ក្រសួងទេសចរណ៍បានឱ្យដឹងថា ចំនួនទេសចរអន្តរជាតិដែលចូលក្នុងប្រទេសកម្ពុជាតាមច្រកប្រទេសថៃបានធ្លាក់ចុះដោយសារតែការវាយប្រហារដោយគ្រាប់បែកក្នុងប្រទេសថៃកាលពីខែមុន។
លោកថោង ខុន រដ្ឋមន្ត្រីក្រសួងទេសចរណ៍បានបញ្ជាក់នៅក្នុងសេចក្តីប្រកាសព័ត៌មានថា៖
«យោងតាមស្ថិតិពីច្រកអន្តរជាតិតាមផ្លូវគោក ភ្ញៀវទេសចរចូលមកប្រទេសកម្ពុជាពីប្រទេសថៃបានធ្លាក់ចុះប្រហែល១០ភាគរយហើយតាមអាកាសក៏មានការធ្លាក់ចុះផងដែរ»។
លោកថោង ខុនបានបន្ថែមទៀតថា៖
«ការធ្លាក់ចុះនេះដោយសារតែទេសចរចូលមកប្រទេសកម្ពុជាពីប្រទេសថៃប៉ុណ្ណោះ ដោយឡែកប្រទេសកម្ពុជាមិនមានការរឹតបន្តឹងទេសចរចូលមកកម្ពុជាទេហើយសន្តិសុខ សុវត្ថិភាពនិងស្ថិរភាពនៅកម្ពុជាក៏មានការធានាផងដែរ»។
ប្រទេសថៃបានរងការវាយប្រហារកាលពីថ្ងៃទី១៧ខែសីហា ដោយបានបណ្តាលឱ្យមនុស្ស២០នាក់ស្លាប់បាត់បង់ជីវិត។ ក្នុងចំណោមនោះភាគច្រើនគឺជាទេសចរ។ ហើយមានមនុស្សជាង ១២០នាក់ទៀតរងរបួស។
ក្នុងឆ្នាំ២០១៤ ប្រទេសកម្ពុជាទទួលបានទេសចរអន្តរជាតិ៤,៥លាននាក់ហើយនៅក្នុងរយៈពេល៧ខែដើមឆ្នាំ២០១៥នេះគឺមានចំនួនប្រហែល២,៦លាននាក់។ ទេសចរអន្តរជាតិដែលចូលមកកម្ពុជាមានប្រហែល៤០ភាគរយ។ នេះបើតាមការបញ្ជាក់របស់ក្រសួងទេសចរណ៍៕