តុលាការរាជធានីភ្នំពេញបានសម្រេចចោទប្រកាន់មនុស្សយ៉ាងតិច ៥ នាក់ កាលពីចុងសប្តាហ៍ពាក់ព័ន្ធនឹងការបំពានវិធានការរបស់រដ្ឋាភិបាលក្នុងការបិទខ្ទប់រាជធានីភ្នំពេញ ដោយពួកគេអាចជាប់ពន្ធនាគារពី ៦ ខែទៅ ៣ ឆ្នាំ ប្រសិនបើរកឃើញកំហុស។
ការចាប់ខ្លួន ចោទប្រកាន់និងកាត់ទោសភ្លាមៗ ធ្វើឡើងតាមការស្នើសុំរបស់លោកនាយករដ្ឋមន្ត្រី ហ៊ុន សែន ដែលលោកថា ការកាត់ទោសនេះ ដើម្បីធានាប្រសិទ្ធភាពនៃការបិទខ្ទប់ទីក្រុងភ្នំពេញទប់ការឆ្លងជំងឺកូវីដ១៩។
កាលពីយប់ថ្ងៃទី ១៦ ខែមេសា នគរបាលបានចាប់ខ្លួនបុរស ៣ នាក់ ដែលពាក់ព័ន្ធនឹងការជួបជុំផឹកស៊ីមានគ្នាច្រើន ស្ថិតក្នុងភូមិដំណាក់ធំទី ២ ក្នុងសង្កាត់ស្ទឹងមានជ័យទី ៣ ខណ្ឌមានជ័យ។ ក្នុងចំណោមអ្នកទាំង ៣ ក៏មានមន្ត្រីនគរបាលផ្កាយ២មួយរូប គឺលោក អ៊ុង ចាន់ធួក អាយុ ៤៧ ឆ្នាំ ដែលមានតួនាទីជាអនុប្រធានសេនាធិការនៃអគ្គស្នងការដ្ឋាននគរបាលជាតិ។ បុរស ២ នាក់ទៀត ជាគូកនរបស់លោក។
មួយថ្ងៃបន្ទាប់ពីការចាប់ខ្លួន មន្ត្រីផ្កាយ ២ នោះត្រូវបានដកស័ក្ដិនិងបណ្ដេញចេញពីក្របខណ្ឌមន្ដ្រីនគរបាលជាតិ តាមបញ្ជារបស់លោកនាយករដ្ឋមន្ត្រី ហ៊ុន សែន។ នេះបើតាមព្រះរាជក្រឹត្យរបស់ព្រះមហាក្សត្រចុះថ្ងៃទី ១៧ ខែមេសា ដែល VOA ទទួលបាន។
កាលពីថ្ងៃទី ១៧ ខែមេសាលោក ហ៊ុន សែន បានប្រតិកម្មខ្លាំងៗលើមន្ត្រីផ្កាយ ២ រូបនេះ ដោយបញ្ជាឲ្យកាត់ទោសភ្លាមៗ។ នេះបើតាមសារជាសំឡេងមួយរបស់នាយករដ្ឋមន្ត្រី ដែលត្រូវបានផ្សព្វផ្សាយតាមសារព័ត៌មានក្នុងស្រុកនានា។
លោក ហ៊ុន សែន បានថ្លែងថា៖ «អាម្នាក់នេះត្រូវតែកាត់ទោស ហើយខ្ញុំកំពុងធ្វើនីតិវិធីដើម្បីស្នើសុំព្រះមហាក្សត្រដកស័ក្តិ ហើយបណ្តេញចេញពីនគរបាលជាតិ។ វាយខ្នោះហើយ គឺថា អត់មានព្រលែងអីទេ ត្រូវតែកាត់ទោស»។
លោក គុជ គឹមឡុង អ្នកនាំពាក្យរបស់សាលាដំបូងរាជធានីភ្នំពេញ បានឲ្យដឹងថា បុរសទាំង ៣ នាក់នោះ ត្រូវបានចោទប្រកាន់តាមច្បាប់កូវីដ១៩ ថ្មី ហើយបញ្ជូនទៅជំនុំជម្រះភ្លាមៗ ប៉ុន្តែមិនទាន់ត្រូវបានកាត់ទោសនៅឡើយទេ ដោយសារពួកគេស្នើសុំមេធាវី ដើម្បីការពារ។
