មនុស្សយ៉ាងតិច៣២នាក់ត្រូវបានអាជ្ញាធរចាប់បញ្ជូនទៅតុលាការ និងជិត៤ពាន់នាក់ទៀតត្រូវបានឃាត់ខ្លួនដើម្បី«អប់រំនិងពិន័យ» ក្នុងពេលរដ្ឋាភិបាលរឹតបន្តឹងវិធានការសុខាភិបាលនៅរាជធានីភ្នំពេញ និងតាមបណ្តាខេត្តដើម្បីទប់ស្កាត់ការឆ្លងរាលដាលវីរុសកូវីដ១៩បំប្លែងថ្មី ដែលតា(Delta)។ នេះបើតាមរបាយការណ៍របស់គណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ១៩ ដែលសរុបចំនួន៤ថ្ងៃចុងក្រោយ គឺចាប់ពីថ្ងៃទី២ដល់ថ្ងៃទី៥ ខែសីហា។
របាយការណ៍ឲ្យដឹងថាបុគ្គលដែលល្មើសនឹងវិធានការសុខាភិបាលនិងវិធានការរដ្ឋបាលកាលពីថ្ងៃទី៥ ខែ សីហា មានចំនួន៨២៨នាក់ ដែលក្នុងនោះមាន១៤នាក់ ត្រូវបានបញ្ជូនទៅតុលាការ ឃាត់យានយន្តចំនួន៣៣០គ្រឿងនិងពិន័យជាប្រាក់ចំនួន៤៤លានរៀល។ ចំណែកនៅថ្ងៃទី៤ ខែសីហា អាជ្ញាធរឃាត់មនុស្សចំនួន១.៣៥៤នាក់ ដែលក្នុងនោះ បញ្ជូនទៅតុលាការចំនួន១៨នាក់ ឃាត់យានយន្តចំនួន៧៣៤គ្រឿង ពិន័យជាប្រាក់៣០លាន៧សែនរៀល។
ដោយឡែកកាលពីថ្ងៃទី៣ ខែសីហា អាជ្ញាធរឃាត់ខ្លួនមនុស្សចំនួន៥៤៨នាក់ឃាត់យានយន្តចំនួន២១៥គ្រឿង និងពិន័យជាប្រាក់៣២លានរៀល។ ហើយកាលពីថ្ងៃទី២ ខែសីហា អាជ្ញាធរឃាត់ខ្លួនមនុស្សចំនួន១.១៧៥នាក់ ឃាត់យានយន្តចំនួន៨៩២គ្រឿង និងពិន័យជាប្រាក់ចំនួន១១៨លាន៨សែនរៀល។
បើតាមរបាយការណ៍ដដែលរបស់គណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ១៩ ប្រាក់ពិន័យបានសរុបក្នុងរយៈពេល៤ថ្ងៃមានចំនួន២២៥,៥លានរៀលឬស្មើជាង៥៦.០០០ដុល្លារអាមេរិក។
លោក គឹម សន្តិភាព រដ្ឋលេខាធិការក្រសួងយុត្តិធម៌និងជាអ្នកនាំពាក្យនៃគណៈកម្មការអន្តរក្រសួងដើម្បីប្រយុទ្ធនឹងជំងឺ១៩ ប្រាប់វីអូអេនៅថ្ងៃសុក្រនេះថាអ្នកដែលត្រូវឃាត់ខ្លួន និងបញ្ជូនទៅតុលាការនោះបានបំពានវិធានការផ្សេងៗរបស់អាជ្ញាធរពាក់ព័ន្ធនឹងការធ្វើដំណើរក្នុងម៉ោងហាមឃាត់ការប្រមូលផ្តុំសេពគ្រឿងស្រវឹងនិងអំពើរារាំងការអនុវត្តន៍វិធានការរដ្ឋបាល។ លោកបន្ថែមថាក្នុងរយៈពេលប៉ុន្មានថ្ងៃចុងក្រោយនេះមានមនុស្សប្រមាណ១ពាន់នាក់ក្នុងមួយថ្ងៃត្រូវបានឃាត់ខ្លួន។
