បណ្តាញសារព័ត៌មាន ABS-CBN បានសរសេរនៅលើគេហទំព័រព័ត៌មានរបស់ខ្លួនថា គណៈកម្មការទូរគមនាគមន៍ជាតិនៃប្រទេសហ្វីលីពីនកាលពីថ្ងៃទី ៥ ខែឧសភា បានបញ្ជាឱ្យបណ្តាញនេះបញ្ឈប់ប្រតិបត្តិការស្ថានីយទូរទស្សន៍ និងវិទ្យុនៅក្នុងរដ្ឋធានីម៉ានីល។ បណ្តាញនេះបន្តថា គណៈកម្មការខាងលើក៏បានបញ្ជាបន្ថែមមិនឱ្យមានការចាក់ផ្សាយនៅក្នុងស្ថានីយថ្នាក់តំបន់ចំនួន ៤ ផងដែរ។
កិច្ចព្រមព្រៀងទិញសិទ្ធិអាជីវកម្មបន្តរបស់បណ្តាញសារព័ត៌មាន ABS-CBN បានផុតកំណត់នៅថ្ងៃទី ៤ ខែឧសភា ក្នុងអំឡុងពេលបិទប្រទេសដ៏យូរដោយសារតែការផ្ទុះឆ្លងរាលដាលនូវជំងឺកូវីដ១៩ ទោះបីជាបណ្តាញនេះប្រឹងប្រែងស្វែងរកការយល់ព្រមពីសភាដើម្បីបន្តកិច្ចព្រមព្រៀងនេះក៏ដោយ។
បណ្តាញសារព័ត៌មាន ABS-CBN បានរាយការណ៍នៅលើគេហទំព័រព័ត៌មានរបស់ខ្លួនថា រដ្ឋាភិបាលរបស់លោកប្រធានាធិបតី Rodrigo Duterte មិនយល់ព្រមនឹងលក្ខខណ្ឌនៃការបន្តកិច្ចព្រមព្រៀងនោះ។ លោក Duterte យល់ថា បណ្តាញសារព័ត៌មាននេះបាន «បោកប្រាស់» លោក ទាក់ទិននឹងអ្វីដែលលោកពណ៌នាថា បណ្ដាញនេះមិនបានចាក់ផ្សាយការឃោសនាសម្រាប់យុទ្ធនាការបោះឆ្នោតថ្នាក់ជាតិរបស់លោកកាលពីឆ្នាំ ២០១៦។
សកម្មជនម្នាក់លើកពាក្យស្លោកនៅខាងក្រៅទីស្នាក់ការនៃបណ្តាញផ្សព្វផ្សាយ ABS-CBN កាលពីថ្ងៃទី៥ ខែឧសភា ក្នុងក្រុង Quezon ប្រទេសហ្វីលីពីន។
លោក Herbie Gomez អ្នកគ្រប់គ្រងគេហទំព័រព័ត៌មាន Gold Star Daily នៅក្នុងទីក្រុង Cagayan de Oro ប្រទេសហ្វីលីពីន និយាយថា៖ «ខ្ញុំគិតថា វាជារឿងអាក្រក់។។ បណ្តាញសារព័ត៌មាននោះជាបណ្តាញទូរទស្សន៍ធំបំផុតមួយនៅក្នុងប្រទេស។ ការបិទបណ្តាញនេះបានធ្វើឱ្យគេស្រឡាំងកាំង។ មានបណ្តាញសារព័ត៌មានជាច្រើនទៀត ប៉ុន្តែបណ្តាញ ABS-CBN មានលក្ខណៈខុសប្លែកពីគេ។ ខ្ញុំគិតថា អ្វីដែលបានកើតឡើងគឺថា ការរាយការណ៍របស់បណ្តាញនេះបានធ្វើឱ្យលោកប្រធានាធិបតីខឹងសម្បារ»។