លោកប្រាប់អ្នកសារព័ត៌មានតាមប្រព័ន្ធតេឡេក្រាម (Telegram) ថា៖ «ករណីនេះសូមបញ្ជាក់ក្រោយពី លោកព្រះរាជអាជ្ញារង ឡុង ជាប បានសាកសួរតាមនីតិវិធី បានសម្រេចចោទប្រកាន់[តាម] មាត្រា ៤ មាត្រា ១១ នៃច្បាប់កូវីដហើយបានបញ្ជូនទៅតាមនីតិវិធី បង្ហាញខ្លួនភ្លាមៗ គឺបញ្ជូនទៅតុលាការជំនុំជម្រះនៅរសៀលនេះ[ថ្ងៃអាទិត្យ]។ ហើយលោកចៅក្រមជំនុំជម្រះ លោក អ៊ុក សុវណ្ណារិទ្ធ បានសម្រេចឃុំខ្លួនជាបណ្តោះអាសន្ន ដោយសារក្នុងពេលសវនាការ ជនជាប់ចោទស្នើសិទ្ធិសុំពឹងពាក់មេធាវី។ ដើម្បីទុកពេលឲ្យរកមេធាវី ដូច្នេះចៅក្រមជំនុំជម្រះបានសម្រេចឃុំខ្លួនជាបណ្តោះអាសន្ន ហើយរយៈពេល ២ សប្តាហ៍ក្រោយ នឹងយកមកជំនុំជម្រះសាជាថ្មីម្តងទៀត»។
ចំណែកករណីមួយទៀត គឺបុរសម្នាក់ដែលត្រូវបាននគរបាលបង្ហាញឈ្មោះ គឺលោក សៀង រង្សី អាយុ៣៥ឆ្នាំ បានបើករថយន្តក្នុងពេលរាំងខ្ទប់ការធ្វើដំណើរ ហើយថតវីដេអូបង្ហោះលើបណ្តាញសង្គមហ្វេសប៊ុក ក៏ត្រូវបានចាប់ខ្លួន កាលពីថ្ងៃទី ១៧ ខែមេសា។ លោកត្រូវបានចោទប្រកាន់តាមមាត្រា ១១ នៃច្បាប់កូវីដថ្មី ហើយបញ្ជូនទៅជំនុំជម្រះ ប៉ុន្តែលោកបានស្នើសុំរកមេធាវីការពារសិន ដូច្នេះតាមនីតិវិធីច្បាប់ ត្រូវទុករយៈពេល ២ សប្តាហ៍ ដើម្បីរកមេធាវីការពារសិទ្ធិ។ នេះបើតាមអ្នកនាំពាក្យរបស់តុលាការ។
ចំណែកករណីដាច់ដោយឡែកមួយទៀត បុរសម្នាក់ទៀត ដែលត្រូវបាននគរបាលបង្ហាញឈ្មោះ គឺលោក ដារ៉ា រ័ត្នសុគុន អាយុ ២៧ ឆ្នាំ ត្រូវបានចាប់ខ្លួន ដោយសារយកកូនកាំបិតកាត់ខ្សែរបាំងការពារគោលដៅរបស់សមត្ថកិច្ច ក្នុងសង្កាត់ផ្សារដេប៉ូទី ២ ខណ្ឌទួលគោក។ បុរសម្នាក់នេះត្រូវបានចៅក្រមជំនុំជម្រះលោក ឡុង វណ្ណា ផ្តន្ទាទោសដាក់ពន្ធនាគារ ១ ឆ្នាំ តាមមាត្រា ១១ នៃច្បាប់ស្តីពីកូវីដ១៩។ នេះបើតាមលោក គុជ គឹមឡុង អ្នកនាំពាក្យតុលាការរាជធានីភ្នំពេញ។
រថយន្តរបស់ក្រុមមន្ត្រីសុខាភិបាល កំពុងដឹកអ្នកជំងឺកូវីដ១៩ មកទទួលការព្យាបាលនៅមណ្ឌលព្យាបាល នៅកោះពេជ្រ រាជធានីភ្នំពេញ ថ្ងៃទី១៥ ខែមេសា ឆ្នាំ២០១៩។ (ហ៊ាន សុជាតា/វីអូអេ)
មាត្រា ៤ នៃច្បាប់ស្តីពីវិធានការប្រឆាំងជំងឺកូវីដ១៩ ដែលត្រូវបានប្រកាសឲ្យប្រើប្រាស់តាំងពីថ្ងៃទី ១១ ខែមីនា ឆ្នាំ ២០២១ ចែងអំពីវិធានការដ្ឋបាលនិងវិធានការផ្សេងៗទៀត ដែលរដ្ឋាភិបាលអាចដាក់ចេញជាបណ្តោះអាសន្នដែលមានភាពចាំបាច់និងមានប្រយោជន៍ ដើម្បីឆ្លើយតបឲ្យបានទាន់ពេលវេលាក្នុងការប្រយុទ្ធនិងទប់ស្កាត់ការឆ្លងរាលដាលជំងឺកូវីដ១៩។ វិធានការនោះមានការរឹតត្បិត ឬការហាមឃាត់ការធ្វើដំណើរ ការរឹតត្បិត ឬការហាមឃាត់ការជួបជុំ និងការបិទខ្ទប់តំបន់ ឬកន្លែងមួយចំនួនជាដើម។
