កូនសត្វផ្សោតឈ្មោលមួយក្បាល ទម្ងន់១០គីឡូក្រាម ត្រូវបានប្រទះឃើញងាប់ ក្នុងភូមិសាស្រ្តភូមិបឹងច្រែង ឃុំសោប ស្រុកព្រែកប្រសព្វ ខេត្តក្រចេះ ដោយអាជ្ញាធរអះអាងថា ងាប់ដោយសារជាប់មង។ នេះបើតាមរដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទ។
សេចក្តីប្រកាសព័ត៌មានរបស់រដ្ឋបាលជលផលដែលចេញផ្សាយកាលពីថ្ងៃពុធ ឱ្យដឹងថាសត្វផ្សោតដែលបានងាប់នោះ គឺជាកូនផ្សោតឈ្មោល ដែលមានទម្ងន់១០គីឡូក្រាម ប្រវែង០,៨៧ម៉ែត្រ អាយុប្រមាណ ៤ថ្ងៃ។
កូនសត្វផ្សោតដែលងាប់នោះ ត្រូវបានប្រទះឃើញជាប់មងហើយមានរលាត់ស្បែក ដាច់កន្ទុយ និងដាច់ព្រុយចំហៀងទាំងសងខាង។
រដ្ឋបាលជលផលបញ្ជាក់ថា ក្រសួងកសិកម្ម រុក្ខាប្រមាញ់ និងនេសាទ បានសហការជាមួយរដ្ឋបាលខេត្តក្រចេះ ស្ទឹងត្រែង និងអង្គការពាក់ព័ន្ធ ដើម្បីបន្តពង្រឹងតំបន់ការពារសត្វផ្សោតរស់នៅ។ បន្ថែមពីនេះ រដ្ឋបាលជលផលក៏បាន សូមអំពាវនាវដល់បងប្អូនប្រជានេសាទ ត្រូវឈប់ប្រើប្រាស់មង សន្ទូចរនង និងឧបករណ៍ខុសច្បាប់ផ្សេងៗក្នុងតំបន់សត្វផ្សោតរស់នៅ។
ក្រោយមានសត្វផ្សោតងាប់ជាបន្តបន្ទាប់ និងបារម្ភអំពីសុវត្ថិភាពសត្វផ្សោតដែលនៅសេសសល់ លោកនាយករដ្ឋមន្រ្តី ហ៊ុន សែន កាលពីខែកុម្ភៈ បានចេញអនុក្រឹត្យមួយ ស្តីពីការកំណត់តំបន់គ្រប់គ្រងសត្វផ្សោតទន្លេមេគង្គ ដែលជាវិធានការថ្មីមួយ ដើម្បីការពារសត្វផ្សោតដែលនៅសេសសល់តិចតួច និងកំពុងប្រឈមនឹងហានិភ័យ។
រដ្ឋបាលជលផលបញ្ជាក់ក្នុងសេចក្តីប្រកាសព័ត៌មានថាការប្រើប្រាស់មង សន្ទូចរនង និងឧបករណ៍ឆក់ ថយចុះពី ៥០ទៅ៦០% ក្រោយរដ្ឋាភិបាលដាក់ចេញវិធានការការពារ។ ទោះជាយ៉ាងណា ក៏នៅតែមានការឆ្លៀតឱកាស ប្រើប្រាស់មង សន្ទួចរនង និងឧបករណ៍ឆក់ខុសច្បាប់ នៅកន្លែងមួយចំនួន ដែលជាហេតុនាំឱ្យសត្វផ្សោតងាប់។
បើតាមអង្គការអភិរក្សសត្វព្រៃនិងធម្មជាតិកម្ពុជា ហៅកាត់ថា WWF កម្ពុជា ក្នុងរយៈពេល៣ឆ្នាំចុងក្រោយនេះ សត្វផ្សោតដែលបានងាប់សរុបមានប្រមាណ ៣០ក្បាល៕