អ្នកធ្វើការក្នុងវិស័យទេសចរណ៍លើកឡើងថា ការដំឡើងតម្លៃសំបុត្រចូលទស្សនារម្មណីយដ្ឋានអង្គរគឺមានតម្លៃថ្លៃខ្ពស់ពេក។ ពួកគេយល់ថា វានឹងអាចធ្វើឱ្យប៉ះពាល់កេរ្តិ៍ឈ្មោះរបស់កម្ពុជា និងប៉ះពាល់ដល់ការមកទស្សនារបស់ភ្ញៀវអន្តរជាតិមកកាន់តំបន់បេតិកភណ្ឌពិភពលោកមួយនេះ។
កាលពីថ្ងៃសុក្រកន្លងទៅ គ្រឹះស្ថានអង្គរ ដែលជាស្ថាប័នរដ្ឋគ្រប់គ្រងលើការលក់បណ្ណចូលទស្សនាតំបន់អង្គរ បានចេញសេចក្ដីជូនដំណឹងមួយនិយាយអំពីការដំឡើងតម្លៃសំបុត្រសម្រាប់ជនបរទេស។ បើតាមសេចក្ដីជូនដំណឹងនោះ ចាប់ពីខែកុម្ភៈ ឆ្នាំ២០១៦តទៅ តម្លៃសំបុត្រសម្រាប់ចូលទស្សនារយៈពេល១ថ្ងៃនឹងត្រូវកើនពី២០ដុល្លារទៅ៣៧ដុល្លារពោលគឺឡើងចំនួន១៧ដុល្លារ។ តម្លៃសំបុត្ររយៈពេល៣ថ្ងៃនឹងកើនពី៤០ដុល្លារទៅ៦២ដុល្លារ ពោលគឺឡើង២២ដុល្លារ។ ចំណែកតម្លៃសំបុត្រសម្រាប់ចូលទស្សនារយៈពេលមួយសប្ដាហ៍នឹងត្រូវកើនពី៦០ដុល្លារទៅ៧២ដុល្លារពោលគឺឡើងចំនួន១២ដុល្លារ។
គ្រឹះស្ថានអង្គរក៏បានបញ្ជាក់នៅក្នុងលិខិតនោះផងដែរថា តម្លៃថ្មីនៃបណ្ណទាំង៣ប្រភេទគឺបានបញ្ចូលតម្លៃបន្ថែមចំនួន២ដុល្លារ ដែលគ្រឹះស្ថានអង្គរអះអាងថា នឹងត្រូវបង់ចូលមូលនិធិមន្ទីរពេទ្យគន្ធបុប្ផាសម្រាប់ព្យាបាលជំងឺកុមារក្រីក្រកម្ពុជា។ ទោះយ៉ាងណា គ្រឹះស្ថានអង្គរមិនបានបញ្ជាក់ពីមូលហេតុនៃការដំឡើងតម្លៃសំបុត្រនេះទេ។
លោកហូ វណ្ឌី អគ្គលេខាធិការសម្ព័ន្ធទេសចរណ៍ជាតិកម្ពុជា មានប្រសាសន៍ថា ការដំឡើងថ្លៃសំបុត្រនេះគឺខ្ពស់ហួសហេតុពេក។ លោកថា វាអាចធ្វើឱ្យប៉ះពាល់ដល់អារម្មណ៍ក៏ដូចជាការមកទេសចរណ៍របស់ភ្ញៀវអន្តរជាតិ។
លោកមានប្រសាសន៍ថា៖
«ប៉ុន្តែពី២០ទៅ៣៧ដុល្លារ នៅក្នុងហ្នឹងមាន២ដុល្លារដែលគ្រឹះស្ថានអង្គរថា នឹងជួយទៅមន្ទីរពេទ្យគន្ធបុប្ផា។ បាទដូច្នេះបើយើងកាត់២ដុល្លារចេញ វា[ឡើង]១៥ដុល្លារ។ អីចឹង ១៥ដុល្លារ តួលេខនេះវាស្មើនឹង៧០ទៅ៨០ភាគរយឯណោះ។ អីចឹង យើងឃើញថា ទំនិញអ្វីមួយនៅលើទីផ្សារ បើសិនជាដំឡើងថ្លៃ[ខ្ពស់]អីចឹង វាធ្វើឱ្យប៉ះពាល់អារម្មណ៍...ទី២ វាអាចកាត់បន្ថយការដើរហើររបស់គេដែរ។ ជួនកាលគេធ្លាប់មក៣ថ្ងៃ គេអាចមកមួយថ្ងៃ ឬពីរថ្ងៃ ដូច្នេះការខាតបង់ហ្នឹងវាមាន។ ជួនកាលមិនខាតបង់ត្រង់ទៅលើហ្នឹង ក៏ប៉ុន្តែខាតបង់ទៅលើអតិថិជន ឬក៏ដូចជាពលរដ្ឋដែលគាត់រកស៊ីនៅក្នុងឧស្សាហកម្មហ្នឹង»។
លោកហូ វណ្ឌីបន្តថា បណ្ដាសមាគមនិងអ្នកធ្វើការក្នុងវិស័យទេសចរណ៍នឹងជួបប្រជុំគ្នាដើម្បីពិភាក្សាគ្នាពីការកើនឡើងនៃតម្លៃសំបុត្រចូលតំបន់អង្គរនេះ មុននឹងទៅជជែកគ្នាជាមួយរដ្ឋាភិបាល។