លោកថ្លែងថា៖«ពាក់ព័ន្ធនឹងការឃាត់ដើម្បីធ្វើការអប់រំជាមួយនឹងឃាត់ ដើម្បីធ្វើការពិន័យ។ អាហ្នឹងជាង១ពាន់នាក់មួយថ្ងៃៗ។ ឃើញថា អាហ្នឹងវា...ពាក់ព័ន្ធវិធានការរដ្ឋបាលហ្នឹងជាពិសេសហ្នឹងគឺរឿងហាមឃាត់មួយចំនួនតាំងពីបម្រាមគោចរតាំងពីសកម្មភាពដែលត្រូវបានហាមឃាត់ក្នុងម៉ោងពីណាទៅណា។ ហើយ និងសកម្មភាពដែលត្រូវបានហាមឃាត់ដាច់ខាតដូចជាការហាមជួបជុំដើម្បីសេពគ្រឿងស្រវឹងអីៗនេះទាំងអស់ហ្នឹង ចូលក្នុងទាំងអស់ហ្នឹងហើយរឿងមិនពាក់ម៉ាស់មិនពាក់អី ក៏ជារឿងការឃាត់ដើម្បីធ្វើការអប់រំនិងធ្វើការពិន័យដែរបាទ»។
រូបឯកសារ៖ សកម្មភាពអាជ្ញាធររឹតបន្តឹងចរាចរណ៍តាមដងផ្លូវអំឡុងបំរាមគោចរក្នុងរាជធានីភ្នំពេញ ពីម៉ោង៨យប់ដល់៥ព្រឹក ដើម្បីទប់ស្កាត់ការឆ្លងរាលដាលនៃជំងឺកូវីដ១៩ កាលពីថ្ងៃទី ០៨ ខែមេសា ឆ្នាំ ២០២១ កន្លងទៅ។ (កាន់ វិច្ឆិកា/វីអូអេ)
អាជ្ញាធររាជធានីភ្នំពេញបានរឹតបន្តឹងវិធានការសុខាភិបាលក្នុងពេលទីក្រុងត្រូវបានរឹតបន្តឹងនិងដាក់បម្រាមគោចរចាប់ពីម៉ោង៩យប់ដល់ម៉ោង៣ទៀបភ្លឺ ដែលចាប់ពីចុងខែកក្កដាដល់ថ្ងៃទី១២ខែសីហា។ ក្រៅពីការហាមឃាត់ធ្វើដំណើរពេលយប់ ការប្រមូលផ្តុំសេពគ្រឿងស្រវឹង ក៏ត្រូវបានហាមឃាត់ផងដែរ។ ចំណែកកាលពីចុងខែកក្កដាដូចគ្នាខេត្តចំនួន៨ ក្នុងនោះមានខេត្តឧត្តរមានជ័យ បន្ទាយមានជ័យ ប៉ៃលិន បាត់ដំបង ពោធិ៍សាត់កោះកុង ព្រះវិហារ និងខេត្តសៀមរាប ក៏មានការអនុវត្តវិធានការស្រដៀងគ្នាហើយពលរដ្ឋមិនត្រូវបានអនុញ្ញាតចាកចេញឬឆ្លងចូលខេត្តទាំងនោះបានទេ។
ស្របពេលមានវិធានការរឹតបន្តឹងការធ្វើដំណើរនិងជួបប្រជុំគ្នានេះអាជ្ញាធររាជធានីភ្នំពេញក៏បានបិទខ្ទប់ទីតាំងណាដែលត្រូវបានរកឃើញថាមានការឆ្លងវីរុសជំងឺកូវីដ១៩បំប្លែងថ្មីដែលតាជាបន្តបន្ទាប់។ នេះបើតាមលោក គឹម សន្តិភាពអ្នកនាំពាក្យនៃគណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ១៩។
