រហូតមកដល់ពេលនេះ មានរយៈពេលជាងមួយឆ្នាំហើយ ដែលមន្ត្រីការពារសិទ្ធិមនុស្សអាដហុក៤នាក់ព្រមទាំងមន្ត្រីគ.ជ.បម្នាក់ទៀត ត្រូវបានតុលាការបង្គាប់ឲ្យឃុំខ្លួនបណ្ដោះអាសន្នរង់ចាំការជំនុំជម្រះក្តី។ ប៉ុន្តែមេធាវីការពារក្ដីអ្នកទាំងបួននេះ និយាយថា ល្មមដល់ពេលតុលាការបញ្ចប់សំណុំរឿងក្តីនេះហើយ ព្រោះការសម្រេចបន្តឃុំខ្លួនពួកគេបន្ថែមទៀតនេះ បានប៉ះពាល់ធ្ងន់ធ្ងរដល់សិទ្ធិរបស់អ្នកជាប់ឃុំទាំងនោះ។
សាលាឧទ្ធរណ៍នៅព្រឹកថ្ងៃពុធនេះ បានតម្កល់ការសម្រេចរបស់ សាលាដំបូងរាជធានីភ្នំពេញដែលបានបន្តឃុំខ្លួនក្រុមមន្ត្រីសិទ្ធិមនុស្សចំនួនបួនរូបរបស់សមាគមការពារសិទ្ធិមនុស្សអាដហុក រយៈពេល៦ខែបន្ថែមទៀត។ នេះបើតាមការបញ្ជាក់របស់មេធាវីការពារក្ដីឱ្យអ្នកជាប់ឃុំទាំង៤រូប និងអ្នកនាំពាក្យសាលាឧទ្ធរណ៍។
លោក ឡោ ជុនធី មេធាវីការពារក្ដីឲ្យមន្ត្រីអាដហុកទាំងនោះ ថ្លែងប្រាប់ក្រុមអ្នកសារព័ត៌មាន នៅក្រៅសាលាឧទ្ធរណ៍ ក្រោយសវនាការជាងពីរម៉ោងថា ចៅក្រមបន្តរក្សាការសម្រេចរបស់សាលាដំបូងរាជធានីភ្នំពេញដដែល ដោយសំអាងហេតុថា ការស៊ើបសួរនៅសាលាដំបូងមិនទាន់ត្រូវបានបញ្ចប់។
លោក ឡោ ជុនធី មេធាវីការពារក្តីឲ្យមន្ត្រីសិទ្ធិមនុស្សអាដហុក ថ្លែងទៅកាន់ក្រុមអ្នកសារព័ត៌មានក្រោយ សវនាការនៅសាលាឧទ្ធរណ៍នៅរាជធានីភ្នំពេញ នៅថ្ងៃទី២៤ ខែឧសភា ឆ្នាំ២០១៧។ (ខាន់ សុគុំមនោ/VOA)
លោកមេធាវីបន្ថែមថា តុលាការគួរបញ្ចប់សំណុំរឿងក្តីនេះឲ្យបានឆាប់ ហើយចេញដីកាដំណោះស្រាយ ព្រោះការឃុំខ្លួននេះ បានអូសបន្លាយពេលមួយឆ្នាំមកហើយ។
«អញ្ចឹងហើយ បានយើងយល់ឃើញថា គួរតែវាចូលទៅដល់ដំណាក់កាល អាចថា បិទសំណុំរឿងដែលចេញជាលទ្ធផល។ ជាលក្ខណៈផ្លូវច្បាប់ គឺចេញដីកាដំណោះស្រាយ ហើយក្នុងដីកាដំណោះស្រាយហ្នឹងវាអាចថា តើកូនក្តីរបស់យើងត្រូវបានដោះលែង ឬមួយត្រូវការបញ្ជូនទៅជំនុំជម្រះ វាត្រូវតែចេញអាហ្នុងបាទ»។
លោក ឡោ ជុនធី ថ្លែងថា លោកនឹងពិភាក្សាជាមួយក្ដីលោក ថា តើត្រូវដាក់បណ្ដឹងសារទុក្ខទៅតុលាការកំពូលទៀតឬយ៉ាងណា។ លោកថា លោកមានការខកចិត្តចំពោះការសម្រេចរបស់សាលាឧទ្ធរណ៍សម្រាប់ការបន្តឃុំខ្លួនកូនក្ដីលោក។
