ប្រធានាធិបតីសហរដ្ឋអាមេរិកលោក Joe Biden បាននិយាយកាលពីថ្ងៃអង្គារថា សហរដ្ឋអាមេរិក នឹងមានវ៉ាក់សាំងល្មមគ្រប់គ្រាន់សម្រាប់ពលរដ្ឋអាមេរិកាំងពេញវ័យទាំងអស់នៅក្នុងខែឧសភា ដោយបានហៅកិច្ចព្រមព្រៀងរវាងក្រុមហ៊ុនឱសថ២ថា «ជាជំហានឆ្ពោះទៅមុខដ៏សំខាន់មួយ»។
លោកប្រធានាធិបតី Biden បានមានប្រសាសន៍ថា៖ «ស្ថានភាពកាន់តែប្រសើរឡើង»។ ក៏ប៉ុន្តែ លោកបានព្រមានថា៖ «[វិបត្តិកូវីដ]នេះ មិនទាន់ចប់នៅឡើយទេ»។
ក្រុមហ៊ុន Merck ដែលជាក្រុមហ៊ុនឱសថដ៏ធំមួយរបស់អាមេរិក បានយល់ព្រមជួយផលិតវ៉ាក់សាំងថ្មីបង្ការជំងឺកូវីដ១៩របស់ក្រុមហ៊ុន Johnson & Johnson ដែលជាគូប្រជែងរបស់ខ្លួន ដើម្បីជួយបង្កើនផលិតផលវ៉ាក់សាំងថ្មីរាប់លានដូសសម្រាប់ចាក់តែម្តង ដល់ពលរដ្ឋអាមេរិកាំងកាន់តែច្រើនឡើងនៅក្នុងប៉ុន្មានខែខាងមុខនេះ។ នេះ តាមការប្រកាសរបស់សេតវិមាន។
ក្រុមហ៊ុន Johnson & Johnson បានប្រឈមបញ្ហាមិនបានរំពឹងទុកក្នុងការផលិតនេះ ទោះបីខ្លួនបានទទួលការយល់ព្រមឲ្យប្រើវ៉ាក់សាំងក្នុងគ្រាអាសន្នកាលពីសប្តាហ៍មុនក៏ដោយ។ ក្រុមហ៊ុននោះ បានផលិតវ៉ាក់សាំងចំនួន៣,៩លានដូសរហូតមកទល់ពេលនេះ ក៏ប៉ុន្តែ បាននិយាយថា ខ្លួននឹងផលិត១០០លានដូសនៅត្រឹមចុងខែមិថុនា។
នៅពេលត្រូវសួរថា ពេលណាពលរដ្ឋអាមេរិកាំងអាចរំពឹងថា នឹងត្រឡប់ទៅ«ជីវភាពប្រក្រតី»ឡើងវិញ លោកប្រធានាធិបតី Biden បានមានប្រសាសន៍ថា លោកមិនអាចផ្តល់ចម្លើយជាក់លាក់ទេ ក៏ប៉ុន្តែសង្ឃឹមថា ការណ៍នេះ នឹងអាចកើតឡើង«មុនពេលនេះ នៅឆ្នាំក្រោយ»៕