លោកប្រាប់វីអូអេថា៖ «មានការបិទខ្ទប់ជាបន្តបន្ទាប់សំខាន់គ្រាន់តែគោលការណ៍រួមគឺតំបន់ដែលយើងរកឃើញនូវគេហៅប្រភេទជំងឺដែលតាហ្នឹងអាប្រភេទជំងឺថ្មីបំប្លែងខ្លួនថ្មីដែលតាហ្នឹងឲ្យតែតំបន់ហ្នឹងមួយរកឃើញថាមានអ្នកពាក់ព័ន្ធ គឺថាយើង lock[បិទ]នៅក្នុងតំបន់ហ្នឹងហើយ»។
លោក គឹម សន្តិភាព បន្ថែមថាវិធានការបិទខ្ទប់នេះកំពុងធ្វើឡើងនៅទូទាំងប្រទេសកម្ពុជាពោលគឺតំបន់ណាដែលត្រូវអាជ្ញាធររកឃើញថាមានការឆ្លងវីរុសបំប្លែងថ្មីដែលតាតំបន់នោះនឹងត្រូវបិទខ្ទប់ដើម្បីកាត់ផ្តាច់ការចម្លងបន្ថែមទៀត។
ពាក់ព័ន្ធនឹងការបញ្ជូនបុគ្គលដែលបំពានវិធានការទប់ស្កាត់ការឆ្លងរាលដាលនៃវីរុសបំប្លែងថ្មីដែលតា(Delta)ទៅកាន់តុលាការអ្នកនាំពាក្យអយ្យការរបស់សាលាដំបូងរាជធានីភ្នំពេញលោក ប្លង់ សុផល មានប្រសាសន៍ថាលោកមិនទាន់បានឃើញសំណុំរឿងរបស់បុគ្គលជាង៣០នាក់ដែលត្រូវបញ្ជូនមកតុលាការនោះទេ។
លោក ប្លង់ សុផល បញ្ជាក់ថា៖ «ទាល់តែឲ្យដឹងថាសំណុំរឿងបានបញ្ជូនមកហើយអាហ្នឹងខ្ញុំឆែកជូនឃើញអាចដឹងបើមិនទាន់មកទេវានៅតែស្ថិតនៅក្នុងចំណាត់ការរបស់សមត្ថកិច្ចនៅឡើយទេ»។
ប៉ុន្តែអ្នកនាំពាក្យស្នងការដ្ឋាននគរបាលរាជធានីភ្នំពេញលោកសាន សុខសីហា បាននិយាយថានៅក្នុងការពង្រឹងវិធានការសុខាភិបាលនិងរដ្ឋបាលហ្មត់ចត់សម្រាប់រយៈពេលបីថ្ងៃចុងក្រោយនេះអាជ្ញាធរបានបញ្ជូនបុគ្គលដែលបំពានវិធានការរបស់អាជ្ញាធរទៅកាន់តុលាការជាបន្តបន្ទាប់។
លោកថ្លែងថា៖ «បីថ្ងៃហើយ ថ្ងៃមុនហ្នឹង យើងបញ្ជូនបាន១៨[នាក់]បន្តបន្ទាប់មកទៀតហើយយប់មិញនេះយើងបញ្ជូនបានពីរនាក់ទៀតអ្នកដែលទីមួយអ្នកដែលបើកទីតាំងល្មើសនឹងបម្រាមគោចរហើយនៅមានភ្ញៀវ។ ហើយទាក់ទងនឹងការសម្រេចយ៉ាងណាអីយ៉ាងណាសុំ ទាក់ទងទៅខាងតុលាការព្រោះនីតិវិធីបន្តគឺផុតដៃសមត្ថកិច្ចហើយគឺយើងបានបញ្ជូនគាត់ទៅខាងតុលាការហើយ»។
រូបឯកសារ៖ បុគ្គលិកសុខាភិបាលយកសំណាកពីពលរដ្ឋដើម្បីធ្វើតេស្តរកជំងឺកូវីដ១៩ ពីប្រជាពលរដ្ឋក្នុងខណ្ឌទួលគោក ក្នុងរាជធានីភ្នំពេញ ប្រទេសកម្ពុជា កាលពីថ្ងៃទី ១៣ ខែឧសភា ឆ្នាំ២០២១។ (ទុំ ម្លិះ/វីអូអេ)
