ក្រុមអ្នកជំនាញសុខភាពសកលថ្លែងនៅក្នុងកិច្ចពិភាក្សា Town Hall អនឡាញមួយ ដែលរៀបចំដោយសំឡេងសហរដ្ឋអាមេរិក VOA បានពិភាក្សាអំពីដំណើរការសាកល្បងរកវ៉ាក់សាំង និងផលប៉ះពាល់ដល់សង្គមរយៈពេលយូរ ដែលបណ្ដាលមកពីជំងឺកូវីដ១៩។
ជាមួយការធ្វើតេស្តវ៉ាក់សាំងជាច្រើនកំពុងត្រូវបានគេធ្វើឡើងទូទាំងពិភពលោកដើម្បីប្រយុទ្ធប្រឆាំងនឹងជំងឺកូវីដ១៩ អ្នកជំនាញផ្នែកសុខាភិបាលសកលបានថ្លែងនៅក្នុងកិច្ចពិភាក្សា Town Hall អនឡាញមួយដែលរៀបចំដោយ VOA ថា ពួកគេមានសង្ឃឹម [លើការរកវ៉ាក់សាំង]។
លោកវេជ្ជបណ្ឌិត Boris Lushniak សាស្ត្រាចារ្យនៃសាលាសុខភាពសាធារណៈ នៃសាកលវិទ្យាល័យ University of Maryland ដែលស្ថិតនៅជាយរដ្ឋធានីវ៉ាស៊ីនតោន បាននិយាយថា៖ «យើងមិនដែលជជែកអំពីការជឿនលឿននៃវិទ្យាសាស្ត្រដែលផ្សាភ្ជាប់ទៅនឹងជំងឺរាតត្បាតជាសកលថ្មីនោះទេ។ ដូច្នេះខ្ញុំនៅតែមានសុទិដ្ឋិនិយមថា មានអ្វីមួយដែលនឹងត្រូវរកឃើញមិនខាន»។
អ្នកវិទ្យាសាស្ត្រនៅសាកលវិទ្យាល័យ Oxford University កំពុងមានសក្ដានុពលឈានទៅរកភាពជោគជ័យមួយ។ ក្រុមអ្នកវិទ្យាសាស្ត្រនេះឈានមុខគេក្នុងការស្វែងរកវ៉ាក់សាំង តាមរយៈការប្រើប្រាស់វិធីចាក់វ៉ាក់សាំង ដែលបានប្រើក្នុងការសាកល្បងមុនៗ និងដែលបានបង្ហាញថាគ្មានគ្រោះថ្នាក់ដល់មនុស្សឡើយ។ ការសាកល្បងវ៉ាក់សាំងជាមួយមនុស្សកំពុងត្រូវបានអនុវត្តក្នុងពេលនេះ។
លោក Lushniak បានថ្លែងថា៖ «ការតេស្តវ៉ាក់សាំងនេះតម្រូវឲ្យយើងធ្វើឡើងដោយប្រុងប្រយ័ត្ន ដើម្បីកុំឲ្យមានគ្រោះថ្នាក់ដល់សង្គមជាតិរបស់យើង។ ប៉ុន្តែព័ត៌មានចុងក្រោយពីសាកលវិទ្យាល័យ Oxford University ពិតជាផ្ដល់ក្ដីសង្ឃឹមណាស់។ ក្ដីសង្ឃឹមនោះគឺថា យើងនឹងទទួលបានអ្វីដែលត្រឹមត្រូវតាមបទដ្ឋាននៃការព្យាបាល ថ្នាំ និងអ្វីៗផ្សេងទៀតដែលមានសក្ដានុពល»។
សម្រាប់សង្គម ការផ្លាស់ប្ដូរនានាដែលយើងអាចរំពឹងទុកក្នុងពេលអនាគត អាចរាប់ចាប់ពីការចេញទៅញ៉ាំអាហារខាងក្រៅ រហូតទៅដល់ការធ្វើដំណើរក្រៅប្រទេស។
