ប្រធានាធិបតីសហរដ្ឋអាមេរិកលោក Joe Biden បានប្រកាសកាលពីថ្ងៃចន្ទថា លោកបានបន្ថយទោសទណ្ឌិត ៣៧ នាក់ក្នុងចំណោម ៤០ នាក់ពីទោសប្រហារជីវិតមកត្រឹមជាប់គុកមួយជីវិតវិញ មុនពេលលោក Donald Trump ដែលគាំទ្រឲ្យពង្រីកការអនុវត្តទោសប្រហារជីវិត ចូលកាន់តំណែងជាប្រធានាធិបតីអាមេរិកក្នុងពេលប៉ុន្មានសប្តាហ៍ខាងមុខនេះ។ នេះបើយោងតាមទីភ្នាក់ងារសារព័ត៌មាន AP។
ការបន្ថយទោសនេះធ្វើឲ្យរួចជីវិតដល់អ្នកទោសដែលត្រូវបានកាត់ទោសពីបទមនុស្សឃាតដូចជាជនដែលពាក់ព័ន្ធនឹងការប្លន់ធនាគារ ឬការជួញដូរគ្រឿងញៀនដ៏ប្រល័យ និងជនដែលសម្លាប់ឆ្នាំគុក ឬអ្នកទោសក្នុងមន្ទីរឃុំឃាំងថ្នាក់សហព័ន្ធជាដើម។
ការបន្ថយទោសនេះមានន័យថា នៅសល់តែទណ្ឌិតថ្នាក់សហព័ន្ធតែ ៣ នាក់ប៉ុណ្ណោះដែលប្រឈមនឹងទោសប្រហារជីវិត។ អ្នកទាំង ៣ នោះគឺជនឈ្មោះ Dylann Roof ដែលបានសម្លាប់សមាជិកស្បែកខ្មៅ ៩ នាក់នៃវិហារគ្រិស្តសាសនា Mother Emanuel AME ក្នុងក្រុង Charleston រដ្ឋ South Carolina កាលពីឆ្នាំ ២០១៥ ដោយសារការប្រកាន់ពូជសាសន៍ ជនឈ្មោះ Dzhokhar Tsarnaev ដែលបានដាក់គ្រាប់បែកបំផ្ទុះនៅព្រឹត្តិការណ៍កីឡារត់ម៉ារ៉ាតុងក្នុងក្រុង Boston រដ្ឋ Massachusetts កាលពីឆ្នាំ ២០១៣ និងជនឈ្មោះ Robert Bowers ដែលបានបាញ់សម្លាប់អ្នកទៅថ្វាយបង្គំ ១១ នាក់នៅវិហារសាសនា Tree of Life របស់ជាតិសាសន៍ជ្វីហ្វក្នុងក្រុង Pittsburgh រដ្ឋ Pennsylvania កាលពីឆ្នាំ ២០១៨ ដែលជាការវាយប្រហារប្រឆាំងជាតិសាសន៍ជ្វីហ្វដ៏ប្រល័យបំផុតក្នុងប្រវត្តិសាស្ត្រអាមេរិក។
លោក Biden បានបញ្ជាក់ក្នុងសេចក្តីថ្លែងការណ៍មួយថា៖ «ខ្ញុំបានបូជាអាជីពរបស់ខ្ញុំទៅលើការបន្ថយឧក្រិដ្ឋកម្មហិង្សានិងធានានូវប្រព័ន្ធយុត្តិធម៌ដ៏មានប្រសិទ្ធភាពនិងត្រឹមត្រូវមួយ។ ថ្ងៃនេះ ខ្ញុំបន្ថយទោសបុគ្គល ៣៧ នាក់ក្នុងចំណោម ៤០ នាក់ដែលកំពុងរង់ចាំការអនុវត្តទោសប្រហារជីវិតថ្នាក់សហព័ន្ធពីទោសប្រហារជីវិតមកត្រឹមជាប់ពន្ធនាគារអស់មួយជីវិតវិញដោយមិនអាចស្ថិតនៅក្រៅឃុំបានទេ។ ការបន្ថយទោសនេះស្របនឹងសារាចរដែលរដ្ឋបាលរបស់ខ្ញុំបានដាក់ចេញស្តីពីការប្រហារជីវិតថ្នាក់សហព័ន្ធក្នុងចំណោមរឿងក្រៅពីភេរវកម្មនិងឃាតកម្មទ្រង់ទ្រាយធំដែលជំរុញឡើងដោយការស្អប់គុំកួន»។
លោក Biden បានបន្ថែមថា៖ «ចូរកុំច្រឡំ! ខ្ញុំថ្កោលទោសឃាតករទាំងនេះនិងសោកសង្រេងចំពោះជនរងគ្រោះនៃអំពើដ៏គួរឲ្យស្អប់ទាំងនេះនិងការឈឺចាប់សម្រាប់ក្រុមគ្រួសារដែលបានបាត់បង់មនុស្សជាទីស្រឡាញ់របស់ខ្លួន។ តែដោយសារមនសិការនិងបទពិសោធន៍របស់ខ្ញុំក្នុងនាមជាអ្នកការពារសាធារណជន ជាប្រធានគណៈកម្មាធិការតុលាការនៃព្រឹទ្ធសភា ជាអនុប្រធានាធិបតី និងឥឡូវជាប្រធានាធិបតី ខ្ញុំជឿជាក់ជាងពេលណាៗទាំងអស់ថាយើងត្រូវតែបញ្ឈប់ការប្រើទោសប្រហារជីវិតក្នុងកម្រិតថ្នាក់សហព័ន្ធ»៕
លោក Biden បន្ថយទោសទណ្ឌិត ៣៧ នាក់ពីប្រហារជីវិតមកត្រឹមជាប់គុកមួយជីវិត
រូបឯកសារ៖ លោកប្រធានាធិបតី Joe Biden ថ្លែងនៅសេតវិមានក្នុងរដ្ឋធានីវ៉ាស៊ីនតោន កាលពីថ្ងៃទី១៦ ខែធ្នូ ឆ្នាំ ២០២៤។
រដ្ឋធានីវ៉ាស៊ីនតោន —