បើតាមរបាយការណ៍របស់ក្រសួងសុខាភិបាលចេញផ្សាយនៅថ្ងៃសុក្រនេះ អាជ្ញាធរបានរកឃើញវីរុសបំប្លែងថ្មីដែលតា(Delta)ចំនួន៦៧ករណីក្នុងរយៈពេល២ថ្ងៃជាប់គ្នា គឺនៅថ្ងៃទី៤ និងទី៥ ខែសីហា។
ក្នុងនោះមានជាង៣០ករណីរកឃើញនៅរាជធានីភ្នំពេញ និងករណីមួយចំនួនទៀតត្រូវបានរកឃើញក្នុងខេត្តព្រះវិហារកំពង់ធំស្ទឹងត្រែង ឧត្តរមានជ័យសៀមរាប កំពង់ចាមបន្ទាយមានជ័យ និងស្វាយរៀង។
លោកយង់ គិមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព កត់សមា្គល់ចន្លោះខ្វះខាតមួយចំនួនរបស់អាជ្ញាធរពាក់ព័ន្ធនឹងការជូនដំណឹងអំពីវិធានការនានាដែលធ្វើឡើងក្នុងរយៈពេលខ្លីដែលការណ៍នេះបានធ្វើឲ្យពលរដ្ឋប្រឈមនឹងការឃាត់ខ្លួននិងពិន័យ។
យ៉ាងណាក៏ដោយលោកលើកទឹកចិត្តឲ្យអាជ្ញាធរមានសមត្ថកិច្ចប្រកាន់យកវិធានការអប់រំ ជាមុន មុនឈានដល់ការឃាត់ខ្លួនឬពិន័យជាប្រាក់នោះ។ លោកក៏បង្ហាញការបារម្ភចំពោះទម្លាប់របស់ពលរដ្ឋដែលនៅតែចូលចិត្តការទទួលទានគ្រឿងស្រវឹងរួមគ្នា ដែលជាការបំពានលើបម្រាមរបស់រដ្ឋាភិបាល។
លោកយង់ គិមអេងថ្លែងថា៖ «រឿងដែលសំខាន់បំផុតយើងឃើញថាអ្នកខ្លះដឹងហើយ ឮហើយហ្នឹងនៅតែបំពានទៅទៀតបាទ រឿងៗ ផឹកស៊ីហ្នឹងហ្មងបាទ ដែលមិនឈប់ ដែលមិនអាចខានបានដូចជាចង់ជួបគ្នាដូចជាចង់ផឹកស៊ីបើគេថាអាជួបជុំហ្នឹងវាបញ្ហាហើយហើយអាផឹកស៊ីហ្នឹងមានបញ្ហាហើយនៅតែចង់ជួបជុំ នៅតែចង់ផឹកស៊ីនោះជារឿងមួយសំខាន់ដែលខ្ញុំឃើញថាវាមិនគួរនឹងកើតមានចឹងសោះបាទ»។
គួរបញ្ជាក់ថានៅថ្ងៃសុក្រនេះ ក្រសួងសុខាភិបាល បានរាយការណ៍ករណីឆ្លងថ្មីចំនួន៥៨៨នាក់ ក្នុងនោះមានជាង៤០០នាក់ជាករណីឆ្លងក្នុងស្រុក មិនមែននាំចូលពីក្រៅប្រទេស។ គិតត្រឹមថ្ងៃទី៥ ខែសីហាមានករណីឆ្លងជំងឺ១៩សរុបជាង៨ម៉ឺននាក់។ ចំណែកអ្នកស្លាប់ថ្មីមានចំនួន១៩នាក់ ដែលនាំឲ្យអ្នកស្លាប់សរុបដោយជំងឺកូវីដ១៩កើនឡើងដល់១.៥២៦នាក់៕