អាជ្ញាធរកម្ពុជាបាននិយាយថា ពួកគេមិនបានទទួលសំណើពីប្រទេសថៃសុំឲ្យកម្ពុជាស៊ើបអង្កេតរកជនសង្ស័យក្នុងការផ្ទុះគ្រាប់បែកនៅទីក្រុងបាងកកកាលពីខែសីហានោះទេ បន្ទាប់ពីមានការចាប់ខ្លួនជនសង្ស័យទីពីរនៅក្នុងទឹកដីប្រទេសថៃដែលស្ថិតនៅតែប៉ុន្មានគីឡូម៉ែត្រប៉ុណ្ណោះពីព្រំដែនប្រទេសកម្ពុជាកាលពីថ្ងៃអង្គារ។
អាជ្ញធរថៃបានឃុំខ្លួនបុរសពីរនាក់ដែលត្រូវសង្ស័យថា បានទាក់ទងនឹងករណីផ្ទុះគ្រាប់បែកកាលពីថ្ងៃទី១៧ខែសីហា។ ជនសង្ស័យម្នាក់ដែលត្រូវបានចាប់ខ្លួនកាលពីថ្ងៃអង្គារត្រូវបានគេស្គាល់អត្តសញ្ញាណថា ឈ្មោះ Emrah Davutoglu ជនជាតិតួគី ហើយដែលបានរៀបការជាមួយស្ត្រីថៃម្នាក់ដែលជាជនសង្ស័យផងដែរ។
ប្រព័ន្ធផ្សព្វផ្សាយព័ត៌មានថៃបានរាយការណ៍ថា Davutoglu ត្រូវបានចាប់ខ្លួននៅប្រទេសកម្ពុជា និងត្រូវបានប្រគល់ទៅឱ្យប្រទេសថៃ ប៉ុន្តែប៉ូលិសនិងមន្រ្តីកម្ពុជា បាននិយាយថា គ្មានព័ត៌មានដែលថា ជនសង្ស័យនេះត្រូវបានចាប់ខ្លួននៅក្នុងប្រទេសកម្ពុជានោះទេ ហើយកម្ពុជាក៏ពុំមានសំណើជាផ្លូវការពីអាជ្ញាធរថៃស្នើសូមជំនួយពីកម្ពុជាក្នុងការស៊ើបអង្កេតរឿងនេះដែរ។
លោក ខៀវ សុភ័គ អ្នកនាំពាក្យក្រសួងមហាផ្ទៃ បានថ្លែងប្រាប់វីអូអេខ្មែរថា លោកមិនមានព័ត៌មានជាក់លាក់អំពីការចាប់ខ្លួនជនសង្ស័យនេះកាលពីថ្ងៃអង្គារនោះទេ ហើយលោកក៏មិនបានឮអំពីសំណើជាផ្លូវការ ឬមិនផ្លូវការពីអាជ្ញាធរថៃសុំជំនួយពីកម្ពុជាក្នុងការស្វែងរកជនសង្ស័យនោះដែរ។
លោកបាននិយាយថា៖ «ខ្ញុំមិនបានដឹងផង។ ប៉ុន្តែយោងតាមនាយករដ្ឋមន្រ្តីថៃលោកបាននិយាយថា [ជនសង្ស័យ]ត្រូវចាប់ខ្លួននៅក្នុងប្រទេសថៃ ប្រហែលពីរបីគីឡូម៉ែត្រពីព្រំដែនកម្ពុជា។ នេះជាអ្វីដែលនាយករដ្ឋមន្រ្តីរបស់គេបាននិយាយ។ ហើយមិនមានលិខិតជាផ្លូវការផ្ញើមកផង»។
កាសែតបាងកកប៉ុស្តិ៍រាយការណ៍កាលពីថ្ងៃអង្គារថា ជនសង្ស័យត្រូវបានចាប់ខ្លួនដោយអាជ្ញាធរកម្ពុជា ហើយក្រោយមកបានប្រគល់ទៅឱ្យប្រទេសថៃ។
ប៉ុន្តែនគរបាលកម្ពុជា ប៉ូលិសយោធា ទាហានព្រមទាំងអភិបាលខេត្តបន្ទាយមានជ័យ ដែលជាប់ព្រំដែនប្រទេសថៃ បាននិយាយថា អាជ្ញាធរខ្មែរបានទទួលព័ត៌មានថា ជនសង្ស័យត្រូវបានចាប់ខ្លួននៅក្នុងទឹកដីប្រទេសថៃហើយពួកអស់លោកមិនមានព័ត៌មានលម្អិតអំពីការចាប់ខ្លួននេះទេ។ លោក គូសោម សារិទ្ធបាននិយាយថា៖ «ទាហ៊ានថៃចាប់ជនសង្ស័យនៅជិតផ្សាររុងឃ្លឿ»៕