លោកវេជ្ជបណ្ឌិត Chang-Chuan Chan នៃសាលាសុខភាពសាធារណៈនៃសាកលវិទ្យាល័យ Taiwan University College បាននិយាយថា៖ «អ្នកអាចសម្រេចចិត្តថ្ងៃនេះ ហើយទិញសំបុត្រធ្វើដំណើរទៅកន្លែងណាមួយ។ ខ្ញុំគិតថា វាប្រហែលជាមិនអាចអញ្ចឹងទៀតទេ។ ដូច្នេះការធ្វើដំណើរដែលមានគ្រោងទុកច្រើនជាងមុន នឹងក្លាយទៅជាប្រភេទនៃការធ្វើដំណើរនៅថ្ងៃអនាគត ហើយក៏នឹងមានការរឹតបន្តឹង និងបទបញ្ញត្តិនានា ដែលយើងត្រូវតែធ្វើតាម និងដែលត្រូវបានអនុវត្តដោយប្រទេសដែលមានអ្នកធ្វើដំណើរចូលមកច្រើនដែរ»។
អ្នកស្រីវេជ្ជបណ្ឌិត Priteema Chanana នៃវិទ្យាស្ថានស្រាវជ្រាវ Fortis Memorial Research Institute បាននិយាយថា៖ «នៅពេលដែលយើងបើក [ក្រុង] ឡើងវិញ ពិភពលោកនឹងខុសពីមុនឆ្ងាយសម្រាប់អ្នកគ្រប់គ្នា ពីព្រោះយើងត្រូវបន្តអនុវត្តការរក្សាគម្លាតពីគ្នា រហូតដល់ពេលយើងមានវ៉ាក់សាំងនៅក្នុងដៃ ពីព្រោះថាមានតែវ៉ាក់សាំងមួយគត់ដែលអាចការពារយើងពីជំងឺនេះបាន។ បើសិនជាចំនួនប្រជាជនចន្លោះពី ៦០ ទៅ ៧០ ភាគរយមិនទាន់ទទួលបានវ៉ាក់សាំងដែលមានប្រសិទ្ធភាពទេ យើងទាំងអស់គ្នាកំពុងស្ថិតនៅក្នុងគ្រោះថ្នាក់»។
របៀបដែលយើងធ្វើការ ក៏នឹងត្រូវបានផ្លាស់ប្ដូរ ដោយសារតែរោគរាតត្បាតនេះដែរ។
អ្នកស្រី Kate Liz Stern នាយកក្រុមហ៊ុន Global Workplace Analytics បានលើកឡើងថា៖ «យើងនឹងឃើញមានប្រជាជនជាច្រើនទៀតមិនមកធ្វើការនៅការិយាល័យដោយផ្ទាល់ទៀតទេ។ យើងបានធ្វើការស្ទង់មតិមួយចំនួនទៅលើរឿងនេះ។ ឥឡូវនេះ មានមនុស្សជាច្រើន ប្រមាណ ៨០ ភាគរយ ធ្វើការងារពីផ្ទះ បើប្រៀបធៀបនឹងកាលពីពេលមុនមានរោគរាតត្បាត គឺមានត្រឹមតែ ១០ ភាគរយប៉ុណ្ណោះ។ ហើយអ្វីដែលគួរឲ្យចាប់អារម្មណ៍គឺថា ពួកគេចង់បន្តធ្វើការពីផ្ទះតទៅទៀត។
អ្នកវិទ្យាសាស្ត្រនៃសាកលវិទ្យាល័យ Oxford University បាននិយាយថា វ៉ាក់សាំងបង្ការវីរុសកូរ៉ូណាប្រភេទថ្មីរបស់ពួកគេអាចរួចរាល់លឿនបំផុតនៅក្នុងខែកញ្ញា ខណៈពេលដែលមន្ទីរពិសោធន៍ដទៃទៀតកំពុងតែរួសរាន់សាកល្បងវ៉ាក់សាំងរបស់ពួកគេ។ នេះគឺជាព័ត៌មានល្អមួយសម្រាប់មនុស្សរាប់លាននាក់នៅទូទាំងពិភពលោក ដែលកំពុងត្រៀមខ្លួនរស់នៅជីវិតធម្មតាឡើងវិញ ក្រោយមានវិបត្តិកូវីដ១៩៕