ប្រធានាធិបតីអាមេរិកលោក Joe Biden បានប្រកាសកាលពីថ្ងៃអាទិត្យថាការដួលរលំភ្លាមៗរបស់រដ្ឋាភិបាលស៊ីរីក្រោមការដឹកនាំរបស់លោក Bashar Assad គឺជា «យុត្តិធម៌សារវន្ត» តែថាវាក៏ជា «គ្រាមិនប្រាកដប្រជា» សម្រាប់តំបន់មជ្ឈិមបូព៌ាដែរ។
លោក Biden បានថ្លែងនៅសេតវិមានថា ការដួលរលំរបបគ្រប់គ្រងបែបកណ្តាប់ដៃដែករាប់ទសវត្សរ៍របស់គ្រួសារត្រកូល Assad គឺជា «ឱកាសដ៏ល្អបំផុតក្នុងមួយជំនាន់សម្រាប់ប្រជាជនស៊ីរីបង្កើតជោគវាសនាដោយខ្លួនឯង»។
លោក Biden ថា សកម្មភាពរបស់សហរដ្ឋអាមេរិកនិងសម្ព័ន្ធមិត្តក្នុងពេល ២ ឆ្នាំចុងក្រោយនេះបានធ្វើឲ្យចុះខ្សោយដល់ក្រុមនិងប្រទេសដែលគាំទ្ររបបដឹកនាំនៅស៊ីរី ដែលនោះគឺរុស្ស៊ី អ៊ីរ៉ង់ និងក្រុមសកម្មប្រយុទ្ធហេសបូឡា (Hezbollah) នៅលីបង់ដែលមានអ៊ីរ៉ង់នៅពីក្រោយ។ ការចុះខ្សោយនេះបានធ្វើឲ្យក្រុមនិងប្រទេសទាំងនោះលែងអាចការពាររដ្ឋាភិបាលលោក Assad បានតទៅទៀត។
ក្រោយជួបជាមួយក្រុមទីប្រឹក្សាសន្តិសុខជាតិរបស់លោកនៅសេតវិមានមក លោក Biden បានថ្លែងថា៖ «វិធីសាស្ត្ររបស់យើងបានធ្វើឲ្យប្តូរតុល្យភាពអំណាចនៅមជ្ឈិមបូព៌ា»។
ក្រុមប្រឆាំងនៅស៊ីវីដែលបានទម្លាក់លោក Assad គឺដឹកនាំដោយក្រុម Hayat Tahrir al-Sham។ រដ្ឋបាលលោក Biden បានចាត់ទុកក្រុមនេះថាជាអង្គការភេរវកម្មនិងថាក្រុមនេះមានទំនាក់ទំនងជាមួយក្រុមអាល់កៃដា (al-Qaida) ទោះបីជាក្រុម Hayat Tahrir al-Sham នេះថាខ្លួនបានផ្តាច់ចំណងទាក់ទងជាមួយក្រុមអាល់កៃដាហើយក៏ដោយ។
លោក Biden ថ្លែងថា៖ «យើងនឹងនៅតែប្រយ័ត្នប្រយែង។ ជាការពិត ក្រុមឧទ្ទាមខ្លះដែលផ្តួលរំលំលោក Assad មានកំណត់ត្រាខ្មៅងងឹតខាងភេរវកម្មនិងការរំលោភសិទ្ធិមនុស្ស»។
លោក Biden បានបន្ថែមថា៖ «ឥឡូវ [ក្រុមនេះ] និយាយរឿងត្រឹមត្រូវ តែពេលពួកគេមានការទទួលខុសត្រូវធំជាងនេះ យើងនឹងវាយតម្លៃមិនត្រឹមតែពាក្យសម្តីរបស់ពួកគេប៉ុណ្ណោះទេ តែថែមទាំងសកម្មភាពរបស់ពួកគេផងដែរ»៕
ព័ត៌មានខ្លះក្នុងសេចក្តីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP។