ក្រុមហ៊ុន Volvo មកពីប្រទេសស៊ុយអែត ក្រុមហ៊ុន Adidas មកពីប្រទេសអាល្លឺម៉ង់ និងក្រុមហ៊ុន Zara មកពីប្រទេសអេស្ប៉ាញ សុទ្ធតែជាក្រុមហ៊ុនអឺរ៉ុបដែលបានបង្កើនវិនិយោគនៅក្នុងប្រទេសវៀតណាមកាលពីប៉ុន្មានឆ្នាំថ្មីៗនេះ។ ពួកអ្នកវិភាគរំពឹងថា និន្នាការនេះនឹងមានខ្លាំងថែមទៀតនៅក្រោយកិច្ចព្រមព្រៀងពាណិជ្ជកម្មជាមួយសហភាពអឺរ៉ុបដែលរដ្ឋសភានៃប្រទេសវៀតណាមបានផ្តល់ការយល់ព្រមកាលពីដើមខែមិថុនាដែលនឹងចូលជាធរមាននៅរដូវក្តៅនេះ ជាពិសេសដោយសារក្រុមហ៊ុនទាំងនេះចង់កាត់បន្ថយការពឹងពាក់លើប្រទេសចិននៅជិតខាងវៀតណាម។
វៀតណាមជាប្រទេសមួយក្នុងបណ្តាប្រទេសជាតិមួយចំនួនតូចដែលត្រូវគេទស្សន៍ទាយថានឹងមានការលូតលាស់សេដ្ឋកិច្ចនៅឆ្នាំនេះ នៅពេលមានការរាតត្បាតជាសាកលនៃជំងឺកូវីដ១៩។ ភាគច្រើននៃការលូតលាស់នេះជាលទ្ធផលនៃវិនិយោគបរទេសដោយមានរួមបញ្ចូលការបណ្តាក់ទុនត្រូវសម្រួលដោយកិច្ចព្រមព្រៀងពាណិជ្ជកម្មសេរីរវាងសហភាពអឺរុបនិងប្រទេសវៀតណាមហៅកាត់ថា EVFTA។ រដ្ឋាភិបាលនៃភាគីទាំងសងខាងនេះបានហៅកិច្ចព្រមព្រៀងនេះថាជាកិច្ចព្រមព្រៀង«ជំនាន់ក្រោយ» ពីព្រោះវាមិនគ្រាន់តែបន្ថយតារាងពន្ធគយប៉ុណ្ណោះទេក៏ប៉ុន្តែក៏មានពាក្យពេចន៍ឱ្យក្រុមហ៊ុនបរទេសទៅរកស៊ីនៅប្រទេសវៀតណាមធ្វើតាមស្តង់ដារខាងពលកម្ម ខាងបរិដ្ឋាននិងខាងសង្គមផងដែរ។
លោក Sheng Lu ជាសាស្ត្រាចារ្យនៅឯដេប៉ាតឺម៉់ង់ខាងការសិក្សាអំពីម៉ូតនិងសម្លៀកបំពាក់នៃសាកលវិទ្យាល័យរដ្ឋ Delaware។ លោកបាននិយាយថាកិច្ចព្រមព្រៀងនេះនឹងផ្តល់អត្ថប្រយោជន៍ឱ្យដល់ក្រុមហ៊ុនផលិតវាយនភណ្ឌនិងសម្លៀកបំពាក់នៅក្នុងប្រទេសជាតិនេះនៃអាស៊ីអាគ្នេយ៍ពីព្រោះមានការបន្ទាបតារាងពន្ធគយ។
លោក Lu បានសរសេរនៅក្នុងបទវិភាគមួយអំពីកិច្ចព្រមព្រៀងនេះថា «កិច្ចព្រមព្រៀង EVFTA នឹងផ្តល់ឱ្យប្រទេសវៀតណាមនូវស្ថានភាពមួយដែលគ្រប់គ្នាមានឱកាសស្មើគ្នាដោយយុត្តិធ៌មក្នុងការធ្វើឱ្យមានជោគជ័យដែលគេរំពឹងថានឹងមានការបង្កើនការដឹកជញ្ជូនសម្លៀកនៅបំពាក់ពីប្រទេសវៀតណាមទៅលក់ក្នុងសហភាពអឺរ៉ុបហើយវៀតណាមនឹងចំណេញដោយមានការចំណែកបន្ថែមក្នុងផ្សារអឺរ៉ុបក្នុងឆ្នាំខាងមុខទៀតផងដែរ។ នៅពេលជាមួយគ្នានេះ ដោយគ្មានសិទ្ធិសម្រាប់អត្ថប្រយោជន៍នៃការអធ្យាស្រ័យខាងពន្ធគយរបស់សហភាពអឺរុប ក្រុមហ៊ុនដឹកជញ្ជូនសម្លៀកបំពាក់ពីប្រទេសចិនទំនងជានឹងប្រឈមនឹងការប្រជែងខ្លាំងជាងមុននៅក្នុងផ្សារសហភាពអឺរ៉ុបនៅក្រោយការអនុវត្តន៍កិច្ចព្រមព្រៀង EVFTA»។
វិនិយោគបានជ្រាបចេញពីប្រទេសចិនដោយសារមានការរាតត្បាតជាសាកលនៃជំងឺកូវីដ១៩ និងសង្គ្រាមពាណិជ្ចកម្មរវាងស.រ.អា.និងចិន ដោយក្រុមហ៊ុនបរទេសឃើញហានិភ័យនៃការពឹងពាក់លើប្រទេសជាតិតែមួយសម្រាប់បណ្តាញផ្គត់ផ្គង់របស់ពួកគេ។ នៅពេលដែលពួកមន្ត្រីនិងពួកអ្នកពិគ្រោះយោបល់នៅក្នុងប្រទេសវៀតណាមយកសហភាពអឺរ៉ុបជាកន្លែងសម្រាប់ទទួលវិនិយោគនោះ កិច្ចព្រមព្រៀងពាណិជ្ជកម្មជាមួយសហភាពអឺរ៉ុបជាអត្ថប្រយោជន៍ក្នុងបណ្តាអត្ថប្រយោជន៍ដែលពួកគេចង់បាន។
អ្នកស្រី Le Van Hanh ជាអ្នកផ្តល់ការណែនាំដល់ក្រុមហ៊ុនដែលយកចិត្តទុកដាក់នឹងផ្សារក្នុងប្រទេសវៀតណាមតាមរយៈការងាររបស់អ្នកស្រីជាមួយការិយាល័យនៅក្នុងប្រទេសវៀតណាមនៃសភាពាណិជ្ជកម្មអាល្លឺម៉ង់នៅក្រៅប្រទេសហៅ AHK។ អ្នកស្រីបាននិយាយថា កិច្ចព្រមព្រៀងពាណិជ្ជកម្មនេះនឹងលុបចោលតារាងពន្ធគយ៧០%រវាងភាគីទាំងពីរជាបន្ទាន់ហើយនឹងបន្ថយតារាងពន្ធគយ៩៩%ក្នុងពេល១០ឆ្នាំទៀត។
អ្នកស្រី Le Van Hanh បាននិយាយក្នុងកម្មវិធី podcast របស់ AHK ថា«ការណ៍នេះអស្ចារ្យណាស់ មែនទេ? ហើយថែមពីលើនេះទៀតក៏នឹងមានការប្តេជ្ញាដែរអំពីសេវា ការផ្គត់ផ្គង់សាធារណៈ របាំងមិនមែនតារាងពន្ធគយ ពន្ធលើទំនិញដឹកចេញទៅលក់ឯប្រទេសក្រៅនិងកញ្ចប់នៃនិយតកម្មល្អផងដែរ»។
អ្នកស្រីបានពណ៌នាអំពីក្រុមហ៊ុនអាល្លឺម៉ង់ពីរដែលអ្នកស្រីបានជួយលើកពីប្រទេសចិនទៅកាន់ប្រទេសវៀតណាមដោយមានរួមបញ្ចូលក្រុមហ៊ុនផលិតវាយនភណ្ឌមួយដែលរងផលប៉ះពាល់ដោយសារតារាងពន្ធគយថ្មីរបស់ស.រ.អា.ចំនួន២៥%។ អ្នកស្រី Le Van Hanh បាននិយាយថាការលើកក្រុមហ៊ុនទៅវៀតណាមមានប្រយោជន៍មិនមែនដោយសារតែតារាងពន្ធគយប៉ុណ្ណោះទេក៏ប៉ុន្តែពីព្រោះអ្នកផ្គត់ផ្គង់សម្ភារៈសម្រាប់ការផលិតទំនិញក៏លើកក្រុមហ៊ុនពួកគេទៅវៀតណាមដែរ។