កាលពីចុងខែមេសាកន្លងទៅ ចៅក្រមស៊ើបសួរសាលាដំបូងលោក ធាម ច័ន្ទពិសិដ្ឋ បានសម្រេចបន្តឃុំខ្លួន អ្នកការពារសិទ្ធិមនុស្ស៤រូបរបស់សមាគមការពារសិទ្ធិមនុស្សអាដហុក និង មន្ត្រីគ.ជ.ប. មួយរូប ចំនួន៦ខែបន្ថែមទៀតជាលើកទី២ ក្រោយពីការឃុំខ្លួនអ្នកទាំងប្រាំនាក់អស់រយៈពេល១ឆ្នាំ រួចហើយនោះ។
ក្រុមមន្ត្រីសិទ្ធិមនុស្សជាប់ឃុំបួនរូបរួមមាន អ្នកស្រី លឹម មុនី លោក យី សុខសាន លោក ណៃ វ៉ង់ដា និងលោក នី សុខា។ អ្នកទាំងបួន ត្រូវបានចោទប្រកាន់ពីបទសូកប៉ាន់សាក្សី ប៉ុន្តែពួកគេបានតវ៉ាជំទាស់នឹងការបន្តឃុំខ្លួនពួកគេនេះ។
ចំណែកឯអគ្គលេខាធិការរងនៃគណៈកម្មាធិការជាតិរៀបចំការបោះឆ្នោត លោក នី ចរិយា ក៏ត្រូវបានចោទប្រកាន់ក្នុងករណីស្រដៀងគ្នានេះដែរ។ ប៉ុន្តែលោក នី ចរិយា មិនបានប្ដឹងជំទាស់ដូចអ្នកការពារសិទ្ធិមនុស្សទាំងបួននាក់នេះទេ។
លោក សំ ចន្ទគា អ្នកនាំពាក្យសមាគមការពារសិទ្ធិមនុស្សអាដហុក ថ្លែងប្រាប់ VOA នៅរសៀលថ្ងៃពុធនេះថា ការតស៊ូខាងច្បាប់ដើម្បីទាមទារយុត្តិធម៌ដល់ក្រុមមន្ត្រីសិទ្ធិមនុស្សទាំងបួននាក់នោះ ត្រូវបានធ្វើឡើងអស់លទ្ធភាពហើយ។
លោកបន្ថែមថា មានតែរង់ចាំមើលការផ្លាស់ប្តូរនៃរបត់នយោបាយប៉ុណ្ណោះសម្រាប់ការដោះលែងអ្នកទាំងបួននាក់ ព្រោះតុលាការមិនបានប្រើឆន្ទានុសិទ្ធិរបស់ខ្លួនក្នុងការកាត់ក្ដី។
«យើងតតាំងអស់ហើយ អស់លទ្ធភាពហើយ។ យើងមានតែរង់ចាំ តាមរបត់នយោបាយ និងអារម្មណ៍របស់អ្នកនយោបាយទេ។ បើអារម្មណ៍របស់គាត់ គាត់សប្បាយថ្ងៃណាមួយ គាត់នឹងធ្វើការដោះលែងហើយ»។
លោក ទូច ថារិទ្ធ អ្នកនាំពាក្យសាលាឧទ្ធរណ៍ ប្រាប់ VOA នៅរសៀលថ្ងៃពុធនេះថា ប្រធានសភាស៊ើបសួរ លោក ងួន រតនា សម្រេចតម្កល់ការបន្តឃុំខ្លួនក្រុមមន្ត្រីសិទ្ធិមនុស្សទាំងបួននាក់នោះ ដោយផ្អែកលើភស្តុតាង និងនីតិវិធីច្បាប់ ដោយលោកអះអាងថា ការសម្រេចនេះ មិនបានរងសំពាធពីភាគីណានោះឡើយ។
«គេបានធ្វើការស៊ើបអង្កេតមកឃើញមានភស្តុតាងគ្រប់គ្រាន់។ អញ្ចឹងវាអាចមានពិរុទ្ធភាពទៅតាមផ្លូវច្បាប់ហើយ អញ្ចឹងបានសាលាឧទ្ធរណ៍គេតម្កល់សាលក្រមរបស់តុលាការក្រុងភ្នំពេញនេះ ទុកជាបានការដដែល»។
អង្គការសង្គមស៊ីវិលជាតិ និងអន្តរជាតិជាច្រើន បានរិះគន់ជាញឹកញាប់ចំពោះការឃុំខ្លួនអ្នកការពារសិទ្ធិមនុស្សនេះ និងបានលើកឡើងថា ការបន្តឃុំខ្លួនរយៈពេល៦ខែទៀតនេះ បានធ្វើឲ្យប៉ះពាល់ដល់សិទ្ធិរបស់អ្នកជាប់ឃុំទាំងនោះ៕