លោកខៀវ ធី ប្រធានសមាគមមគ្គុទេសក៍ទេសចរណ៍អង្គរបង្ហាញពីការព្រួយបារម្ភប្រហាក់ប្រហែលគ្នា ដោយលោកបន្ថែមថា ការដំឡើងតម្លៃសំបុត្រចូលទស្សនាអង្គរក៏នឹងអាចធ្វើឱ្យប៉ះពាល់ដល់កេរ្តិ៍ឈ្មោះកម្ពុជា និងពិបាកក្នុងការប្រកួតប្រជែងជាមួយប្រទេសជិតខាង។
លោកមានប្រសាសន៍ថា៖
«បាទ ពីព្រោះប្រទេសជិតខាង ដូចជាប្រទេសវៀតណាម គេព្យាយាមទម្លាក់តម្លៃហើយនិងមិនយកតម្លៃលើវីសា (ទិដ្ឋាការ) ហើយនិងគេព្យាយាមលើកតម្កើងផ្នែកអនឡាញហ្នឹង អ៊ីនធើណែត Wifi ហ្នឹងគ្រប់ Free (ឥតគិតថ្លៃ) ពេលណាចូលដល់ទីក្រុងគេ។ អីចឹងពេលដល់ស្រុកប្រទេសកម្ពុជាយើង យើងអត់មានសេវាកម្មអីដើម្បីទាក់ទាញ មានតែការតម្លើងថ្លៃបន្ថែម។ អីចឹងហើយជាការប្រណាំងប្រជែងរបស់យើង វានៅមានកម្រិតចាញ់គេ ហើយកេរ្តិ៍ឈ្មោះមុខមាត់ការទិតៀនរបស់ភ្ញៀវប្រាកដជាមានចំពោះប្រទេសខ្មែរយើង»។
លោកខៀវ ធីឱ្យដឹងដែរថា នៅថ្ងៃអង្គារសប្ដាហ៍នេះ រូបលោកនិងសមាគមព្រមទាំងវិស័យឯកជនផ្សេងទៀត នឹងជួបប្រជុំជាមួយមន្ត្រីរដ្ឋាភិបាលពិភាក្សាអំពីវិស័យទេសចរ នៅឯសាលាខេត្តសៀមរាប។ លោកបន្ថែមថា លោកគ្រោងនឹងស្នើឱ្យរដ្ឋាភិបាលពិចារណាឡើងវិញលើតម្លៃដែលបានកំណត់ដំឡើងនេះ។
លោកហុក សេង មន្ត្រីរដ្ឋបាលនៃគ្រឹះស្ថានអង្គរ មានប្រសាសន៍ថា លោកពុំបានដឹងព័ត៌មានលម្អិត និងមូលហេតុនៃការដំឡើងតម្លៃសំបុត្រចូលទស្សនាអង្គរនោះទេ ដោយលោកថ្លែងថា គ្រឹះស្ថានអង្គរគ្រាន់តែជាអ្នកផ្សព្វផ្សាយព័ត៌មានបន្តប៉ុណ្ណោះ។ លោកឱ្យដឹងថា កិច្ចប្រជុំនៅថ្ងៃអង្គារនឹងពិភាក្សាអំពីការដំឡើងតម្លៃសំបុត្រចូលទស្សនាអង្គរ ដោយមានការចូលរួមពីរដ្ឋមន្ត្រីក្រសួងទេសចរណ៍គឺលោកថោង ខុននោះទេ។ លោកឲ្យដឹងថា អ្នកចូលរួមអាចបញ្ចេញមតិយោបល់ និងចោទជាសំណួរបាន។
VOA មិនអាចទាក់ទងតាមទូរស័ព្ទទៅរដ្ឋមន្ត្រីក្រសួងទេសចរណ៍គឺលោកថោង ខុនដើម្បីសុំការអត្ថាធិប្បាយបានទេ។ ទោះយ៉ាងណា លោកបានថ្លែងប្រាប់សារព័ត៌មានក្នុងស្រុកថា តម្លៃថ្មី៣៧ដុល្លារដែលកំណត់សម្រាប់ឆ្នាំ២០១៧នេះគឺប្រហាក់ប្រហែលនឹងតម្លៃ២០ដុល្លារកាលពីឆ្នាំ១៩៩៤ ដោយលោកបានលើកឡើងថា ការឡើងថ្លៃនេះគឺដោយសារការកើនឡើងតម្លៃមុខទំនិញនានានៅលើទីផ្សារ។
យោងតាមរបាយការណ៍របស់គ្រឹះស្ថានអង្គរ ចំណូលបានពីការលក់សំបុត្រ ចូលទស្សនាតំបន់អង្គរមានជាង៣១លានដុល្លារនៅក្នុងរយៈពេល៦ខែឆ្នាំ២០១៦នេះ។ តួលេខនេះកើន១,៧៥ភាគរយធៀបទៅនឹងរយៈពេលដូចគ្នានៃឆ្នាំ២០១៥។ របាយការណ៍នោះបង្ហាញដែរថា ចំនួនភ្ញៀវទេសចរបរទេសចូលទស្សនាតំបន់អង្គរបានកើនឡើង០,៧០ភាគរយ បើធៀបទៅនឹងរយៈពេលដូចគ្នាក្នុងឆ្នាំ២០១៥៕