លោក Bjorn Koslowski ដែលជាសហសេវិករបស់អ្នកស្រី Le Van Hanh បាននិយាយថាជាការងាយស្រួលសម្រាប់ក្រុមហ៊ុនអឺរ៉ុបលើកពីប្រទេសចិនទៅប្រទេសវៀតណាមពីព្រោះប្រទេសជាតិទាំងពីរនេះមានលក្ខណៈមួយចំនួនដូចគ្នា ដូចជាទស្សនៈវិជ្ជាខុងជឺ មានជំនឿលើការឧស្សាហ៍ធ្វើការងារ ការប្រឹងប្រែងក្នុងការរកស៊ី និងការខិតខំប្រឹងប្រែងរៀនសូត្រ។
លោក Bjorn Koslowski បាននិយាយថា៖ «ក្រុមហ៊ុនជាច្រើនដែលបណ្តាក់ទុននៅទីនេះឬរកស៊ីក្នុងប្រទេសវៀតណាម មានការទុកចិត្តលើគុណភាពនៃធនធានមនុស្សរបស់ប្រទេសនេះ។ វៀតណាមស្រដៀងគ្នាច្រើនជាមួយប្រទេសចិនខាងវប្បធម៌ហើយក្រុមហ៊ុនជាច្រើនបានធ្លាប់ធ្វើការជាមួយប្រទេសចិនរួចស្រេចហើយ។
បើតាមទិន្នន័យប្រមូលដោយក្រុមហ៊ុនស្រាវជ្រាវ Rhodium Group បញ្ជាក់ថា វិនិយោគដោយផ្ទាល់របស់អឺរ៉ុបក្នុងប្រទេសចិនបានឡើងដល់កម្រិតខ្ពស់បំផុតកាលពីឆ្នាំ២០១២ ហើយបានចុះថយចាប់តាំងពីពេលនោះមក។ ចំណែកឯការបណ្តាក់ទុនក្នុងប្រទេសវៀតណាមវិញបានកើនឡើងតទៅទៀត។ ជាឧទាហរណ៍ ការបណ្តាក់ទុនដោយផ្ទាល់ពីអឺរ៉ុបបានកើនឡើង២៧%ពីឆ្នាំ២០១៨ដល់ឆ្នាំ២០១៩ នេះបើតាមការប្រាប់ឱ្យដឹងដោយក្រសួងផែនការនិងវិនិយោគនៃប្រទេសវៀតណាម។
មនុស្សខ្លះក្នុងប្រទេសចិនបានបដិសេធការទស្សន៍ទាយថា ចិននឹងមានការខាតបង់ដោយសារកិច្ចព្រមព្រៀងពាណិជ្ជកម្មរបស់ប្រទេសវៀតណាមជាមួយសហភាពអឺរ៉ុប។ លោក Xu Liping ជានាយកមជ្ឈមណ្ឌលខាងការសិក្សាអំពីអាស៊ីអគ្នេយ៍នៃបណ្ឌិតសភាវិទ្យាសាស្ត្រសង្គមនៃប្រទេសចិន។ លោកបាននិយាយថាប្រទេសវៀតណាមមិនមានទំហំធំគ្រប់គ្រាន់ដើម្បីយកឈ្នះប្រទេសចិនទេ ហើយកិច្ចព្រមព្រៀងពាណិជ្ជកម្មនេះមិនគ្រប់គ្រាន់ល្មមសម្រាប់ឱ្យក្រុមហ៊ុននៃសហភាពអឺរ៉ុប«កាត់ផ្តាច់ការទាក់ទង»ពីប្រទេសចិនបានទេ។
លោក Xu បានសរសេរក្នុងកាសែត Global times ដែលជាសារព័ត៌មាននៃគណបក្សកុម្មុយនិស្តចិនថា «ទាំងទ្រឹស្តីអំពី ការតាមទាន់ ទាំងទ្រឹស្តីអំពី ការកាត់ផ្តាច់ការទាក់ទង បានកើនឡើងច្រើនកាលពីប៉ុន្មានឆ្នាំថ្មីៗនេះ ដោយប្រទេសចិនមានទាក់ទិនដោយមិនសកម្ម»។ ក៏ប៉ុន្តែលោកបានហៅទ្រឹស្តីទាំងពីរនេះថាជា «ការប៉ងប្រាថ្នាដោយស្រមើស្រមៃ»៕
ប្រែសម្រួលដោយ លោក ឈឹម សុមេធ