ជាឧទាហរណ៍ របាយការណ៍មួយនៅលើគេហទំព័រនៃបណ្តាញនេះ បានរាយការណ៍ថា ប្រទេសហ្វីលីពីន «ជាប់ចំណាត់ថ្នាក់ទាបក្នុងការប្រយុទ្ធប្រឆាំងនឹងជំងឺកូវីដ១៩» ដោយមានអត្រាអ្នកស្លាប់ខ្ពស់មិនធម្មតា។
ពលរដ្ឋហ្វីលីពីនចាត់ទុកបណ្តាញនេះថាជាប្រភពនៃសារព័ត៌មានឯករាជ្យ ជាជាងការរៀបរាប់ឡើងវិញនៃសេចក្តីថ្លែងការណ៍ផ្លូវការនានា។
នៅក្នុងការបង្ក្រាបលើសារព័ត៌មានជាលើកទី២នៅក្នុងឆ្នាំនេះ តុលាការថ្នាក់តំបន់មួយនៃទីក្រុងម៉ានីលបានបញ្ចប់សំណុំរឿងបរិហារកេរ្តិ៍តាមអ៊ីនធឺណិតប្រឆាំងនឹងសារព័ត៌មានអនឡាញក្នុងស្រុកមួយដែលមានឈ្មោះថា Rappler អ្នកស្រី Maria Ressa ដែលជានាយកប្រតិបត្តិនៃសារព័ត៌មាននេះ និងអតីតអ្នកនិពន្ធស្រាវជ្រាវនៃសារព័ត៌មាននេះ។ សារព័ត៌មាន Rappler នេះ ជាញឹកញាប់ចេញផ្សាយរបាយការណ៍រិះគន់លើពួកយោធា និងលើយុទ្ធនាការប្រឆាំងគ្រឿងញៀនរបស់លោកប្រធានាធិបតី Duterte។
លោក Gomez បាននិយាយថា ករណីទាំងពីរបង្ហាញថា លោកប្រធានាធិបតី Duterte «បានយកច្បាប់ធ្វើជាអាវុធ» ដើម្បីរករឿងប្រព័ន្ធផ្សព្វផ្សាយ។ ប្រទេសហ្វីលីពីនក្នុងនាមជាប្រទេសប្រជាធិបតេយ្យអនុញ្ញាតជាផ្លូវការឱ្យមានសេរីភាពនៃការបញ្ចេញមតិ និងសេរីភាពនៃការផ្សព្វផ្សាយ។ ទីស្នាក់ការកណ្តាលរបស់បណ្តាញសារព័ត៌មាន ABS-CBN នៅក្នុងទីក្រុងម៉ានីល មិនបានឆ្លើយទូរស័ព្ទរបស់ VOA ក្នុងការសុំយោបល់នោះទេ កាលពីពេលថ្មីៗនេះ។
លោក Renato Reyes អគ្គលេខាធិការនៃសម្ព័ន្ធអង្គការនយោបាយឆ្វេងនិយមBagong Alyansang Makabayan នៅក្នុងក្រុងម៉ានីល បាននិយាយថា គណៈកម្មាការទូរគមនាគមន៍ជាតិបានបដិសេធថា បណ្តាញសារព័ត៌មាន ABS-CBN មិនមាន «ដំណើរការត្រឹមត្រូវ» នោះទេ។
បណ្តាញសារព័ត៌មាននេះសរសេរនៅលើគេហទំព័ររបស់ខ្លួនថា គណៈកម្មការនេះបានធ្វើការសុំទោសរដ្ឋសភាចំពោះការមិនបានជូនដំណឹងដល់រដ្ឋសភាអំពីការបិទនេះ។ គេហទំព័រនេះសរសេរថា សភាកំពុងពិចារណាលើច្បាប់ដើម្បីបន្តសិទ្ធិអាជីវកម្មរហូតដល់ខែតុលា ក្នុងចំណោមច្បាប់ផ្សេងទៀត ដែលអាចអនុញ្ញាតឱ្យបណ្តាញនេះបន្តធ្វើការផ្សព្វផ្សាយតាមរលកធាតុអាកាសបាន។ សម្ព័ន្ធមិត្តរបស់លោក Duterte គ្រប់គ្រងព្រឹទ្ធសភា ដែលឥឡូវនេះកំពុងតែសិក្សាលើច្បាប់ទាំងនេះមួយចំនួន។
