មុនពេលក្រុមទាហានស៊ីឈ្នួល Wagner បានងាកមកវាយបកលើរុស្ស៊ីកាលពីថ្ងៃសៅរ៍ រុស្ស៊ីប្រហែលជាបានជួបវិបត្តិនយោបាយដ៏ធំមួយមិនធ្លាប់មានក្នុងរយៈពេលប៉ុន្មានទសវត្សរ៍ចុងក្រោយ ប៉ុន្តែស្ថានភាពនៅទីក្រុងមូស្គូមានសភាពស្ងប់ស្ងាត់ ដោយហាងកាហ្វេនានានៅតែមានមនុស្សយ៉ាងមមាញឹក និងមានសញ្ញានៃការព្រួយបារម្ភតិចតួចប៉ុណ្ណោះ នៅក្នុងរដូវក្ដៅនេះ។
សន្តិសុខនៅក្នុងទីក្រុងត្រូវបានរឹតបន្តឹងកាលពីថ្ងៃសៅរ៍ ដោយមានកងកម្លាំងប្រដាប់ដោយកាំភ្លើង និង អាវក្រោះកំពុងយាមអគាររដ្ឋសភា ហើយទីលានក្រហម (Red Square) ត្រូវហាមមិនឱ្យសាធារណជនចូល។
លោក Sergei Sobyanin អភិបាលក្រុងមូស្គូ បានថ្លែងថា វិធានការនានាប្រឆាំងនឹងភេរវករត្រូវបានដាក់ចេញហើយ ប៉ុន្តែក្រុមអ្នកទេសចរ និង ពលរដ្ឋនៃទីក្រុងមូស្គូ នៅតែអាចធ្វើដំណើរដោយសេរីនៅកណ្តាលទីក្រុងនេះ។ មនុស្សខ្លះទិញផ្លែ strawberries ស្រស់ និង ការ៉ែម ខណៈដែលអ្នកខ្លះទៀតកំពុងដឹកឆ្កែរបស់គេ។
មុនពេលក្រុមទាហានស៊ីឈ្នួល Wagner ប្រកាសដកខ្លួនគួរឲ្យភ្ញាក់ផ្អើលកាលពីល្ងាចថ្ងៃសៅរ៍ ពលរដ្ឋរុស្ស៊ីមួយចំនួននិយាយថា ពួកគេសង្ឃឹមថា កងទ័ពរបស់រុស្ស៊ីនេះនឹងបង្ក្រាបអ្វីដែលអាជ្ញាធរហៅថា «ក្រុមបះបោរប្រដាប់អាវុធ» និងការពារពួកគេពីក្រុមទាហានស៊ីឈ្នួលដែលមេដឹកនាំឈ្មោះ Yevgeny Prigozhin បានប្ដេជ្ញាទម្លាក់ថ្នាក់ដឹកនាំយោធា។
ទាហានរុស្ស៊ីដើរបោសសម្អាតតាមដងផ្លូវក្នុងទីក្រុង Rostov-on-Don ប្រទេសរុស្ស៊ី ថ្ងៃទី ២៥ ខែមិថុនា ឆ្នាំ២០២៣ ក្រោយពីទាហានស៊ីឈ្នួល Wagner បានចាកចេញពីទីក្រុងនេះ។
ដោយសុំមិនបញ្ចេញនាមត្រកូល អ្នកស្រី Yelena អាយុ ៣៥ ឆ្នាំ បានថ្លែងប្រាប់ទីភ្នាក់ងារ AFP នៅកណ្តាលទីក្រុងមូស្គូ ថា៖ «ខ្ញុំបានអានព័ត៌មាននៅព្រឹកនេះ ហើយខ្ញុំមានការភ្ញាក់ផ្អើលយ៉ាងខ្លាំង។ ខ្ញុំមិនដឹងថា ត្រូវប្រតិកម្មយ៉ាងណាចំពោះព័ត៌មាននេះទេ។ តែយ៉ាងណាក៏ដោយ វាគួរឲ្យសោកស្ដាយណាស់ដែលរឿងបែបនេះកើតឡើង»។
លោក Sergei អាយុ ២៧ ឆ្នាំគឺជាសហគ្រិន។ លោកបានទទួលស្គាល់ថា ព្រឹត្តិការណ៍ដែលកើតមានឡើងយ៉ាងលឿនបែបនេះ ធ្វើឲ្យលោកមានការភ័យខ្លាច។
ដោយសុំមិនបញ្ចេញនាមត្រកូល បុរសវ័យក្មេងរូបនេះបានថ្លែងថា៖ «ខ្ញុំបានគិតថា ស្ថានការណ៍ទាំងមូលនឹងបង្កគ្រោះថ្នាក់ ហើយរឿងបែបនេះអាចកើតឡើង ប៉ុន្តែនោះគ្រាន់តែជាការទស្សន៍ទាយរបស់ខ្ញុំប៉ុណ្ណោះ។ ប៉ុន្តែពេលដែលរឿងបែបនេះកើតឡើង ខ្ញុំមានអារម្មណ៍តឹងតែង»។
បន្ទាប់ពីប្រធានាធិបតីរុស្ស៊ី លោក Vladimir Putin បានបញ្ជូនកងទ័ពទៅប្រទេសអ៊ុយក្រែនកាលពីខែ កុម្ភៈ ឆ្នាំ ២០២២ អាជ្ញាធររុស្ស៊ីបានហាមប្រាមដ៏តឹងរ៉ឹងមិនឲ្យរិះគន់លើកងទ័ព ហើយពលរដ្ឋក្នុងស្រុកជាច្រើននិយាយជាមួយអ្នកកាសែតដោយស្ទាក់ស្ទើរ។
