បេក្ខជនចៅក្រមតុលាការកំពូលសហរដ្ឋអាមេរិកអ្នកស្រី Amy Coney Barrett កាលពីថ្ងៃអង្គារបានបដិសេធមិនឆ្លើយសំណួរមួយចំនួនរបស់សមាជិកព្រឹទ្ធសភាទាក់ទិននឹងវិធីដែលអ្នកស្រីសម្រេចលើជម្លោះផ្លូវច្បាប់នានា ដែលអ្នកស្រីអាចនឹងជួបប្រទះ ប្រសិនបើអ្នកស្រីត្រូវបានព្រឹទ្ធសភាអនុម័តឲ្យកាន់តំណែងចៅក្រមតុលាការកំពូលនេះ។
ប៉ុន្តែអ្នកស្រី Barrett បាននិយាយថា អ្នកស្រីនឹងមិនបណ្ដោយឲ្យទស្សន:ផ្ទាល់ខ្លួន និងជំនឿសាសនារបស់អ្នកស្រី កំណត់អំពីវិធីដែលអ្នកស្រីនឹងសម្រេចលើរឿងក្ដីណាមួយនោះទេ។
«ខ្ញុំគ្មានរបៀបវារ:ទេ។ ខ្ញុំនឹងធ្វើតាមច្បាប់»។ នេះជាការលើកឡើងរបស់អ្នកស្រី Barrett នៅក្នុងអំឡុងពេលដែលគណ:កម្មាធិការតុលាការរបស់ព្រឹទ្ធសភាបើកសវនាការចោទសួរនៅថ្ងៃទី ២ លើបេក្ខភាពរបស់អ្នកស្រីដែលតែងតាំងដោយលោកប្រធានាធិបតី Donald Trump។
តបទៅនឹងសំណួររបស់សមាជិកព្រឹទ្ធសភា ២ រូប ខាងគណបក្សសាធារណរដ្ឋ គឺលោក Lindsey Graham និងលោក Chuck Grassley និងសមាជិកព្រឹទ្ធសភា ២ រូបទៀតខាងគណបក្សប្រជាធិបតេយ្យ គឺអ្នកស្រី Dianne Feinstein និងលោក Patrick Leahy អ្នកស្រី Barrett បានបដិសេធមិនឆ្លើយអំពីវិធីដែលអ្នកស្រីអាចសម្រេចទាក់ទិននឹងការសម្រេចរបស់តុលាការកំពូលឆ្នាំ ១៩៧៣ ដែលចាត់ទុកការរំលូតកូនថាជារឿងស្របច្បាប់ សិទ្ធិកាន់កាប់កាំភ្លើងដែលចែងក្នុងរដ្ឋធម្មនុញ្ញ និងច្បាប់ជាតិស្ដីពីការធានារ៉ាប់រងសុខភាព។
អ្នកស្រីក៏បានបដិសេធមិនឆ្លើយសំណួរផងដែរ ថាតើអ្នកស្រីនឹងដកខ្លួនចេញពីការសម្រេចលើជម្លោះផ្លូវច្បាប់ណាមួយដែលអាចកើតចេញពីការបោះឆ្នោតថ្ងៃទី ៣ ខែវិច្ឆិកាខាងមុខនេះឬក៏អត់ ក្នុងករណីដែលអ្នកស្រីត្រូវព្រឹទ្ធសភាអនុម័តឲ្យកាន់តំណែងជាចៅក្រមតុលាការកំពូលនេះភ្លាមៗ។
ប្រសិនបើត្រូវបានព្រឹទ្ធសភាអនុម័តលើការតែងតាំងនេះ អ្នកស្រី Barrett នឹងត្រូវជំនួសតំណែងអ្នកស្រីចៅក្រម Ruth Bader Ginsburg ដែលបានស្លាប់កាលពីខែមុនក្នុងអាយុ ៨៧ ឆ្នាំ៕