រដ្ឋាភិបាលកម្ពុជា នៅថ្ងៃអង្គារនេះបានទទួលវ៉ាក់សាំងបង្ការជំងឺកូវីដ១៩ចំនួន១លានដូសបន្ថែមទៀតពីប្រទេសចិន ដែលជាការបញ្ជាទិញនិងជាជំនួយឥតសំណង។ ការបញ្ជូនវ៉ាក់សាំងពីប្រទេសចិនមានជាបន្តបន្ទាប់ ខណៈកម្ពុជាកំពុងសម្រុកចាក់វ៉ាក់សាំងបង្ការដល់ប្រជាពលរដ្ឋរបស់ខ្លួន ដែលរំពឹងថា នឹងចាក់បាន១០លាននាក់នៅត្រឹមដើមឆ្នាំ២០២២។
នៅក្នុងពិធីទទួលវ៉ាក់សាំង១លានដូសនៅអាកាសយានដ្ឋានអន្តរជាតិភ្នំពេញ លោកស្រី យក់ សម្បត្តិ អ្នកនាំពាក្យក្រសួងសុខាភិបាល បានឲ្យដឹងថានៅក្នុងចំណោមវ៉ាក់សាំងបញ្ជូនមកខាងលើនេះ មានវ៉ាក់សាំងស៊ីណូវ៉ាក់ចំនួន៥០ម៉ឺនដូសនេះ ដែលរដ្ឋាភិបាលកម្ពុជាបញ្ជាទិញពីក្រុមហ៊ុនចិន និងវ៉ាក់សាំងស៊ីណូហ្វាមចំនួន៥០ម៉ឺនដូស ក្រោមជំនួយឧបត្ថម្ភរបស់រដ្ឋាភិបាលចិន។
លោកស្រីបន្ថែមថារដ្ឋាភិបាលកម្ពុជាបានបញ្ជាទិញវ៉ាក់សាំងស៊ីណូវ៉ាក់ចំនួន៤លានដូស និងវ៉ាក់សាំងស៊ីណូហ្វាមចំនួន៤លានដូសពីប្រទេសចិន។ ក្រោមការបញ្ជាទិញនេះ វ៉ាក់សាំងចំនួន១លានដូសត្រូវបានបញ្ជូនដល់កម្ពុជានាថ្ងៃអង្គារនេះ។
អ្នកនាំពាក្យក្រសួងសុខាភិបាលរូបនេះបានថ្លែងថា វ៉ាក់សាំងទទួលបាននៅថ្ងៃនេះ និងវ៉ាក់សាំងដែលត្រៀមទទួលនាពេលខាងមុខ នឹងត្រូវចាក់ជូនពលរដ្ឋនៅរាជធានីភ្នំពេញ ដែលរដ្ឋាភិបាលគ្រោងនឹងចាក់ដល់ពលរដ្ឋទាំងអស់នៅក្នុងខែមិថុនា មុនពេលបន្តចាក់ដល់ប្រជាពលរដ្ឋនៅតាមបណ្តាខេត្តផ្សេងទៀត។
លោកស្រី យក់ សម្បត្តិ បន្តថានាពេលបច្ចុប្បន្ន ក្រៅពីវ៉ាក់សាំងពីប្រទេសចិន កម្ពុជានៅរង់ចាំការបញ្ជាក់អំពីការផ្តល់វ៉ាក់សាំងពីសំណាក់អង្គការសុខភាពពិភពលោក ក្រោមយន្តការកូវ៉ាក់ ក៏ដូចជាប្រទេសជាដៃគូផ្សេងទៀតផងដែរ។
លោកស្រីថ្លែងថា៖ «យើងមិនទាន់មានការបញ្ជាក់ពីអង្គការដៃគូផ្សេងៗទេ។ ហើយចំពោះកូវ៉ាក់ដែលជាដៃគូរបស់យើង និងចំនួនហ្នឹង ក៏យើងមិនទាន់មានការបញ្ជាក់ផងដែរ។ ដូច្នេះយើងកំពុងរង់ចាំការបញ្ជាក់ពីខាងកូវ៉ាក់ក៏ដូចជា ខាងប្រទេសអូស្រ្តាលី និងក៏ដូចជាខាងសហរដ្ឋអាមេរិកដែរ»។
គិតមកដល់ថ្ងៃអង្គារ កម្ពុជាទទួលបានវ៉ាក់សាំងស៊ីណូហ្វាមជាជំនួយរបស់រដ្ឋាភិបាលចិនសរុប២,២លានដូស វ៉ាក់សាំងអាស្រ្តាហ្សេនីការបស់យន្តការកូវ៉ាក់នៃអង្គការសុខភាពពិភពលោក ចំនួន៣២៤.០០០ដូស និងវ៉ាក់សាំងស៊ីណូវ៉ាក់ទិញពីក្រុមហ៊ុនចិនចំនួន៤លានដូស។