លោក Reyes បាននិយាយថា ការបិទនេះ «កើតឡើងចំពេលអាក្រក់បំផុត គឺចំពេលដែលមានការឆ្លងរាតត្បាតជំងឺកូវីដ១៩ ជាសាកល ដោយវាធ្វើឱ្យមនុស្សជាច្រើនបាត់បត់ការងារធ្វើ។ រឿងចាំបាច់ដែលយើងត្រូវការនៅពេលឥឡូវនេះគឺសេរីភាពសារព័ត៌មាន»។
លោក Daniel Bastard ប្រធានប្រចាំតំបន់អាស៊ីប៉ាស៊ីហ្វិកនៃអង្គការអ្នកកាសែតគ្មានព្រំដែន (Reporters without Borders) ដែលជាអង្គការតស៊ូមតិមួយ បាននិយាយថា បណ្តាញសារព័ត៌មានABS-CBN បាន «ដើរតួយ៉ាងសំខាន់» ក្នុងការផ្តល់ដំណឹងដល់អ្នកស្តាប់នៅតាមជនបទក្នុងប្រទេសហ្វីលីពីនអំពីការឆ្លងរាលដាលនៃវីរុសកូរ៉ូណា។
ផ្នែកជាច្រើននៅក្នុងប្រទេសហ្វីលីពីនត្រូវបានបិទ ស្របពេលដែលករណីឆ្លងជំងឺកូវីដ១៩ នៅក្នុងប្រទេសនេះមានចំនួនប្រមាណ ១២.៥០០ ករណី និងការស្លាប់ជាង ៨០០ ករណី។ លោកបាននិយាយថា ប្រសិនបើបណ្តាញសារព័ត៌មាននេះឈប់ដំណើរការជារៀងរហូត វាបង្ហាញថា «ពហុនិយមនៃសារព័ត៌មានត្រូវបានកាត់បន្ថយទៅដល់កម្រិតនៃសម័យរបស់លោកប្រធានាធិបតី Marcos»។
បណ្តាញសារព័ត៌មានABS-CBN នេះធ្លាប់ត្រូវបានបិទនៅក្នុងឆ្នាំ ១៩៧២ បន្ទាប់ពីលោកអតីតប្រធានាធិបតី Ferdinand Marcos បានប្រកាសច្បាប់អាជ្ញាសឹក តែក្រោយមក បណ្ដាញនេះបានដំណើរការឡើងវិញនៅក្នុងឆ្នាំ១៩៨៦។ បណ្តាញសារព័ត៌មាននេះបានរាយការណ៍ពីប្រាក់ចំណូលនៅពាក់កណ្តាលឆ្នាំ ២០១៩ ថាមានចំនួន ២៣ ពាន់ ៣ រយលានប៉េសូ ដែលស្មើនឹងប្រហែល ៤៥៨ លានដុល្លារអាមេរិក។
មន្ត្រីនៃអង្គការតស៊ូមតិខាងលើនិយាយថា៖ «ជាមូលដ្ឋាន វិធីដែលរដ្ឋបាលរបស់លោក Duterte ចាត់ការជាមួយនឹងសារព័ត៌មាន បង្ហាញថា ក្រុមរបស់លោក Duterte មិនត្រឹមតែមិនអត់ឱនឱ្យសារព័ត៌មានឯករាជ្យ ឬសារព័ត៌មានដែលតិទៀនរដ្ឋាភិបាលប៉ុណ្ណោះទេ ប៉ុន្តែវាជាការរំឭកទៅដល់ដំណាក់កាលខ្មៅងងឹតរបស់ប្រទេសហ្វីលីពីនក្នុងពេលស្ថិតក្រោមការដឹកនាំផ្តាច់ការ»៕