រាក់ចំណូលទាបជាងនេះតែប៉ុណ្ណោះ។
សមាជិកព្រឹទ្ធសភាខាងគណបក្សសាធារណរដ្ឋបានស្នើឲ្យផ្ដល់ថវិកាចំនួន ១.០០០ ដុល្លារដល់បុគ្គលណាដែលមានប្រាក់ចំណូលត្រឹមតែ ៤ម៉ឺនដុល្លារក្នុងមួយឆ្នាំឬទាបជាងនេះ ឬប្ដីប្រពន្ធដែលមានប្រាក់ចំណូលរួមគ្នា ៨ម៉ឺនដុល្លារក្នុងមួយឆ្នាំឬទាបជាងនេះ ហើយបុគ្គលដែលមានប្រាក់ចំណូលប្រចាំឆ្នាំចាប់ពី ៥ ម៉ឺនដុល្លារឡើងទៅ ឬប្ដីប្រពន្ធដែលមានប្រាក់ចំណូលប្រចាំឆ្នាំរួមគ្នាចាប់ពី ១សែនដុល្លារឡើងវិញ នឹងមិនអាចទទួលបានប្រាក់ជំនួយនេះទេ។
លោកប្រធានាធិបតី Biden បានថ្លែងប្រាប់សមាជិកគណបក្សប្រជាធិបតេយ្យថា សំណើកញ្ចប់ថវិកាចំនួន ៦១៨ ពាន់លានដុល្លាររបស់គណបក្សសាធារណរដ្ឋ «មិនស្ថិតនៅក្នុងជម្រើសទទួលយកបាននោះទេ»៕