ចំណែកមាត្រា ១១ នៃច្បាប់ស្តីពីកូវីដដែលចែងថាអំពើរារាំង ឬបង្កឧបសគ្គដោយចេតនាដល់ការអនុវត្តវិធានការដែលបានដាក់ចេញស្របតាមច្បាប់នេះ ត្រូវផ្តន្ទាទោសដាក់ពន្ធនាគារពី ៦ ខែទៅ ៣ ឆ្នាំ។ ប្រសិនបើត្រូវបានរកឃើញថាមានកំហុស ពួកគេក៏ត្រូវប្រឈមនឹងការផាកពិន័យជាប្រាក់ពី ៥០០ ដុល្លារទៅ ២.៥០០ ដុល្លារអាមេរិក។
ក្រោយការបង្កើតច្បាប់ថ្មីស្តីពីវិធានការលើជំងឺកូវីដ១៩ មនុស្សយ៉ាងតិច ៤ នាក់ទៀត ក៏ត្រូវបានចោទប្រកាន់ ពាក់ព័ន្ធនឹងការអត្ថាធិប្បាយលើបណ្ដាញសង្គមកុំឲ្យចាក់វ៉ាក់សាំងរបស់ចិន។
លោកស្រី ចក់ សុភាព នាយិកានៃមជ្ឈមណ្ឌលសិទ្ធិមនុស្សកម្ពុជា មានប្រសាសន៍ថា ក្នុងកាលៈទេសៈនេះ ភាគីពាក់ព័ន្ធ រួមមានរដ្ឋាភិបាល អាជ្ញាធរ និងប្រជាពលរដ្ឋមានការលំបាកដូចគ្នា។ លោកស្រីអំពាវនាវឲ្យប្រជាពលរដ្ឋចូលរួមទាំងអស់ក្នុងការទប់ស្កាត់ជំងឺរាតត្បាតនេះ។
លោកស្រីប្រាប់ VOA នៅថ្ងៃច័ន្ទនេះថា៖ «សម្រាប់ខ្ញុំ ខ្ញុំលើកទឹកចិត្តឲ្យធ្វើការបន្តក្នុងការផ្សព្វផ្សាយហើយពលរដ្ឋត្រូវស្វែងយល់ ហើយចូលរួមសហការឲ្យបានពេញលេញ ដើម្បីរួចឆ្លងផុតនូវការរីករាលដាលនេះទាំងអស់គ្នា»។
ទោះជាយ៉ាងណា លោកស្រី ចក់ សុភាព ជំរុញអ្នកដែលត្រូវបានចាប់ខ្លួន ទទួលបានសិទ្ធិក្នុងការជំនុំជម្រះដោយយុត្តិធម៌។
លោកស្រីបន្ថែមថា៖ «ទោះបីនៅក្នុងកាលៈទេសៈណាក៏ដោយ មិនថានៅក្នុងកាលៈទេសៈមុនការរាតត្បាតឬក៏ក្នុងអំឡុងពេលនៃការរាតត្បាតនេះ ការធានាឲ្យបាននូវសិទ្ធិទទួលបានការជំនុំជម្រះដោយយុត្តិធម៌ គឺចាំបាច់ណាស់»។
គួរបញ្ជាក់ថាជាបន្តបន្ទាប់ រដ្ឋាភិបាលចាប់ផ្តើមរឹតបន្តឹងការរាំងខ្ទប់ទីក្រុងយ៉ាងតឹងរ៉ឹង ដោយលោកនាយករដ្ឋមន្ត្រី ហ៊ុន សែន ក៏បានបញ្ជាឲ្យលោក វង្ស ពិសេន អគ្គមេបញ្ជាការនៃកងយោធពលខេមរភូមិន្ទ និងកូនប្រុសរបស់លោក គឺ លោក ហ៊ុន ម៉ាណែត ដែលជាអគ្គមេបញ្ជាការរងនៃកងយោធពលខេមរភូមិន្ទនិងជាមេបញ្ជាការកងទ័ពជើងគោក ពង្រាយកងទ័ពក្នុងទីក្រុង ដើម្បីធានាថា ការរាំងខ្ទប់ក្នុងទីក្រុងមានប្រសិទ្ធភាព។
លោក ហ៊ុន សែន ក៏បានព្រមានមេនគរបាល ដែលលោកថា «ពុករលួយ» ក្នុងពេលរឹតបន្តឹងការធ្វើដំណើរក្នុងទីក្រុង៕