កាលពីថ្ងៃអង្គារម្សិលមិញ ប្រធានាធិបតីសហរដ្ឋអាមេរិកលោក Joe Biden បានប្រកាសអំពីវិធីថ្មីដើម្បីជួយពលរដ្ឋអាមេរិកបន្ថែមទៀតឲ្យចាក់វ៉ាក់សាំងកូវីដ១៩។
សេតវិមានបានបញ្ជាក់ថា បន្ទាប់ពីបានជួបជាមួយអភិបាលរដ្ឋនានាមកពីគណបក្សទាំងពីរមក លោក Biden នឹងរៀបចំផែនការឲ្យក្រុមហ៊ុន Lyft និង Uber ដែលជាក្រុមហ៊ុនផ្តល់សេវាធ្វើដំណើរ ដឹកអ្នកដំណើរទៅកន្លែងចាក់វ៉ាក់សាំងនឹងត្រឡប់មកផ្ទះវិញដោយឥតគិតថ្លៃនៅត្រឹមថ្ងៃទី ៤ ខែកក្កដាខាងមុខ។
ថ្ងៃទី ៤ ខែកក្កដាគឺជាថ្ងៃបុណ្យឯករាជ្យនិងជាថ្ងៃដែលលោក Biden បានកំណត់គោលដៅធ្វើយ៉ាងណាឲ្យពលរដ្ឋអាមេរិកពេញវ័យចំនួន ៧០% បានចាក់វ៉ាក់សាំងកូវីដ១៩ យ៉ាងតិចឲ្យបានមួយដូស។ តួលេខបច្ចុប្បន្នគឺ ៥៨%។
លោក Biden ក៏បានប្រកាសផងដែរថា មហាវិទ្យាល័យសហគមន៍ធំៗមួយចំនួននៅក្នុងប្រទេសនឹងត្រូវប្រើជាកន្លែងចាក់វ៉ាក់សាំងសម្រាប់និស្សិត បុគ្គលិក និងសហគមន៍មូលដ្ឋាននៅក្នុងខែឧសភានិងមិថុនា។
រដ្ឋាភិបាលសហរដ្ឋអាមេរិកក៏នឹងផ្តល់ថវិកាភ្លាមៗផងដែរដល់រដ្ឋនានាដើម្បីជំរុញប្រជាពលរដ្ឋឲ្យចាក់វ៉ាក់សាំង និងរៀបចំកន្លែងចាក់វ៉ាក់សាំងនៅកន្លែងធ្វើការនិងព្រះវិហារគ្រិស្តសាសនានានា។
វិធានការរបស់លោក Biden បានធ្វើឡើងនៅពេលដែលល្បឿននៃការចាក់វ៉ាក់សាំងកូវីដ១៩ នៅក្នុងសហរដ្ឋអាមេរិកបានធ្លាក់ចុះមកនៅត្រឹមប្រហែល ២ លាន ១ សែនម្ជុលក្នុងមួយថ្ងៃ គឺចុះពីជាង ៣ លានម្ជុលក្នុងមួយថ្ងៃកាលពីប៉ុន្មានសប្តាហ៍មុន។
ពលរដ្ឋអាមេរិកប្រហែល ១ ភាគ ៥ បាននិយាយថា ពួកគេគ្មានបំណងចាក់វ៉ាក់សាំងនេះទេ ឬក៏នៅតែមានការសង្ស័យផ្សេងៗចំពោះវ៉ាក់សាំងនេះ។
សាកលវិទ្យាល័យ Johns Hopkins បានឲ្យដឹងថា សហរដ្ឋអាមេរិកមានករណីស្លាប់ដោយសារជំងឺកូវីដ១៩ ចំនួន ៥៨២.០០០ ករណី និងករណីឆ្លងចំនួន ៣២ លាន ៧ សែនករណី គឺច្រើនជាងប្រទេសណាៗទាំងអស់។ ប៉ុន្តែចំនួនករណីឆ្លងថ្មីបានធ្លាក់ចុះយ៉ាងខ្លាំង នៅពេលដែលពលរដ្ឋអាមេរិកកាន់តែច្រើនបានចាក់វ៉ាក់សាំង៕