ប្រទេសចិន និងសហរដ្ឋអាមេរិកអាចដោះស្រាយបញ្ហាខ្វែងគំនិតគ្នា និងធ្វើឲ្យទំនាក់ទំនងវិលមករកសភាពដើមវិញ ប្រសិនបើប្រទេសទាំងពីរធ្វើការជាមួយគ្នាក្នុងស្មារតីនៃការគោរពគ្នាទៅវិញទៅមក។ នេះបើតាមការបញ្ជាក់របស់នាយករដ្ឋមន្ត្រីចិនលោក Li Keqiang ដែលបានប្រាប់ក្រុមអ្នកនយោបាយអាមេរិក ដែលធ្វើទស្សនកិច្ចនៅប្រទេសចិននៅថ្ងៃព្រហស្បតិ៍នេះ។
ប្រទេសចិន និងសហរដ្ឋអាមេរិកកំពុងជាប់គាំងនៅក្នុងសង្គ្រាមពាណិជ្ជកម្ម ដែលកាន់តែជូរចត់ឡើង ដោយប្រទេសទាំងពីរបានយកពន្ធគយលើទំនិញគ្នាទៅវិញទៅមករួចទៅហើយ។
នៅពេលជួបប្រជុំជាមួយនឹងក្រុមសមាជិកព្រឹទ្ធសភាអាមេរិកខាងគណបក្សសាធារណរដ្ឋ និងសមាជិករដ្ឋសភាអាមេរិកដែលជាស្ត្រីមួយរូបនៅក្នុងទីក្រុងប៉េកាំង លោក Li Keqiang បាននិយាយថា នៅក្នុងរយៈពេល ៤ ទសវត្សរ៍ចុងក្រោយនៃទំនាក់ទំនងការទូត ទំនាក់ទំនងរវាងប្រទេសចិន និងសហរដ្ឋអាមេរិកម្ដងឡើងម្ដងចុះ។
លោកបញ្ជាក់ដូច្នេះថា៖ «ការរីកចម្រើនត្រឹមត្រូវ និងមានស្ថិរភាពនៃទំនាក់ទំនងរវាងចិន និងសហរដ្ឋអាមេរិកបម្រើឲ្យផលប្រយោជន៍រួម និងផលប្រយោជន៍សំខាន់នៃប្រជាពលរដ្ឋនៃប្រទេសយើងទាំងពីរ»។
សមាជិកព្រឹទ្ធសភាប្រចាំរដ្ឋ Tennessee លោក Lamar Alexander បានប្រាប់លោក Li Keqiang ថា គណៈប្រតិភូអាមេរិកទៅប្រទេសចិន «ដើម្បីបង្ហាញការគោរពរបស់សហរដ្ឋអាមេរិកចំពោះប្រទេស និងប្រជាជនចិនដ៏អស្ចារ្យ»។
លោកបានបន្ថែមថា៖ «ប្រទេសចិន និងសហរដ្ឋអាមេរិកគឺជាគូប្រកួតប្រជែង ប៉ុន្តែមិនមែនជាសត្រូវនោះទេ។ ហើយយើងជឿថា ដោយមានការគោរពគ្នាទៅវិញទៅមក យើងអាចបន្តរីកចម្រើនទាំងអស់គ្នា»៕