កម្មវិធីស្បៀងអាហារពិភពលោករបស់អង្គការសហប្រជាជាតិ នឹងចាប់ផ្តើមចែកស្បៀងអាហាររួមមានអង្ករ និងប្រេងឆាជាដើម ឲ្យពលរដ្ឋក្រីក្រ និងងាយរងគ្រោះ ប្រមាណជាង៨ម៉ឺន ២ពាន់គ្រួសារ ដែលរងផលប៉ះពាល់ធ្ងន់ធ្ងរដោយសារការរីករាលដាលនៃជំងឺកូវីដ១៩។
សេចក្តីប្រកាសព័ត៌មានរបស់អង្គការនេះបានបញ្ជាក់ថា ការចែកស្បៀងទាំងនេះនឹងធ្វើឡើងចាប់ពីថ្ងៃទី៣០ ខែមិថុនា រហូតដល់ថ្ងៃទី៣ ខែកក្កដាខាងមុខនេះ នៅខេត្តសៀមរាប ពោធិ៍សាត់ កំពង់ធំ កំពង់ឆ្នាំង និងឧត្តរមានជ័យ។
ការប្រកាសចែកស្បៀងនេះកើតឡើង ខណៈរដ្ឋាភិបាលកម្ពុជា បានប្រកាសចាប់ផ្តើមកម្មវិធីជំនួយសង្គមដោយផ្តល់សាច់ប្រាក់ដល់ពលរដ្ឋក្រីក្រជាង៥៦ម៉ឺនគ្រួសារ នៅទូទាំងប្រទេស។
កម្មវិធីស្បៀងអាហារពិភពលោកបានលើកឡើងថា ចាប់តាំងពីរដ្ឋាភិបាលប្រកាសបិទសាលារៀនតាំងពីពាក់កណ្តាលខែមីនាមកនោះ កូនសិស្សក្រីក្ររាប់សែននាក់លែងទទួលបានការឧបត្ថម្ភអាហារនៅសាលារៀន ដូចដែលពួកគេធ្លាប់ទទួលបាន។ ការណ៍នេះ បានបន្ថែមបន្ទុកដល់ជីវភាពគ្រួសាររបស់ពួកគេ ដែលរងផលប៉ះពាល់រួចទៅហើយដោយសារការបាត់បង់ ឬ ការព្យួរការងារក្នុងគ្រាមានវិបត្តិកូវីដ១៩នេះ។
គិតត្រឹមថ្ងៃទី២៥ ខែមិថុនានេះ វីរុសកូរ៉ូណាដែលបង្កជាជំងឺកូវីដ១៩ បានឆ្លងទៅមនុស្សជិត១០លាននាក់ និងបានសម្លាប់មនុស្សអស់ជាង៤សែននាក់ហើយ នៅទូទាំងសកលលោក។ នេះបើយោងតាមទិន្នន័យរបស់អង្គការសុខភាពពិភពលោក៕