លោក យង់ គិមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍និងសន្តិភាព បានថ្លែងប្រាប់ VOAនៅថ្ងៃអង្គារនេះថាលោកសង្កេតឃើញប្រជាពលរដ្ឋកាន់តែច្រើនទៅចាក់វ៉ាក់សាំង ដោយសារពួកគេមានការបារម្ភអំពីសុខភាព និងខណៈការឆ្លងជំងឺនេះកំពុងរាលដាលខ្លាំងនៅកម្ពុជា។
យ៉ាងណាក្តី លោកថាអត្រានៃការចាក់វ៉ាក់សាំងនាពេលបច្ចុប្បន្ន មិនទាន់សមាមាត្រនឹងអត្រានៃការឆ្លង ដើម្បីអាចទប់ទល់នឹងការបន្តរាតត្បាតនៃជំងឺកូវីដ១៩ ឲ្យបានពេញលេញនោះទេ។
លោកថ្លែងថា៖ «វ៉ាក់សាំងដែលយើងចាក់រហូតមកដល់ពេលនេះ មិនទាន់សមាមាត្រនោះទេ។ លុះត្រាណាតែយើងចាក់៤-៥លាននាក់អីឡើងទៅ អាហ្នឹងបានអាចថាវាអាចកាត់បន្ថយបាន អាចនឹងទប់ទល់បានច្រើន។ ហើយម្យ៉ាងវិញទៀត ដែលយើងឃើញចាក់បានច្រើនជាងគេ គឺនៅតែរាជធានីភ្នំពេញ។ ហើយនៅតាមបណ្តាខេត្ត មិនទាន់បានចាក់ ហើយនៅរាជធានីភ្នំពេញក៏ចាក់មិនទាន់អស់ទៅទៀត»។
លោកបន្ថែមថា ការចាក់វ៉ាក់សាំងជូនប្រជាពលរដ្ឋដែលមានកម្រិតនាពេលបច្ចុប្បន្ននេះ មិនទាន់អាចធ្វើឲ្យកម្ពុជាអាចគ្រប់គ្រងស្ថានភាពការឆ្លងជំងឺកូវីដ១៩បានគ្រប់គ្រាន់នៅឡើយទេ លុះត្រាកម្ពុជាបន្តការចាក់វ៉ាក់សាំងឲ្យបានយ៉ាងហោចណាស់៤០%នៃចំនួនប្រជាពលរដ្ឋសរុប។
លោក យង់ គិមអេង ក៏បានជំរុញឲ្យពន្លឿនការចាក់វ៉ាក់សាំងទៅដល់ប្រជាពលរដ្ឋដែលមានកម្រិតជីវភាពទាបនិងក្រុមប្រជាពលរដ្ឋងាយប្រឈមនឹងការឆ្លង ជាពិសេសនៅតាមបណ្តាខេត្តដែលមានការករណីឆ្លងខ្លាំង។ លោកបន្ថែមថាការចាក់វ៉ាក់សាំងត្រូវឈរលើមូលដ្ឋានស្មើភាព និងដោយមិនមានការរើសអើងនិន្នាការនយោបាយជាដើម។
គិតត្រឹមថ្ងៃទី៧ ខែមិថុនានេះ ចំនួនអ្នកចាក់វ៉ាក់សាំងបង្ការជំងឺកូវីដ១៩យ៉ាងតិចមួយដូស មានចំនួនជាង២លាន៨សែននាក់ ឬ២៧,៦៦%នៃការគោលដៅចាក់វ៉ាក់សាំង១០លាននាក់។ នេះបើយោងតាមទិន្នន័យរបស់អនុគណៈកម្មការតាមដាននិងវាយតម្លៃនៃគណៈកម្មការចំពោះកិច្ចចាក់វ៉ាក់សាំងកូវីដ១៩។
លោកនាយករដ្ឋមន្រ្តី ហ៊ុន សែន ធ្លាប់បានលើកឡើងថាកម្ពុជាគ្រោងនឹងចាក់វ៉ាក់សាំងដល់ពលរដ្ឋចំនួន១០លាននាក់ យ៉ាងយូរបំផុតនៅត្រឹមដើមឆ្នាំ២០២២៕