លោក Sobyanin អភិបាលក្រុងមូស្គូ បានថ្លែងថា ស្ថានការណ៍នៅក្នុងរដ្ឋធានីនៅពេលនេះមានសភាព «ពិបាក»។ លោកបានព្រមានថា អាចនឹងមានការបិទផ្លូវ។ លោកប្រកាសថា ថ្ងៃចន្ទនេះគឺជាថ្ងៃមិនធ្វើការ។
លោកបន្ថែមថា៖ «ខ្ញុំស្នើសុំឲ្យពលរដ្ឋចៀសវាងការធ្វើដំណើរក្នុងទីក្រុង តាមតែអាចធ្វើទៅបាន»។
លោក Prigozhin មេបញ្ជាការក្រុមទាហានស៊ីឈ្នួល Wagner បានជជែកតវ៉ាជាមួយក្រសួងការពារជាតិរុស្ស៊ីអស់រយៈពេលជាច្រើនខែមកហើយ។ កាលពីថ្ងៃសុក្រ លោកបានចោទប្រកាន់ថ្នាក់ដឹកនាំក្រសួងការពារនេះថា បានសម្លាប់កូនទាហានរបស់លោកជាច្រើននាក់ និងបានប្ដេជ្ញាទម្លាក់ថ្នាក់ដឹកនាំកំពូលនៃក្រសួងនេះ។
កងកម្លាំង Wagner បានកាន់កាប់ស្នាក់ការយោធាសំខាន់ៗនៅភាគខាងត្បូងនៃទីក្រុង Rostov-on-Don ហើយប្រុងរុលឆ្ពោះទៅទីក្រុងមូស្គូ កាលពីថ្ងៃសៅរ៍។
ប៉ុន្តែ នៅក្នុងសេចក្ដីប្រកាសដ៏គួរឲ្យភ្ញាក់ផ្អើលមួយកាលពីថ្ងៃសៅរ៍ លោក Prigozhin បានថ្លែងថា ទាហានរបស់លោកបានដកខ្លួនហើយដើម្បីបញ្ចៀសការបង្ហូរឈាម។
យុវជនឈ្មោះ Danil Novokreshchenov អាយុ ២២ ឆ្នាំបាននិយាយថា៖ «រឿងរ៉ាវនៅប្រទេសរុស្ស៊ីមិនដែលមានភាពស្ងប់ស្ងាត់នោះទេ»។ លោកបន្ថែមថា ប្រទេសនេះមានប្រវត្តិសាស្ត្រដ៏ច្របូកច្របល់។
លោក Putin បានថ្លែងតាមទូរទស្សន៍ជាបន្ទាន់មួយកាលពីព្រឹកថ្ងៃសៅរ៍ ដោយបានចោទប្រកាន់លោក Prigozhin ពីបទក្បត់ជាតិ និងបានប្រដូចព្រឹត្តិការណ៍នេះទៅនឹងព្រឹត្តិការណ៍កាលពីឆ្នាំ ១៩១៧ ដែលពេលនោះមេដឹកនាំរុស្ស៊ីស្តេច Tsar Nicholas II បានដឹកនាំខុសពាក់ព័ន្ធសង្គ្រាមលោកលើកទី១ ដែលជំរុញឲ្យមានការបះបោររបស់ពលរដ្ឋ និងបាននាំឱ្យមានសង្គ្រាមស៊ីវិល។
លោក Putin ថ្លែងថា៖ «យើងនឹងមិនអនុញ្ញាតឲ្យរឿងបែបនេះកើតឡើងម្ដងទៀតទេ»។
អ្នកស្រី Olga Schmidt អាយុ ២៩ ឆ្នាំ និងជាអ្នកគ្រប់គ្រងគម្រោងមួយ បាននិយាយថា អ្នកស្រី ជឿថា កងទ័ពរុស្ស៊ីនឹងមានសមត្ថភាពបញ្ឈប់លោក Prigozhin។ អ្នកស្រីលើកឡើងថា លោក Prigozhin គិតថា ខ្លួនមានអំណាច។ អ្នកស្រីថ្លែងថា៖ «នៅពេលយើងមានមនុស្សជាច្រើនស្ថិតក្រោមការបញ្ជារបស់យើង ពេលនោះយើងចាប់ផ្ដើមមានអារម្មណ៍ថា យើងមានអំណាច»។
អ្នកស្រី Olga Sokolova អាយុ ៥៧ ឆ្នាំ ដែលជាគ្រូបង្រៀនភាសាអង់គ្លេស បានថ្លែងថា អ្នកស្រីសង្ឃឹមថានឹងមាន«លទ្ធផលវិជ្ជមាន»។
អ្នកស្រីនិយាយថា៖ «ខ្ញុំផ្ទាល់ និងមនុស្សផ្សេងទៀតដែលខ្ញុំស្គាល់ ជឿជាក់ និង សង្ឃឹមថា អ្វីគ្រប់យ៉ាងនឹងល្អ ហើយសណ្តាប់ធ្នាប់នឹងមានឡើងវិញ»៕
ប្រែសម្រួលដោយលោក នៀម ឆេង